Bibeli Luayãtaalá Amↄsi 3

3

1 Á Isaili bui pↄ́ ma á bↄ́lɛ Egipi,

à swã́kpa à yã́ pↄ́ ma mɛ̀ a á le ma.

2 Dṹnia buiↄ guu píi ámɛ ma á sɛ́.

A yã́i má vãi pↄ́ á kɛ̀ wíɛ́ á musu.

Amↄsi ãnabikɛkɛa bↄ̀ Dii kĩ́iɛ

3 Gbɛ̃ↄn plaↄ ìↄ tɛkↄ̃i kↄ̃yãmasaia?

4 Nↄ̀ↄmusu ì pũna dào guu pↄblea esaie?

Nↄ̀ↄkusi ì pala a tòou nↄ̀ↄkũsaie?

5 Tó bãe i zu fíiuo,

a e à aà kũe?

Tó ba i e pↄ́ kũ̀o,

a bilɛe?

6 Tó wà zĩ̀gãalɛ̀ wɛ̃́lɛu,

sↄ̃ lí kɛ̃́ gbɛ̃́ↄguo lé?

Tó músi gɛ̃̀ wɛ̃́lɛu,

Dii mɛ́ tòo lò?

7 Dii Lua lí yã́ pↄ́ a zɛòe kɛ

oa a zↄ̀blena ãnabiↄnɛ saio.

8 Nↄ̀ↄmusu pũ̀na,

dé vĩa a gí kṹii?

Dé Dii Lua a yã'oɛ̀,

à gí a kpàwakɛii?

Yã́ pↄ́ a Isailiↄ le

9 À kpàwakɛ Asedoda kibɛdeↄnɛ

ń Egipi kibɛdeↄ à onɛ́,

aa kãaa Samali gbɛ̀sĩsĩↄ pↄlɛu,

aai gili zↄ̃ↄ pↄ́ gɛ̃̀u e

ń gbãa pↄ́ wàlɛ mↄ́ a gbɛ̃́ↄnɛo.

10 Ma Dii ma mɛ̀,

gbãadeↄ yãkɛa a dↄ̀ↄwa dↄ̃o.

Aaì gbɛ̃́ↄ wɛtã aa ń taiinkɛ,

aaì ń àizɛɛↄ naaa aa taò ń bɛ.

11 Bee yã́i ma Dii Lua ma mɛ̀,

ibɛɛↄ mↄ lia á bùsuzi,

aa á gbãa midɛ,

aai á kibɛ pↄ́ↄ sɛ́lɛ.

12 Ma Dii ma mɛ̀,

lá sãdãna ì a sã gbá miↄna

ge a swã́ miↄna bↄ nↄ̀ↄmusu lɛ́zĩ,

màa Isaili pↄ́ kú Samaliↄ bↄ kaso,

gbɛ̃́ pↄ́ zↄ̃lɛ ń lii bɛ́lɛbɛlɛwapiↄ.

13 Ma Dii Lua Zĩgↄ̃de ma mɛ̀,

à swã́kpa à ma,

í Yakↄbu buiↄ gbaò laai.

14 Tó málɛ Isailiↄ tàae wínɛ́ ń musu,

má sa'okĩi pↄ́ kú Bɛtɛliↄ kↄ́ba zↄ̃zↄ̃ mà kwɛ tↄↄlɛ,

mí sa'okĩipiↄ dúuzↄ̃.

15 Má á guantɛ̃mblekpɛↄ

ń á ĩ́ampuublekpɛↄ wíwiɛ,

má kpɛ́ pↄ́ a zãblèmá

ń wesa swaaopiↄ daaĩɛ,

mí a kpɛ́ zↄ̃ↄↄ gboo píi.

Ma Dii mámɛ má ò.