Bibeli Luayãtaalá 1 Timↄtee 2

Lousisia

1 Too, gĩa sɛ̃́ia málɛ lɛdama à wabikɛ gbɛ̃́piiɛ, à zɛ́ gbɛanɛ́, à kulɛkɛnɛ́ Luaɛ ń sáaukpaao. 2 À wabikɛ kíaↄnɛ ń gbãadeↄ píi, kɛ́ wà e wàↄ ku aafia yãkelesai luayãmanaↄ ũ, wá kua iↄ gbia. 3 Bee mɛ́ maa, ì ka Lua wá Suabanagu. 4 A ye gbɛ̃́pii suaba, aai sĩana dↄ̃. 5 Asa Lua mɛ̀ndoɛ, mɛ́ kↄ́ↄ kú mɛ̀ndo Lua ń gbɛ̃nazĩnaↄ zãnguo, ↄ̃n gbɛ̃nazĩna Kilisi Yesu ũ.* 6 À azĩa kpà gbɛ̃́pii fĩabobↄ ũ a gↄↄwa, Lua pↄeãpi seela ũ. 7 Ayãmɛto Lua ma dilɛ a kpàwakɛna ũ, a zĩna ũ, mà a zɛ́ sĩande da buipãleↄnɛ.† Sĩana málɛ o, i kɛ ɛɛ no.

8 Má ye gↄ̃ɛↄ lousisi gu ń guo píi, aa ↄsɛ musu‡ gbãsĩsai, pↄkũma ń lɛkpaao sai. 9 Má ye lↄ nↄɛↄ ńzĩa kɛkɛ a zɛ́wa yↄ̃̀ↄsai zĩamↄnɛ sai. I kɛ ń mì yↄ̃̀ↄde tãao ge vua ń òso nↄamblebↄↄ ge zwã̀a ↄdeↄ no.§ 10 Aa ńzĩa kɛkɛ ń maakɛao, lá a maa nↄɛ lousisinaↄ kɛwa. 11 Nↄɛↄ yãdada kílikili, aa misiilɛ yã́pii musu. 12 Mili we nↄɛↄ yãdàda gↄ̃ɛↄnɛ ge aaↄ iko vĩmáo, sema aaↄ ku kílikili. 13 Asa Adamu ↄ̃ Lua kɛ̀ sɛ̃́ia, a gbɛa Ɛva.* 14 I kɛ Adamu wa sã̀são, nↄɛ wa sã̀sã, à sì duunau.† 15 Tó nↄɛ wɛtã̀ ń luanaaikɛao ń yea gbɛ̃́ↄzio ń kuaadoakɛo zĩamↄnɛ sai, ali nɛ'i aafia.

*2:5 Zĩn 4.12

†2:7 2Tim 1.11

‡2:8 Bↄa 9.29

§2:9 1Piɛ 3.3

*2:13 Daa 2.7, 21-22

†2:14 Daa 3.1-6