5
Lua Nɛ́ náaikɛa
Gbɛ̃́ pↄ́ Yesu náai vĩ Mɛsii ũ, Lua mɛ́ ade ì. Gbɛ̃́ pↄ́ ye dei ye nɛ́iɛ lↄ. Tó wá ye Luazi mɛ́ wá yã́ pↄ́ a dìlɛↄ kũa, beewa wá dↄ̃ kɛ́ wá ye Lua nɛ́ↄzi. Asa yea Luazi mɛ́ yã́ pↄ́ a dìlɛↄ kũa ũ.* Zãa 14.15 Yã́ pↄ́ a dìlɛpiↄ zĩ'ũ sↄ̃o, Mat 11.30 asa gbɛ̃́ pↄ́ Lua aà ì ì zĩble dṹniawaɛ. Wá luanaaikɛa mɛ́ ì to wà zĩble dṹniawa. Démɛ ì zĩble dṹniawai? Gbɛ̃́ pↄ́ sì Yesuá Lua Nɛ́ɛ bàasio.
Yesu Kilisipi mɛ́ gbɛ̃́ pↄ́ mↄ̀ à da'ilɛkɛ̀, aà au bↄ̀lɛ ũ. I kɛ da'ilɛɛ adoo, à da'ilɛkɛ̀, aà au bↄ̀lɛ lↄ. Lua Nisĩna mɛ́ aà seelade ũ, asa ↄ̃mɛ sĩande ũ. Seelaↄ ku àaↄ̃ɛ: Lua Nisĩna ń ípio ń aupio, mɛ́ an àaↄ̃ píi an yã́ doũɛ. Lá wi gbɛ̃nazĩna seeladekɛ sí, Lua seeladekɛ dɛ beea, asa Lua yã́pi ò a Nɛ́ yã́ musuɛ. 10 Gbɛ̃́ pↄ́ Lua Nɛ́ náai vĩ seelapi vĩ a sↄ̃ guu. Gbɛ̃́ pↄ́ i Lua yã́ sio, ade Luapi dìlɛ ɛɛde ũɛ, asa i yã́ pↄ́ Lua ò a Nɛ́ musu sio. 11 Yã́ pↄ́ a òn kɛ: Lua wá gbá wɛ̃ni láasai, mɛ́ wɛ̃nipi ku aà Nɛ́ kĩ́iɛ. 12 Gbɛ̃́ pↄ́ Lua Nɛ́ vĩ wɛ̃ni láasai vĩ. Gbɛ̃́ pↄ́ Nɛ́pi vĩo wɛ̃nipi vĩo. Zãa 3.36
13 Ma yã́ beeↄ òɛ́, á gbɛ̃́ pↄ́ álɛ Lua Nɛ́ náaikɛↄ, kɛ́ àↄ dↄ̃ á wɛ̃ni láasai vĩ. 14 Lá wá sↄ̃ ìↄ dilɛa Lua aɛn kɛ: Tó wa pↄ́ wabikɛ̀wà lá a yeiwa, ì wá yãmaɛ. 15 Lá wá dↄ̃ ì wá wabikɛa ma, wá dↄ̃ kɛ́ wa pↄ́ pↄ́ wa a wabikɛ̀wà è kↄ̀.
16 Tó gbɛ̃́ a gbɛ̃́dee è, àlɛ duuna pↄ́ lí ń kaalɛo kɛ, aà wabikɛɛ̀, Lua i aà gba wɛ̃ni. Duuna pↄ́ lí ń kaalɛo má ò. Duuna pↄ́ ì ń kaalɛ kú, i kɛ bee má ò aà a wabikɛo. 17 Yãvãikɛa píiá duunaɛ, ãma duuna pↄ́ lí ń kaalɛo ku.
18 Wá dↄ̃ kɛ́ gbɛ̃́ pↄ́ Lua aà ì líↄ tɛ duunawao, asa Lua Nɛ́ ì aà dↄ̃́a, Setãu lí fↄ̃ ↄkã̀wào. 19 Wá dↄ̃ Lua gbɛ̃́ↄn wá ũ, mɛ́ dṹnia bṹu kú Setãu ↄzĩɛ. 20 Wá dↄ̃ kɛ́ Lua Nɛ́ mↄ̀, ↄ̃ à wá wɛ́ kɛ̃̀, kɛ́ wà e Sĩande dↄ̃. Wá kú Sĩandepi guu ń aà Nɛ́ Yesu Kilisio. Ɔ̃mɛ Lua sĩandepi ũ. Ɔ̃mɛ wɛ̃ni láasai ũ.
21 Ma nɛ́ↄ, à laaika dii ɛgɛnaↄzi.

*5:3 Zãa 14.15

5:3 Mat 11.30

5:12 Zãa 3.36