1 སྤུན་ཟླ༌རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ཕེབས་ཡོང་བ་དང་བདག་ཅག་ཁོང་གི་དྲུང་དུ་འཛོམ་ངེས་པའི་སྐོར་ནི་ངེད་ཅག་གིས་ཁྱོད་རྣམས་ལ་འདི་ལྟར་བསྐུལ་བར་བྱ༌སྟེ། 2 ལུང་བསྟན་གནང་བ་དང༌། གཏམ་སྨྲ༌བ། ངེད་ཅག་གི་མིང་དུ་བརྫུས་ནས་བྲིས་པའི་འཕྲིན་ཡིག་བཅས་གང་དང་གང་གིས་གཙོ་བོའི་ཉིན་མོ་ད་ལྟ་སླེབས་ཟིན་ཞེས་ཟེར༌ན། ཁྱོད་རྣམས་བྱུང་རྒྱལ་དུ་སེམས་མི་འགུལ་ལ་འཇིགས་པར་ཡང་མི༌བྱའོ།། 3 མི་སུས་ཀྱང་ཐབས་གང་ཞིག་སྤྱད་ནའང་ཁྱོད་རྣམས་དེའི་གཡོ་འོག་ཏུ་མ་ཚུད༌ཅིག རྒྱུ་མཚན་ནི་ཉིན་མོ་དེ་མ་སླེབས་པའི་སྔོན༌དུ། དཀོན་མཆོག་ལ་ངོ་རྒོལ་བྱེད་པའི་དོན་དེ་འབྱུང་ངེས༌ཤིང༌། འཇིག་པའི་བུ་སྟེ་ཁྲིམས་མེད་ལུགས་མེད་བྱེད་མཁན་དེ་ཡང་ཕྱིར་མངོན་པར་འགྱུར་བ༌དང༌། 4 དེས་ལྷ་རུ་འབོད་པ་དང་དད་པའི་ཡུལ་ཐམས་ཅད་ལ་བཀག་འགོག་བྱེད་ཅིང་རང་ཉིད་དེ་རྣམས་ལས་མཆོག་གྱུར་ཏུ་བརྩི་བ་དང་། ཐ་ན་དཀོན་མཆོག་གི་མཆོད་ཁང་ནང་དུ་བསྡད་ནས་རང་ཉིད་དཀོན་མཆོག་ཡིན་ཞེས་ཀྱང་ཟེར་བར་འགྱུར་རོ།། 5 ང་རང་ཁྱོད་རྣམས་དང་མཉམ་དུ་ཡོད་དུས། ཁྱོད་རྣམས་ལ་དོན་འདི་རྣམས་སྨྲས་མྱོང་བ་ཁྱོད་ཅག་གིས་སེམས་སུ་མི་དྲན༌ནམ། 6 མི་དེ་ནི་དུས་འོས་འཚམ་ཞིག་ལ་ཕྱིར་མངོན་པར་འགྱུར་བའི༌ཕྱིར། ད་ལྟ་མི་དེ་འགོག་པའི་རྒྱུ་རྐྱེན་ཅི་ཡིན་པ་ཁྱོད་རྣམས་ཀྱིས་ཀྱང་ཤེས༌པ་ཡིན། 7 མ་གཞི་ཁྲིམས་མེད་ལུགས་མེད་ཀྱི་ལྐོག་ངན་བྱེད་འགོ་བརྩམས༌མོད། འོན་ཀྱང་ད་ལྟ་འགོག་མཁན་ཡོད་ཅིང་འགོག་མཁན་དེ་ཉིད་ཕྱིར་འདྲེན་པའི་བར་དུ་མུ་མཐུད་དུ་འགོག༌པའོ།། 8 དེ་ནས་ཁྲིམས་མེད་ལུགས་མེད་བྱེད་མཁན་ཕྱིར་མངོན་པར་འགྱུར་བ༌དང༌། གཙོ་བོས་རང་ཉིད་ཀྱི་ཞལ་ལས་ཐོན་པའི་དབུགས་ཀྱིས་ཁོ་རང་གཞོམ་པར་འགྱུར་བ༌དང༌། ཁོང་ཉིད་མངོན་སུམ་དུ་ཕེབས་ཡོང་བའི་བརྗིད་ཉམས་ཀྱིས་མི་དེ་འཇོམས་པར་མཛད་ངེས་སོ།། 9 