1 *Hib 11:31; Iak 2:25E huriki a Israel ri tababana ni made o Sitim, lakea e Iosua i rudu a bakovi ala rua ru vano, ru kasisia a robo e Kenan. I taki rua, i ta maea, “Muru vano, muru matai kapilohoa a tanga dagi e Ieriko turana a malala i tabuli tabukoi vona.” Muri a bakovi nga ru vano ru bele vona tara ruma na ngatavine a ngoi, a rana e Rahap, ru made turana.

2 Lakea ranga viri ri takia a hariki o Ieriko, ri ta maea, “O matadoko! Mona na rodo, i ranga Israel ri valai ta ri gi kasisia a robo vomu.” 3 Na tahuna a hariki i longoa a nita iea, i rudu ranga viri ri lakea ne Rahap, ri ta maea, “O tuli tala valai a viri ri made na ruma vomu, ri valai ni kasisia a robo iea.”

4 Pali e Rahap i ruhulolo a bakovi nga ala rua, lakea i taki a bakovi i rudu valai a hariki i ta maea, “I muholi, i ranga viri ri valai na ruma nau. Pali i uka ma a lohoka vona i vai a hini ri valai vona. 5 Na malunga, tabukoi na tahuna ni tukari a hinebi dagi na tanga dagi, ri pe a hini nga. I uka ma a lohoka vona a hini ri lakea vona. Pali mua bara mu nunu muri ne ria, bara mu bole ria.” 6 E Rahap i rata a ngava nga i tami ria, pali i tuli sike na mapana ruma a bakovi o Israel nga, i ruhulolo rua polotano na galesi na vit i ru kadolu vonga. 7 E huriki a bakovi na hariki ri longo a nitane Rahap, ri pea a tanga dagi. Muri e huriki a tagari ri tukaria a hinebi dagi. E huriki a tara na hariki ri vano ri gi matakana ra bakovi o Israel nga ala rua ru valai ni kasisi. Ri matakana rua, ri vano ri harena na gagana naru e Iordan.

8 A bakovi o Israel nga i uka ma ru mahita ma, lakea e Rahap i rike na ruma 9 i taki rua i ta maea, “A lohoka vona e BAKOVI DAGI i habia pali ne mua a Israel a robo iea. A taki muholi marua, mia mi mangenge hateka, i vakulu a tagane mia ne mua, 10 *Nim 14:21; Gi 21:21-35a vuhuna e huriki ri tuverei polo ne mia vona e BAKOVI DAGI i ratea a Dari Vururu i mara na tahuna mu pea e Egipto. Mi longo tabua pali, mua mu rabalaki e Sihon e Og a hariki o Amor, turana e huriki a nugumaheto ne rua, na tabeke mule lokovonga ne Iordan. 11 Mi longo a ngava mi mangenge hateka ne mua. Ngane mia lobo mi uka a nitora. E BAKOVI DAGI a Vure ne mua, ia a Vure na hunu a malala. 12 Ngane muru ta muholi na matane BAKOVI DAGI, muru matakari kamumu e huriki a kabu nau, ge manga a hini a matakari kamumu marua. Muru habia nau tara maki ga kilakila, ge vakatorea a nita muholi ne marua. 13 Mua o huriki a Israel, naha ni rabalaki e tata e nana, e huriki e kurabagu e turagu ngatavine, turane huriki a kabu ne ria. Naha ni matataro e huriki a bakovi ri gi rabalaki mia.”

14 Lakea a bakovi nga ru koli a ngavana, ru ta maea, “Miri ta muholi na matamu. Maria bara miri ratapilea a nita muholi iea, e BAKOVI DAGI bara i ratapile maria. Ioe i uka ma go taki e huriki a Ieriko vona na maka maki miri rata, maria i uka ma miri gi tatami ni tuhori ioe, na tahuna e BAKOVI DAGI i habia ne mia a robo iea.”

15 A ruma e Rahap i doga na nure na tanga dagi. I ranga a turutu ri tahoka a nimatatala polomeli na nure na tanga dagi. E Rahap i bolea tara mota i vakatalepe purua, ru gu roe puru vona a bakovi nga. 16 Lakea i taki rua i ta maea, “Muru vano, muru kapiloho na dahana lolo na parava ge tolu, ma ge matai marua e huriki a tara na hariki. Na tahuna ri hamule valai pali o Ieriko, muru vano muru hamule lakea ne huriki a viri ne marua.”

17 A bakovi nga ru takia e Rahap ru ta maea, “Ioe bara o rata lobo a maki miri taki ioe vona, maria i uka ma miri gi tatami vona a nita muholi miri ratea pali vomu. 18 Ngane o longo kamumu! Na tahuna mi gi bele koea, o koloa a mota vururu na nimatatala, na hini miri roe puru vona. O taki e tamamu e kinamu, e huriki e turamu turana e huriki a kabu ne ria, ri gi valai ri gi vapopo na ruma vomu. 19 I tara ne ria ge ha taro a ruma, ge laho viliha ni gi rabalaki, a maregoa vona, i uka ma ga maregoa ne maria. Pali i tara ne mua ge bole a vuranga pololilo na ruma, a maregoa maria. 20 Pali o matadoko! Ioe bara o taki e huriki a Ieriko na maki miri rata, a nita muholi ne maria bara i lobo.”

21 E Rahap i koli i ta maea, “A ngaru a nitane marua.” I ta mavonga, lakea i rudu rua ru vano. Muri i kolotatea na nimatatala vona a mota vururu.

22 Ra bakovi nga ru vano ru bele na lolo ru kapiloho vonga. E huriki a tara na hariki ri matakana rua na maka tanga na parava i tolu. Pali i uka ma ri matavisi rua, lakea ri hamule lakea o Ieriko. 23 Muri ra bakovi nga ru pe a lolo, ru puru valai, ru tulu poloa a naru e Iordan, ru vano ru bele ne Iosua e tune Nun, ru taki vona a maki lobo ru rata. 24 Ru takia e Iosua ru ta maea, “Muholi hateka, e BAKOVI DAGI i habi ne hita pali a robo iea. E huriki a tahotanga ri mangenge hateka ne hita.”