1 འོན་ཀྱང་ཁྱེད་ཀྱིས་སྐྱོན་མེད་པའི་བསྟན་པ་དང་མཐུན་པའི་ཆོས་སྟོན་ཅིག 2 རྒད་པོ་རྣམས་ནི་ཚོད་ཤེས་པ་དང༌། བཙུན་པ། རང་ཚོད་ཟིན་པ་མ་ཟད། དད་པ་དང༌། བྱམས་པ། བཟོད་པ་དང་ལྡན་པ་བཅས་སྐྱོན་མེད་དུ་གནས་དགོས་པར་ཁྱེད་ཀྱིས་ཆོས་སྟོན་དགོས། 3 དེ་བཞིན་དུ་རྒད་མོ་རྣམས་སྤྱོད་ཚུལ་དམ་པ་དང༌། རྒུན་ཆང་ལ་སོགས་མང་པོ་མི་འཐུང་མཁན། དམའ་འབེབས་མི་གཏོང་བ། བཟང་པོ་སྟོན་མཁན་བཅས་ཡིན་དགོས་པར་ཁྱེད་ཀྱིས་ཆོས་སྟོན་དགོས། 4-5 དེ་ནས་རྒད་མོ་རྣམས་ཀྱིས་གཞོན་ནུ་མ་རྣམས་ལ་དེ་ཚོའི་ཁྱོ་ག་དང་ཕྲུ་གུ་ལ་གཅེས་པར་འཛིན་པ་དང༌། རང་ཚོད་ཟིན་པ། ལྷད་མེད་པ། ནང་ལས་བྱེད་པ། བཟང་པོ་བྱེད་པ། རང་གི་ཁྱོ་གའི་ཁ་ལ་ཉན་མཁན་ཡིན་དགོས་པ་སྟོན་པའི་ཕྱིར་རོ། དེ་ལྟར་སུས་ཀྱང་དཀོན་མཆོག་གི་བཀའ་ལ་སྨོད་པར་མི་བྱ། 6 དེ་བཞིན་ཁྱེད་ཀྱིས་གཞོན་ནུ་རྣམས་རང་ཚོད་ཟིན་མཁན་ཡིན་པར་སྐུལ་དགོས་ལ། 7 དོན་ཐམས་ཅད་ལས་བཟང་གི་དཔེ་རུ་བྱོས་ཤིག གལ་ཏེ་ཁྱེད་ཀྱི་ཆོས་བསྟན་པ་བཅོས་མིན་དང༌། བཙུན་པ། 8 སྐྱོན་མེད་པ། སྐྱོན་བརྗོད་བྱེད་མི་སྲིད་པ་བཅས་ཡིན་ན། ངོ་རྒོལ་བྱེད་མཁན་གྱིས་ང་ཚོའི་སྐོར་ངན་གཏམ་ཤོད་མི་ཐུབ་པས་ངོ་ཚ་བར་འགྱུར། 9 བྲན་གཡོག་རྣམས་ཀྱིས་བདག་པོའི་ཁ་ལ་ཉན་པ་དང༌། དོན་ཐམས་ཅད་ལ་དེ་ཚོ་དགའ་བར་བྱེད་པ། ཕྱིར་མི་རྒོལ་བ། 10 མི་རྐུ་བར་དྲང་པོ་ཡིད་ཆེས་བཅས་བྱེད་པར་སྐུལ་དགོས། དེ་ནི་ང་ཚོའི་སྐྱབས་མགོན་དཀོན་མཆོག་གི་བསྟན་པ་ལ་མི་རྣམས་ཀྱིས་བཀུར་སྟི་བྱེད་པའི་ཕྱིར་ཡིན།

11 མི་ཐམས་ཅད་སྐྱོབ་པའི་ཕྱིར་དཀོན་མཆོག་གི་ཐུགས་རྗེ་མངོན་པར་གྱུར། 12 དཀོན་མཆོག་གི་ཐུགས་རྗེ་དེས་ཆོས་མེད་པ་དང་འཇིག་རྟེན་གྱི་འདོད་ཆགས་དོར་ནས་དུས་འདིར་རང་ཚོད་ཟིན་པ་དང༌། དྲང་བ། དམ་པ་ཡིན་དགོས་པར་ང་ཚོར་སྟོན། 13 དུས་དེའི་རིང་ལ་ང་ཚོའི་རླབས་ཆེ་བའི་རེ་སྒུག་བྱེད་པ་ནི་བླ་ན་མེད་པའི་དཀོན་མཆོག་སྐྱབས་མགོན་ཡེ་ཤུ་མཱ་ཤི་ཀའི་གཟི་བརྗིད་མངོན་པ་བྱེད་རྒྱུ་དེ་ཡིན། 14 ཡེ་ཤུས་ང་ཚོ་ལས་ངན་ཐམས་ཅད་ལས་བླུ་རིན་གྱིས་ཐར་དུ་འཇུག་པ་དང༌། རང་གི་དོན་དུ་ལས་བཟང་བྱེད་པར་བརྩོན་སེམས་ཡོད་པའི་འབངས་མི་ལྷད་མེད་པར་མཛད་པའི་ཕྱིར་ཁོང་གིས་རང་གི་སྲོག་བློས་བཏང༌། 15 དོན་འདི་རྣམས་དབང་གིས་སྟོན་ཞིང༌། མི་རྣམས་ལ་སྐུལ་མ་དང་བཀའ་བཀྱོན་ཡང་གཏོང་ཞིག མི་སུས་ཀྱང་ཁྱེད་ལ་སྣང་མེད་བྱེད་དུ་མ་འཇུག་ཅིག །