ཁྲིམས་མེད་ལུགས་མེད་བྱེད་མཁན་དེ་ནི་བདུད་སཱ་ཏན་གྱིས་བསྐུལ་བ་བཞིན་ཡོང༌སྟེ། མཐུ་རྩལ་དང༌། གྲུབ༌རྟགས། རྫུ་འཕྲུལ་སྣ་ཚོགས་སྟོན་པ༌དང༌། 10 འཇིག་པར་འགྱུར་བའི་མི་རྣམས་ལ་མགོ་སྐོར་ངན་པ་སྣ་ཚོགས་གཏོང་བར་འགྱུར། རྒྱུ་མཚན་ནི་དེ་དག་གིས་བདེན་པ་ཉིད་ལ་དགའ་བའི་སེམས་དང་དུ་མ་བླངས་པས་དེ་རྣམས་ལ་ཐར་པ་ཐོབ་མེད་པའི་ཕྱིར༌རོ།། 11 དེ་བས་ན་དེ་རྣམས་རྫུན་ལ་ཡིད་ཆེས་པར་འགྱུར་བའི་ཕྱིར། དཀོན་མཆོག་གིས་དེ་རྣམས་ལ་འཁྲུལ་ཤེས་གནང་བར་ངེས། 12 དེ་ནི་བདེན་པ་ཉིད་ལ་དད་པ་མི་བྱེད་པར་སྤྱོད་ལམ་ངན་པར་དགའ་བ་ཐམས་ཅད་ལ་ཉེས་ཆད་གཅོད་པར་འགྱུར་བའི་ཕྱིར་ཡིན༌ནོ།།

13 གཙོ་བོས་གཅེས་པར་འཛིན་པའི་སྤུན་ཟླ༌རྣམས། ངེད་ཅག་གིས་ནམ་རྒྱུན་ཁྱོད་རྣམས་ཀྱི་ཆེད་དུ་དཀོན་མཆོག་ལ་བཀའ་དྲིན་ཞུ་འོས་སོ།། རྒྱུ་མཚན་ནི་དམ་པའི་ཐུགས་ཉིད་ཀྱིས་ཁྱོད་རྣམས་དམ་པར་མཛད་པ་དང༌། ཁྱོད་རྣམས་བདེན་པ་ཉིད་ལ་དད་པའི་སྒོ་ནས་ཐར་པ་འཐོབ་པའི་ཕྱིར། དཀོན་མཆོག་གིས་ཐོག་མ་ཉིད་ནས་ཁྱོད་རྣམས་བདམས༌པ་ཡིན། 14 ཡང་དོན་འདིའི་ཆེད་དུ་ངེད་ཅག་གིས་བསྒྲགས་པའི་འཕྲིན་བཟང་བརྒྱུད་ནས་དཀོན་མཆོག་གིས་ཁྱོད་རྣམས་ལ་ཞལ་འབོད་གནང་བ་ཡིན༌ཏེ། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་གཟི་བརྗིད་ཀྱང་ཁྱོད་རྣམས་ལ་ཐོབ་པར་འགྱུར་བའི་ཕྱིར༌རོ།། 15 དེ་བས་ན་སྤུན་ཟླ༌རྣམས། ཁྱོད་རྣམས་ཀྱིས་དད་པ་བརྟན་པོར་གྱིས༌དང༌། ངེད་ཅག་གིས་ངག་ནས་བསྒྲགས་པ་དང་འཕྲིན་ཡིག་ཏུ་བྲིས་པ་གང་ཡིན་ཡང་ཁྱོད་རྣམས་ལ་བསླབ་པའི་སྲོལ་རྒྱུན་ཐམས་ཅད་བརྟན་པོར་བསྲུང་བར༌བྱའོ།།

16 བདག་ཅག་གི་གཙོ་བོ་ཡེ་ཤུ་མཱ་ཤི་ཀ་དང༌། བདག་ཅག་ལ་གཅེས་ཤིང་ཐུགས་རྗེའི་སྒོ་ནས་མཐའ་མེད་པའི་སེམས་གསོ་དང་རེ་བ་བཟང་པོ་གནང་མཁན་དཀོན་མཆོག༌གིས། 17 ཁྱོད་རྣམས་ལ་སེམས་གསོ་མཛད་པ༌དང༌། ལས་བཟང་པོ་དང་སྨྲ་བརྗོད་ལེགས་པོ་ཐམས་ཅད་ཀྱི་ཐད་ནས་ཁྱོད་རྣམས་བརྟན་པོར་མཛད་པར༌སྨོན།