1 དཀོན་མཆོག་ཡ་ཝཱེས་འདི་སྐད་དུ། མོ་ཨབ་ཀྱིས་ཡང་ནས་ཡང་དུ་སྡིག་པ་བསགས་པས། ངས་དེ་ལ་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་ཨེ་དོམ་རྒྱལ་པོའི་རུས་པ་བསྲེགས་ནས་ཐལ་བར་བཏང་བས། 2 ངས་མོ་ཨབ་ལ་མེ་འཕངས་ནས། ཀེ་རི་ཨོད་ཀྱི་མཁར་རྫོང་རྣམས་ཁྱུར་མིད་གཏོང་བར་འགྱུར་ཞིང་ཟང་ཟིང་དང་། ངར་སྐད་དང་། དམག་དུང་གི་སྒྲ་བཅས་ཀྱི་ཁྲོད་དུ་མོ་ཨབ་རྩ་མེད་དུ་གཏོང་བར་འགྱུར་ལ། 3 ཡང་ངས་དེའི་དབང་འཛིན་མཁན་རྣམས་ཚར་དུ་གཅོད་ཅིང་། དེ་དང་ལྷན་ཅིག་ཏུ་དེའི་འགོ་དཔོན་ཐམས་ཅད་ཀྱང་འགུམས་པར་བྱའོ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། །

4 དཀོན་མཆོག་ཡ་ཝཱེས་འདི་སྐད་དུ། ཡ་ཧུ་དཱ་ཡིས་ཡང་ནས་ཡང་དུ་སྡིག་པ་བསགས་པས། ངས་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་དཀོན་མཆོག་ཡ་ཝཱེའི་བཀའ་ཁྲིམས་རྣམས་དོར་བ་དང་། ཁོང་གི་ཁྲིམས་སྲོལ་རྣམས་མ་བསྲུངས་པར་མ་ཟད། དེ་དག་གི་མེས་པོ་རྣམས་རྗེས་སུ་འབྲངས་པའི་སྐུ་འདྲ་ཡིས་ཁོ་རྣམས་ལམ་ནོར་དུ་བཅུག་པས། 5 ངས་ཡ་ཧུ་དཱ་ལ་མེ་འཕངས་ནས། ཡེ་རུ་སཱ་ལེམ་གྱི་མཁར་རྫོང་རྣམས་ཁྱུར་མིད་གཏོང་བར་འགྱུར་ཞེས་གསུངས་སོ། །

6 དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་གྱིས་ཡང་ནས་ཡང་དུ་སྡིག་པ་བསགས་པས། ངས་ཉེས་ཆད་གཅོད་པའི་བཀའ་ཕྱིར་མི་ལེན་ཏེ། ཅིའི་ཕྱིར་ཞེ་ན། དེ་ཡིས་དངུལ་གྱི་ཆེད་དུ་མི་དྲང་བདེན་བཙོངས་ཤིང་། བསིལ་ལྷམ་ཆ་གཅིག་གི་ཕྱིར་དུ་དབུལ་པོ་བཙོངས། 7 སའི་རྡུལ་ལ་རྡོག་བརྫིས་གཏོང་བ་བཞིན། དེ་དག་གིས་དབུལ་པོའི་མགོ་ལ་རྡོག་བརྫིས་བཏང་བ་དང་། མི་དཀའ་སྡུག་ཅན་གྱི་ཁེ་དབང་ཕྲོགས་ཤིང་། བུ་དང་ཕ་གཉིས་ཀྱིས་བུད་མེད་གཅིག་སྤྱད་ནས། བསམ་བཞིན་དུ་ངའི་མཚན་དམ་པ་བཙོག་པར་བཟོས། 8 དེ་དག་མཆོད་ཁྲི་རེ་རེའི་མདུན་དུ་མི་གཞན་པས་གཏའ་མར་བཞག་པའི་གོས་རྣམས་ཀྱི་སྟེང་དུ་ཉལ་ཞིང་། རང་གི་ལྷ་ཡི་ལྷ་ཁང་ནང་དུ་བཤུ་གཞོག་ལས་ཐོབ་པའི་དངུལ་གྱིས་ཉོས་པའི་རྒུན་ཆང་འཐུང་ངོ་། ། 9 ཡིན་ཡང་ངས་དེ་དག་གི་མདུན་དུ་ཨེ་མོར་པ་རྣམས་ཚར་དུ་བཅད་པ་མ་ཡིན་ནམ། ཨེ་མོར་པ་ནི་ཐང་ཤིང་བཞིན་མཐོ་ལ། བེ་ཤིང་བཞིན་བརྟན་ཡང་། ངས་དེའི་སྟེང་གི་ཤིང་ཏོག་རྣམས་རྩ་མེད་དུ་གཏོང་ཞིང་། ཤིང་སྡོང་གི་རྩད་པའང་འབྱིན་པར་འགྱུར། 10 ཨེ་མོར་པའི་ཡུལ་ཁམས་ནི་ཁྱོད་རྣམས་ལ་ནོར་སྐལ་དུ་འཐོབ་པའི་ཕྱིར་དུ། ངས་ཁྱོད་རྣམས་ཨེ་ཅིབ་ཡུལ་ནས་ཕྱིར་ཕྱུང་སྟེ། དབེན་སྟོང་དུ་ཁྲིད་ནས་ལོ་ངོ་བཞི་བཅུར་དེར་གནས་པ་མ་ཡིན་ནམ། 11 ངས་ཁྱོད་ཀྱི་བུ་རྒྱུད་ལས་ལུང་སྟོན་པ་དང་། ན་གཞོན་ལས་ན་ཟཱར་པ་རྣམས་འཕེལ་བར་བྱས། ཀྱེ་ཡེས་ར་ཨེལ་པ་རྣམས་འདི་ནི་དོན་ངོ་མ་མ་ཡིན་ནམ་ཞེས་གསུངས་ཏེ། དཀོན་མཆོག་ཡ་ཝཱེས་འདི་སྐད་གསུངས་སོ། ། 12 ཡིན་ཡང་ཁྱོད་ཚོས་ན་ཟཱར་པ་རྣམས་ལ་བཙན་གྱིས་ཆང་འཐུང་དུ་བཅུག་སྟེ། ལུང་སྟོན་པ་རྣམས་ལ་ལུང་མ་སྟོན་ཞེས་ནན་གྱིས་བསྐུལ་ཏོ། ། 13 ལྟོས་ཤིག ཚར་ཕོན་བརྩིགས་པའི་ཤིང་རྟ་གཡོ་འགུལ་བྱེད་པ་བཞིན། ངས་ཁྱོད་ཀྱི་རྐང་འོག་གི་ས་གཡོ་བར་འཇུག་ཅིང་། 14 དེ་འགུལ་སྐྱོད་ཤིན་ཏུ་མགྱོགས་ནའང་འབྲོ་མི་ཐུབ་ལ། སྟོབས་དང་ལྡན་ནའང་ནུས་པ་འདོན་མི་ཐུབ། དཔའ་བོ་ཡིན་ཡང་རང་ཉིད་སྐྱོབ་མི་ཐུབ། 15 གཞུ་འཐེན་མཁན་སར་འགྲེང་མི་ནུས་ཤིང་། རྒྱུག་མཁན་ཡང་ཐར་མི་ཐུབ་ལ། སྐྱ་མི་ཡིན་ཡང་རང་ཉིད་སྐྱོབ་མི་ཐུབ། 16 ཉིན་དེར་སྙིང་སྟོབས་ལྡན་པའི་དམག་མི་ཡང་གཅེར་བུར་འབྲོ་ངེས་ཡིན་ཞེས་དཀོན་མཆོག་ཡ་ཝཱེས་འདི་སྐད་གསུངས་སོ། །