1 ཀྱེ་ཡེས་ར་ཨེལ་པ་རྣམས། དཀོན་མཆོག་ཡ་ཝཱེས་ཨེ་ཅིབ་ཡུལ་ནས་ཕྱིར་བཏོན་པའི་ཡེས་ར་ཨེལ་གྱི་བུ་རྒྱུད་ཡོངས་ལ་རྒོལ་བའི་གསུང་སྟེ། དཀོན་མཆོག་ཡ་ཝཱེས་ཁྱོད་ཅག་ལ་རྒོལ་བའི་གསུང་ལ་ཉོན་ཅིག ཁོང་གིས་འདི་སྐད་དུ། 2 ས་གཞིའི་མི་རིགས་ཀུན་ལས་ངས་ཁྱོད་ཁོ་ན་བདམས་པས། ངས་ཁྱོད་ཀྱི་སྡིག་པ་ཡོད་ཚད་འདེད་པར་འགྱུར། 3 གྲོས་མཐུན་མེད་ན་མི་གཉིས་ཅི་ལྟར་ལྷན་དུ་འགྲོའམ། 4 སེང་གེས་རི་དྭགས་མ་ཟིན་ན། ནགས་ཚལ་དུ་ང་རོ་ཅི་ལྟར་སྒྲོག སེང་གེ་དར་མས་ཅི་ཡང་མ་ཟིན་ན། ས་ཕུག་ནང་དུ་ངར་སྐད་ཅི་ལྟར་སྒྲོག 5 གལ་ཏེ་རྒྱ་མ་བཙུགས་ན་བྱ་བྱེའུ་རྣམས་རྙི་ཡི་ནང་དུ་ལྷུང་ངམ། རྙི་ལ་ཅི་ཡང་མ་ཐོབ་ན་དེ་ས་ནས་ཡར་ལང་ངམ། 6 གྲོང་ཁྱེར་ནང་དུ་དམག་དུང་བུས་ན་མི་རྣམས་མི་འདར་རམ། གྲོང་ཁྱེར་ཞིག་ལ་ཆག་སྒོ་བྱུང་ན་དེ་ནི་དཀོན་མཆོག་ཡ་ཝཱེས་གནང་བ་མ་ཡིན་ནམ། 7 གལ་ཏེ་གཙོ་བོ་ཡ་ཝཱེས་སྔོན་ལ་ཉིད་ཀྱི་བཀོད་པ་ཁོང་གི་ཞབས་ཕྱི་སྟེ་ལུང་སྟོན་པ་རྣམས་ལ་མ་མངོན་ན། དེས་འཕྲིན་ལས་གང་ཡང་མཛད་པར་མི་འགྱུར་རོ། ། 8 སེང་གེས་ང་རོ་བསྒྲགས་ན་མི་འཇིགས་པ་སུ་ཡོད་དམ། གཙོ་བོ་ཡ་ཝཱེས་བཀའ་གནང་བ་ཡིན་ན་ལུང་མི་སྟོན་པ་སུ་ཡོད་དམ།

9 ཨ་སི་དོད་དང་ཨེ་ཅིབ་ཀྱི་མཁར་རྫོང་ནང་དུ་བཀའ་སྒྲོགས་ལ་འདི་ལྟར་སྨྲོས་ཤིག ཁྱོད་རྣམས་སཱ་མར་ཡའི་རི་བོར་འདུས་ཏེ་གྲོང་ཁྱེར་ནང་དུ་ཡོད་པའི་ཟིང་སློང་དང་གཉའ་གནོན་ལ་ལྟོས་ཤིག 10 ཅིའི་ཕྱིར་ཞེ་ན། རང་གི་མཁར་རྫོང་ནང་དུ་རྩུབ་སྤྱོད་དང་བརྙས་བཅོས་གཉའ་གནོན་མང་ཡང་། མི་དེ་དག་གིས་དྲང་བདེན་གྱི་དོན་ཅི་ལྟར་སྤྱོད་པ་མི་ཤེས་ཞེས་དཀོན་མཆོག་ཡ་ཝཱེས་འདི་སྐད་གསུངས། 11 དེ་བས་གཙོ་བོ་ཡ་ཝཱེས་འདི་སྐད་དུ། ཕ་རོལ་པོས་ཡུལ་དེའི་ཕྱོགས་བཞི་ནས་བསྐོར་ཏེ། ཁྱོད་ཀྱི་སྟོབས་ཤུགས་ཉམས་སུ་འཇུག་ཅིང་། ཁྱོད་ཀྱི་མཁར་རྫོང་རྣམས་ཀྱང་འཕྲོག་པར་འགྱུར་ཞེས་གསུངས། 12 དཀོན་མཆོག་ཡ་ཝཱེས་འདི་སྐད་དུ། ལུག་རྫི་ཡིས་སེང་གེའི་ཁ་ནས་ལུག་གི་རྐང་ལག་གཉིས་སམ་རྣ་བའི་དུམ་བུ་གཅིག་འཕྲོག་པ་བཞིན་དུ། སཱ་མར་ཡ་ཡུལ་དུ་སྡོད་པའི་ཡེས་ར་ཨེལ་པ་རྣམས་ལས་ཀྱང་མལ་ཁྲིའི་ཟུར་དང་། ཡང་ན་མེ་ཏོག་འཚེམ་དྲུབ་ཅན་གྱི་གདན་བཏིངས་ཡོད་པའི་གཟིམ་ཁྲིའི་སྟེང་དུ་ཉལ་བ་རྣམས་ཐར་བའང་དེ་ཙམ་ཡིན་ནོ་ཞེས་གསུངས་སོ། ། 13 ཁྱོད་ཅག་གིས་ཉོན་དང་། ཡ་ཀོབ་ཀྱི་ཁྱིམ་རྒྱུད་ལ་ཉེན་བརྡ་ཐོངས་ཤིག་ཅེས་དཔུང་ཚོགས་ཀུན་གྱི་དཀོན་མཆོག་སྟེ་གཙོ་བོ་ཡ་ཝཱེས་གསུངས་སོ། ། 14 ངས་ཡེས་ར་ཨེལ་གྱི་སྡིག་པ་འདེད་པའི་དུས་སུ། པེད་ཨེལ་གྱི་མཆོད་ཁྲི་རྣམས་ལའང་ཉེས་ཆད་གཅོད་ཅིང་། མཆོད་ཁྲིའི་རུ་ཐུར་ *འདིར་མཆོད་ཁྲིའི་རུ་ཐུར་ཞེས་པ་ནི་མཆོད་ཁྲིའི་ཟུར་བཞི་པོར་ཡོད་པའི་རུ་ཐུར་རྣམས་ཡིན་ཏེ། མི་རྣམས་འཐབ་རྒོལ་ལས་ཐར་བར་མཆོད་ཁྲིའི་རྩར་ཡོང་སྟེ་མཆོད་ཁྲིའི་རུ་ཐུར་རྣམས་འཛིན་པར་གོ་བ་ཡིན། རྣམས་བཅག་སྟེ་སར་ལྷུང་བར་འགྱུར་རོ། ། 15 ཡང་ངས་དགུན་ཁ་དང་དབྱར་ཁའི་ཁང་པ་རྣམས་བཤིག་སྟེ། བ་སོས་བརྒྱན་པའི་ཁང་པ་རྣམས་ཀྱང་རྩ་མེད་དུ་གཏོང་ཞིང་། བརྗིད་ཉམས་ཆེ་བའི་ཐོག་བརྩེགས་རྣམས་ཀྱང་མེད་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །