1 དེ་ཡང་ཁྲིམས་དཔོན་རྣམས་ཀྱིས་སྲིད་སྐྱོང་བའི་དུས་སུ་ཡུལ་དེར་མུ་གེ་བྱུང་ཞིང་། ཡ་ཧུ་དཱ་ས་ཆའི་པེད་ལེ་ཧེམ་གྱི་མི་ཞིག་གིས་རང་གི་ཆུང་མ་དང་བུ་གཉིས་ཁྲིད་ནས་མོ་ཨབ་ཡུལ་དུ་རེ་ཞིག་སྡོད་པར་ཕྱིན་ཏོ། ། 2 མི་དེའི་མིང་ལ་ཨེ་ལི་མེ་ལེག་དང་ཆུང་མའི་མིང་ལ་ནཱ་ཨོ་མུ་ཞེས་ཟེར་བ་དང་། ཁོའི་བུ་གཉིས་ལས་གཅིག་གི་མིང་ལ་མཱ་ལིན་དང་ཅིག་ཤོས་ཀྱི་མིང་ལ་ཀིལ་ཡོན་ཟེར་རོ། །ཁོ་རྣམས་ནི་ཡ་ཧུ་དཱ་ས་ཆའི་པེད་ལེ་ཧེམ་གྱི་ཨེབ་རཱད་པ་ཡིན་ལ། མོ་ཨབ་ཡུལ་དུ་སོང་ནས་དེར་གཞིས་ཆགས་སོ། །

3 ཕྱིས་སུ་ནཱ་ཨོ་མུའི་སྐྱེས་པ་ཨེ་ལི་མེ་ལེག་ཚེ་ལས་འདས་ཤིང་ཁོ་མོ་དང་བུ་གཉིས་ལུས་སོ། ། 4 བུ་དེ་གཉིས་ཀྱིས་མོ་ཨབ་རིགས་ཀྱི་བུད་མེད་རེ་ཆུང་མར་བླངས་པ་དང་། གཅིག་གི་མིང་ལ་ཨོར་ཕཱ་དང་ཅིག་ཤོས་ཀྱི་མིང་ལ་རུ་ཐི་ཞེས་ཟེར་རོ། །ཁོ་རྣམས་ཡུལ་དེར་མི་ལོ་བཅུ་ཙམ་ལ་གནས་པའི་རྗེས་སུ། 5 མཱ་ལིན་དང་ཀིལ་ཡོན་གཉིས་ཀྱང་ཚེ་ལས་འདས། ནཱ་ཨོ་མུ་ནི་སྐྱེས་པ་མེད་ལ་བུ་གཉིས་ཀྱང་མེད་པར་གཅིག་པུར་ལུས་སོ། །

6 དཀོན་མཆོག་ཡ་ཝཱེས་རང་གི་འབངས་མི་ལ་གཟིགས་སྐྱོང་མཛད་ཅིང་། དེ་དག་ལ་ཁ་ཟས་སྦྱིན་པའི་གནས་ཚུལ་ནི་ནཱ་ཨོ་མུས་མོ་ཨབ་ཡུལ་ནས་ཐོས་པ་དང་། ནཱ་ཨོ་མུ་དང་ཁོ་མོའི་མནའ་མ་གཉིས་ཀྱིས་མོ་ཨབ་ཡུལ་ནས་རང་ཡུལ་དུ་ཕྱིར་ལོག་པར་སྟ་གོན་བྱས། 7 དེ་རྣམས་རང་ཉིད་སྡོད་སའི་ཡུལ་དང་ཁ་བྲལ་ནས་ཡ་ཧུ་དཱའི་ཡུལ་དུ་ཆས་སོ། །

8 དེ་ནས་ནཱ་ཨོ་མུས་རང་གི་མནའ་མ་གཉིས་ལ་འདི་ལྟར་སྨྲས་པ་སྟེ། ཁྱོད་གཉིས་ཀ་རང་རང་གི་མ་ཡི་ཁྱིམ་དུ་ཕྱིར་སོང་ཞིག ཁྱོད་གཉིས་ཀྱིས་གཤིན་པོ་རྣམས་དང་ང་རང་ལ་བཟང་པོ་བྱས་པ་བཞིན་དུ། དཀོན་མཆོག་ཡ་ཝཱེས་ཀྱང་ཁྱོད་གཉིས་དྲིན་གྱིས་སྐྱོང་ཞིང་། 9 རང་རང་གི་སྐྱེས་པ་གསར་པའི་ཁྱིམ་དུ་བདེ་བ་ཉམས་སུ་མྱོང་བར་མཛད་པར་ཤོག་ཅེས་པ་དང་མནའ་མ་གཉིས་ལ་འོ་བྱས་པ་ལ། དེ་གཉིས་ཀྱིས་སྐད་བརྒྱབ་ནས་ངུས་ཤིང་ན་རེ། 10 ངེད་གཉིས་ཁྱེད་དང་ལྷན་ཅིག་ཁྱེད་ཀྱི་རིགས་རྒྱུད་ཀྱི་རྩར་ཕྱིར་ལོག་རྒྱུ་ཡིན་ཞེས་ཞུས་སོ། ། 11 འོན་ཀྱང་ནཱ་ཨོ་མུས་འདི་ལྟར་སྨྲས་པ་སྟེ། བདག་གི་བུ་མོ་གཉིས། རང་ཡུལ་དུ་ཕྱིར་ལོག་ཅིག ཁྱོད་གཉིས་ཅིའི་ཕྱིར་བདག་དང་མཉམ་དུ་འགྲོའམ། བདག་གི་མངལ་ནས་ད་དུང་བུ་སྐྱེས་ཏེ་ཁྱོད་གཉིས་ཀྱི་སྐྱེས་པ་བྱེད་ཐུབ་བམ། 12 བདག་གི་བུ་མོ་གཉིས། རང་ཡུལ་དུ་ཕྱིར་ལོག་ཅིག བདག་ནི་ལོ་ན་ཤིན་ཏུ་རྒས་པས་སྐྱེས་པ་གཞན་ཞིག་ཡོད་མི་སྲིད་ལ། གལ་ཏེ་ངས་རང་ཉིད་ལ་རེ་བ་ཡོད་པར་སྙམ་ནས་དོ་དགོང་སྐྱེས་པ་ཞིག་ཡོང་སྟེ་བུ་སྐྱེས་པའི་དབང་དུ་བཏང་ནའང་། 13 ཁྱོད་གཉིས་ཀྱིས་ཁོ་གཉིས་ནར་སོན་པའི་བར་དུ་སྒུག་པར་བྱའམ། གཞན་ལ་གཉེན་སྒྲིག་མི་བྱེད་པར་སྒུག་རྒྱུ་ཡིན་ནམ། བདག་གི་བུ་མོ་གཉིས་དེ་ལྟར་མ་བྱེད་ཅིག དཀོན་མཆོག་ཡ་ཝཱེའི་ཕྱག་གིས་ང་རང་ལ་རྒོལ་བས་ཁྱོད་གཉིས་ལས་བདག་ལ་དཀའ་སྡུག་ཤིན་ཏུ་ཆེའོ་ཞེས་པ་ན། 14 མནའ་མ་གཉིས་ཀ་ཡང་བསྐྱར་སྐད་བརྒྱབ་ནས་ངུས། ཨོར་ཕཱ་ཡིས་སྒྱུག་མོ་ལ་འོ་བྱས་ནས་གྱེས་མཇལ་ཞུས། འོན་ཀྱང་རུ་ཐི་ནི་ནཱ་ཨོ་མུ་ལ་འཐམས་སོ། །

15 སྐབས་དེར་ནཱ་ཨོ་མུ་ཡིས་འདི་ལྟར། ལྟོས་དང་། ཁྱོད་ཀྱི་སྲུ་མོ་ *འདིར་སྲུ་མོ་ཞེས་པ་ནི་ཕུ་བོའི་ཆུང་མར་འཇུག་སྟེ། ཨོར་ཕཱ་དང་རུ་ཐི་གཉིས་ནི་ནཱ་ཨོ་མུ་ཡི་བུ་གཉིས་ཀྱི་ཆུང་མ་ཡིན་ལ། ཨོར་ཕཱ་ནི་རུ་ཐི་ཡི་སྐྱེས་པའི་ཕུ་བོའི་ཆུང་མ་ཡིན། ཕྱིར་རང་གི་མི་རྣམས་དང་རང་གི་ལྷ་རྣམས་ཀྱི་རྩར་ཕྱིན་པས། ཁྱོད་ཀྱང་ཁོ་མོ་དང་མཉམ་དུ་ཕྱིར་ལོག་ཅིག་ཅེས་སྨྲས་སོ། ། 16 འོན་ཀྱང་རུ་ཐི་ཡིས་དེའི་ལན་དུ། ཁྱེད་དང་ཁ་བྲལ་ཏེ་ཕྱིར་ལོག་ཅིག་ཅེས་བདག་ལ་སྐུལ་མ་མི་གནང་བར་ཞུའོ། །རྒྱུ་མཚན་ཁྱེད་རང་གང་དུ་སོང་ནའང་། །ང་ཡང་དེ་རུ་འགྲོ་རྒྱུ་ཡིན་པ་དང་། །ཁྱེད་རང་འདུག་སར་ང་ཡང་སྡོད་རྒྱུ་ཡིན། །ཁྱེད་ཀྱི་མི་རིགས་ང་ཡི་མི་རིགས་ཡིན། །ཁྱེད་ཀྱི་དཀོན་མཆོག་ང་ཡི་དཀོན་མཆོག་ལགས། ། 17 ཁྱེད་གང་དུ་གྲོངས་ན་ང་ཡང་དེར་འཆི་བ་དང་དུར་ལ་སྦ་བར་བྱའོ། །གལ་ཏེ་འཆི་བ་ལས་གཞན་གང་དང་ཅི་ཞིག་གིས་ང་དང་ཁྱེད་གཉིས་ཁ་བཀར་ན། དཀོན་མཆོག་ཡ་ཝཱེས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་ཞུས་སོ། ། 18 རུ་ཐི་ཡིས་ནཱ་ཨོ་མུ་དང་མཉམ་དུ་འགྲོ་བར་སེམས་ཐག་བཅད་པ་ནཱ་ཨོ་མུས་ཤེས་ཏེ་ཁོ་མོར་སྨྲ་མཚམས་བཞག་གོ །

19 དེ་ནས་བུད་མེད་དེ་གཉིས་སོང་སོང་སྟེ་པེད་ལེ་ཧེམ་དུ་སླེབས་པ་དང་གྲོང་རྡལ་གྱི་མི་ཐམས་ཅད་ཧ་ལས་ཤིང་། བུད་མེད་རྣམས་ཀྱིས་འདི་ནི་ནཱ་ཨོ་མུ་ཡིན་སྲིད་དམ་ཞེས་སྨྲས་སོ། ། 20 ནཱ་ཨོ་མུས་ཁོ་རྣམས་ལ་འདི་ལྟར། ང་ལ་ནཱ་ཨོ་མུ་ཞེས་མ་འབོད་ཅིག ང་ལ་མཱ་རཱ་ †འདིར་ནཱ་ཨོ་མུ་ཞེས་པ་ནི་བདེ་སྐྱིད་ཀྱི་དོན་དང་མཱ་རཱ་ཞེས་པ་ནི་ཁ་ཏིག་གི་དོན་ལ་འཇུགཞེས་བོས་ཤིག ཅི་ལ་ཟེར་ན། ཀུན་དབང་དཀོན་མཆོག་གིས་ང་རང་དཀའ་སྡུག་ཆེན་པོར་གཏད་པས་སོ། ། 21 བདག་ནི་བཟའ་སྐྱིད་ཀྱི་ངང་ནས་ཕྱི་རུ་སོང་བ་ཡིན་མོད། འོན་ཀྱང་དཀོན་མཆོག་ཡ་ཝཱེས་ང་རང་སྟོང་པར་ཕྱིར་ལོག་ཏུ་བཅུག དཀོན་མཆོག་ཡ་ཝཱེས་ང་ལ་མནར་གཅོད་མཛད་ཅིང་ཀུན་དབང་ཁོང་གིས་ང་རང་སྡུག་ལ་སྦྱར་བས། ཁྱོད་རྣམས་ཀྱིས་ཅིའི་ཕྱིར་ད་དུང་བདག་ལ་ནཱ་ཨོ་མུ་ཞེས་འབོད་དམ་ཞེས་སྨྲས་སོ། ། 22 དེ་ལྟར་ནཱ་ཨོ་མུ་རང་གི་མནའ་མ་སྟེ་མོ་ཨབ་ཀྱི་རུ་ཐི་དང་མཉམ་དུ་ཕྱིར་པེད་ལེ་ཧེམ་དུ་སླེབས་ཤིང་། དེ་ནི་ནས་འབྲེག་འགོ་ཚུགས་པའི་དུས་ཡིན་ནོ། །