20
E Huriki a Voravora na Hania na Vain
“A harikianga na hunu i manga a tahona malala i vuho tala ge matakana e huriki a vora ri gi leho na hania na vain vona. I taki ria ge kona ria na denarius i taku.* A moni denarius i taku a mapana viri i leho na parava i taku. Ri longo, lakea i rudu ria ri gi leho na hania na vain.
“Muri na kilala i polova na hatelanga i vano tabu, ge matakana e huriki a vora. I matai e huriki a bakovi ri pesi tavula na mada, lakea i taki ria, i ta maea, ‘Mua ranga mu valai, mu leho na hania na vain nau. Bara kona kamumu mua.’ Lakea ri vano, ri leho.
“I rata mavonga tabu na kuru haro. I vano tabu na kilala i tolu na malunga. Na malunga, na kilala i lima, i vano tabu. I matai e huriki ranga ri pesi tavula, lakea i nana ria, ‘I navai mu pesi tavula mavonga koea na parava iea?’
“Ri koli, ri ta maea, ‘I uka tara viri ge taki mia mi gi leho vona.’
“Lakea i taki ria, ‘Pali. Mua ranga mu valai mu leho na hania na vain nau.’
* Levi 19:13; Vin 24:15 “Na malunga liu ngane, i takia a matakari na vora, i ta maea, ‘O gale palupu e huriki a vora, o kona ria. O vakatubu ne huriki ri bele muri.’
“E huriki a vora ni bole na malunga ri valai muga ri bole a mapane ria. Ni habi ne ria takutaku a denarius i taku. 10 Muri e huriki ri leho muga ri valai, ni gi kona ria. Ri pahadaki ta ri gi bole a moni dagi, pali ria ranga, ri bole takutaku a denarius i taku kunana. 11 Na tahuna ri bole a mapane ria, ri vakatubu ni deke, 12 ri ta maea, ‘Re huriki nga o bole na malunga liu, ri leho kunana na kilala i taku, lakea ke o kona ria i manga o kona mia. Pali mia, mi leho tabaka, i kani mia a haro.’
13 “Lakea i koli i takia a viri tara ne ria, i ta maea, ‘Turagu, iau i uka ma rata hale ioe. Muga o longo vona a denarius a taki ioe ga kona ioe vona. 14 O bolea a mapamu, o vano. A ningaru nau kunana a kona mua na mapa i taku. 15 Ra moni nga, a moni nau. I navai, go taki iau a ra ga ratea vona? I navai ke? I madihi a hatemu a vuhuna iau a hatebalala?’
16  * Mat 19:30; Mrk 10:31 “I mavonga kunana, e huriki ri muri bara ri muga. E huriki ri muga bara ri muri.”
E Isu i Taki Mugea a Nimatena
(Markus 10:32-34; Lukas 18:31-33)
17 E Isu i lalaho sike o Ierusalem. I tuli lakea na gaga e huriki a murimuri vona ala ravulu a polona i rua, i taki ria, i ta maea, 18  * Mat 16:21; 17:22-23“Ngane si gi sike o Ierusalem. A Tuna Bakovi bara ni habi na limane huriki a prister dagi, a mari na vinara. Bara ri taki ni gi rabalaki ia. 19 Muri bara ri habia na limane huriki i uka ma ria a Iuda, ri gi padikedea, ri gi hotua, ri gi paditatea na kai tavalavala. Muri na parava i tolu, a Vure ge vakamahuri mulea.”
E Kinane Iakobus Rua e Ioanes
(Markus 10:35-45)
20 Muri e girihine Sebedi, i tuli valai ne Isu e tuna rua. I pasike puru na ngalane Isu, i nanea ge ratea vona tara maki.
21  * Mat 19:28; Luk 22:30Lakea e Isu i nanea, “A ra o ngarua?” I koli, i ta maea, “A ngaru e tugu nga ru gu made turamu na harikianga vomu. Ge made na kanemu tara, na maurimu tara.”
22  * Mat 26:39; Ion 18:11E Isu i koli, i ta maea, “I uka ma moto lohoka vona a maki moto nana vona. A nimadihi i tabukoi ga bolea, i kara marua muru gu kalohoa, o i uka?”
Ru koli e maki tari rua, ru ta maea, “I kara maria.”
23 Lakea e Isu i taki rua i ta maea, “I muholi hateka muru gu kalohoa a nimadihi manga iau. Pali e rei ge made na kanegu, a maurigu, i uka ma a maki nau ga habi. A gula nga e Tata i rata puru na viri i vulaki pali.”
24 Na tahuna e huriki a murimuri ala ravulu ri longoa, i madihi a hatene ria. 25  * Luk 22:25-26Pali e Isu i gale palupu ria, i taki ria, “Mu lohoka vona e huriki i uka ma ria a Iuda, a hariki ne ria ri matakari hateka ria. E huriki a bakovi dagi ne ria ri rata polo mugamuga. 26  * Mat 23:11; Mrk 9:35Pali mua, i uka ma mu gu rata mavonga. E rei a viri i ngaru ge ia a viri dagi ne mua, ge leho manga a vora ne mua. 27 E rei a viri i ngaru ni muga ne mua ge ia a vora ne mua, 28  * Luk 22:27; Pili 2:7ge manga a Tuna Bakovi. Ra Tuna Bakovi, i valai i uka ma ge vakavora e huriki. I valai ge ia a vora ne huriki, ge mate, ge kona­mule e huriki ala kupo.”
E Isu i Vakamatapara a Kepa
(Markus 10:46-52; Lukas 18:35-43)
29 Na tahuna e Isu, e huriki a murimuri vona ri pea e Ieriko, e huriki ri ala kupo ri muri vona. 30 A kepa ala rua ru mamade na dahana dala. Na tahuna ru longoa e Isu i laho polo, ru gale tala, ru ta maea, “O Bakovi Dagi, hamone Davit, o dodo maria!”
31 Pali e huriki ri tahate rua, ri taki rua ru gu vulai. Pali ru gale hinituhana tabu, ru ta maea, “O Tune Davit, Bakovi Dagi, o dodo maria!”
32 Lakea e Isu i pesi tata, i gale valai rua, i ta maea, “A ra muru ngarua?”
33 Ru koli, ru ta maea, “Bakovi Dagi, miri ngaru go vakamatapara maria!”
34 E Isu i dodo rua, i nugu a matane rua. Malaviriri kunana ru matapara, ru muri vona.

*20:2: A moni denarius i taku a mapana viri i leho na parava i taku.

*20:8: Levi 19:13; Vin 24:15

*20:16: Mat 19:30; Mrk 10:31

*20:18: Mat 16:21; 17:22-23

*20:21: Mat 19:28; Luk 22:30

*20:22: Mat 26:39; Ion 18:11

*20:25: Luk 22:25-26

*20:26: Mat 23:11; Mrk 9:35

*20:28: Luk 22:27; Pili 2:7