Bibeli Luayãtaalá Ɛbɛluↄ 3

Yesu dɛ Mↄizila

1 Bee yã́i ma gbɛ̃́ↄ, á gbɛ̃́ pↄ́ Lua á sisi a mↄ aà kĩ́iↄ, à làasookɛ Yesu pↄ́ Lua aà zĩ̀ wá lousisizɛ Sa'onkia ũwa. 2 A náai vĩ Lua a dìlɛnaɛ, lá Mↄizi kuò Lua uawa.* 3 Lá uakpana bɛɛɛ ìↄ dɛ uaa, màa Yesu gawi zↄ̃ↄ dɛ Mↄizi pↄ́a. 4 Ua píi a kpana vĩɛ, mɛ́ pↄ́pii Kalɛnan Lua ũ. 5 Mↄizi náai vĩ Lua ua zĩkɛna ũ yã́ pↄ́ a mↄ seela ũ. 6 Kilisi sↄ̃, uabelepi nɛ́ɛ. Luapi a ua nàɛ̀ aà ↄzĩɛ. Wámɛ wá uapi ũ, tó wá pↄ́ pↄ́ wá wɛ́ dↄi yã́ kũa ń sↄ̃o dilɛa ń pↄnao.

Lua gbɛ̃́ↄ kã́mabokĩi

7 A yã́i lá Lua Nisĩna òwa,

tó a Lua lↄↄ mà gbã,

8 ásu swã́gbãakɛ lá á deziↄ kɛ̀ aa ma yↄ̃

gↄↄ pↄ́ aa bↄ̀ ma kpɛ guwaiwaiuwao.

9 Baa kɛ́ aa ma yãkɛaↄ è wɛ̃̀ bla,

aa ma yↄ̃ we, aa ma gbãa lɛgwà.

10 Ɔ̃ ma pↄ pà gbɛ̃́piↄzi,

ma mɛ̀ aaìↄ pãalɛmɛɛ gↄↄpiiɛ,

aa ma yã́ kũao.

11 Ɔ̃ má ò ń mazĩao ń pↄfɛ̃o ma mɛ̀,

aa gɛ̃ ma kã́mabokĩiuo fá.†

12 Ma gbɛ̃́ↄ, à laaika á gbɛ̃e su àↄ sↄ̃̀ vãi luanaaikɛsai vĩ e aà gɛ kɛ̃ò Lua bɛ̃́ɛwao. 13 Gu pↄ́ ì dↄ, i mɛ gbã píi, àↄ lɛdakↄ̃wa, kɛ́ duuna su á gbɛ̃e sã́sã aà swã́ gbãakũo yã́i. 14 Asa Kilisi gbɛ̃́ↄn wá ũ, tó wá zɛa gbãa mɛ́ wá aà náai vĩ lá wá vĩ káauwa e a lɛ́wa. 15 Lá wa òwa,

tó a Lua lↄↄ mà gbã,

ásu swã́gbãakɛ lá á deziↄ kɛ̀

gↄↄ pↄ́ aa bↄ̀ ma kpɛwao.

16 Deↄ mɛ́ gbɛ̃́ pↄ́ aa Lua lↄↄ mà aa bↄ̀ aà kpɛↄ ũi, mɛ́ i kɛ gbɛ̃́ pↄ́ Mↄizi ń bↄ́lɛ Egipiↄ bàasio? 17 Deↄ Lua pