1 ང་ལ་གསུང་གནང་མཁན་ཕོ་ཉ་དེ་ཕྱིར་འོངས་ནས་ང་རང་སད་དུ་བཅུག་སྟེ། ང་ནི་མི་གཞན་གྱིས་གཉིད་ལས་སད་དུ་བཅུག་པའི་མི་དང་འདྲ་ཞིང་། 2 དེས་ང་ལ་འདི་སྐད་དུ། ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར་ངས་དེའི་ལན་དུ། ངས་གསེར་བཙོ་མའི་སྒྲོན་སྟེགས་ཤིག་མཐོང་ཞིང་། དེའི་རྩེ་མོར་ཏིང་ཕོར་ཞིག་ཡོད་ལ། ད་དུང་སྒྲོན་མེ་བདུན་ཡོད་པ་དང་། རྩེ་མོའི་སྒྲོན་མེ་རེ་རེར་སྡོང་རས་འཛུགས་ས་བདུན་རེ་ཡོད་ཅིང་། 3 ཏིང་ཕོར་གྱི་འགྲམ་དུ་སྐྱུ་རུ་ཤིང་གཉིས་ཡོད་དེ། གཅིག་ནི་གཡས་ཕྱོགས་སུ་ཡོད་ཅིང་། ཅིག་ཤོས་ནི་གཡོན་ཕྱོགས་སུ་ཡོད་ཅེས་ཞུས་པ་དང་། 4 ཡང་ངས་བདག་ལ་གསུང་གནང་བའི་ཕོ་ཉ་དེ་ལ་འདི་ལྟར། ང་ཡི་ཇོ་བོ་ལགས། འདི་དག་ཅི་ཡིན་ནམ་ཞེས་ཞུས་པ་ན། 5 ང་ལ་གསུང་གནང་བའི་ཕོ་ཉ་དེས་ལན་དུ་འདི་སྐད་དུ། ཁྱོད་ཀྱིས་འདི་རྣམས་ཅི་ཡིན་མི་ཤེས་སམ་ཞེས་གསུངས་པ་ན། བདག་གིས། ང་ཡི་ཇོ་བོ་ལགས་ངས་མི་ཤེས་སོ་ཞེས་ཞུས། 6 དེ་ནས་ཁོང་གིས་ང་ལ་འདི་སྐད་དུ། འདི་ནི་དཀོན་མཆོག་ཡ་ཝཱེས་ཟེ་རུ་པཱ་པེལ་ལ་གསུངས་པའི་བཀའ་ཡིན་ཏེ། དབང་ཤུགས་ལ་བརྟེན་པ་མ་ཡིན་ལ། ནུས་པར་བརྟེན་པའང་མ་ཡིན་ཏེ། ངའི་སེམས་ཉིད་ལ་བརྟེན་པ་ཡིན་ནོ་ཞེས་པའོ། །དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་པ་རེད། 7 ཀྱེ་རི་རབ་ཁྱོད་ནི་སུ་ཞིག་ཡིན་ནམ། ཟེ་རུ་པཱ་པེལ་གྱི་མདུན་དུ་ཁྱོད་ནི་ཐང་བདེ་རུ་འགྱུར་བ་དང་། ཁོང་གིས་སྟེང་གི་རྡོ་ལེབ་དེ་བཞག་ནས་དགའ་སྤྲོ་དང་བཅས་སྐད་ཆེན་པོས་འདི་ལྟར། དཀོན་མཆོག་གིས་མཆོད་ཁང་འདི་ལ་ཐུགས་རྗེ་གནང་བར་ཤོག དཀོན་མཆོག་གིས་མཆོད་ཁང་འདི་ལ་ཐུགས་རྗེ་གནང་བར་ཤོག་ཅེས་བསྒྲག་པར་འགྱུར་ཞེས་གསུངས་སོ། ། 8 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ། 9 ཟེ་རུ་པཱ་པེལ་གྱི་ཕྱག་གིས་མཆོད་ཁང་འདིའི་རྩིག་གདན་བཏིངས་པ་དང་། ཁོང་གི་ཕྱག་གིས་ལས་འདི་འགྲུབ་ཏུ་ཡང་འཇུག་ངེས་ཡིན། དེ་ནས་ཁྱོད་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ང་རང་ཁྱོད་ཀྱི་གམ་དུ་མངགས་པ་རྟོགས་པར་འགྱུར། 10 སུ་ཞིག་གིས་ཉིན་མོ་འདི་ལ་མཐོང་ཆུང་བྱས་ནས་སྤྱོད་པའི་ལས་རྣམས་དོན་ཆུང་དུ་བསམ་མམ། དེ་དག་གིས་ཟེ་རུ་པཱ་པེལ་གྱི་ཕྱག་ཏུ་དཔྱང་སྐུད་ཡོད་པ་མཐོང་ནས་དགའ་ཞིང་མགུ་བར་འགྱུར་ཞེས་གསུངས་པ་དང་། དེ་ནི་དཀོན་མཆོག་ཡ་ཝཱེའི་སྤྱན་བདུན་པོས་ས་གཞི་ཡོངས་ལ་གཟིགས་ཞིབ་བྱེད་པ་ཡིན་ནོ། ། 11 དེ་ནས་ཡང་ངས་ཕོ་ཉ་དེ་ལ་འདི་ལྟར། སྒྲོན་སྟེགས་འདིའི་གཡས་གཡོན་གཉིས་སུ་ཡོད་པའི་སྐྱུ་རུ་ཤིང་འདི་གཉིས་ཀ་ཅི་ཡིན་ནམ་ཞེས་ཞུས་པ་དང་། 12 ངས་ཡང་བསྐྱར་ཕོ་ཉ་དེ་ལ་འདི་ལྟར། གསེར་མདོག་གི་སྣུམ་བཞུར་བའི་གསེར་གྱི་སྦུ་གུ་གཉིས་ཀྱི་ལོགས་སུ་སྐྱུ་རུ་ཤིང་གི་ཡལ་ག་གཉིས་ཡོད་པ་འདིའི་དོན་ཅི་ཡིན་ནམ་ཞེས་ཞུས་པ་ན། 13 ཁོང་གིས་ང་ལ་འདི་སྐད་དུ། ཁྱོད་ཀྱིས་འདི་རྣམས་ཅི་ཡིན་མི་ཤེས་སམ་ཞེས་གསུངས་པ་དང་། བདག་གིས། ང་ཡི་ཇོ་བོ་ལགས་ངས་མི་ཤེས་སོ་ཞེས་ཞུས། 14 དེ་ནས་ཁོང་གིས་འདི་སྐད་དུ། འདི་ནི་སྣུམ་གྱིས་བྱུགས་པའི་མི་གཉིས་ཡིན་ཏེ། ས་གཞི་ཡོངས་ཀྱི་བདག་པོའི་དྲུང་དུ་འགྲེངས་ནས་ཁོང་ལ་ཞབས་ཏོག་སྒྲུབ་མཁན་ཡིན་ནོ་ཞེས་གསུངས་སོ། །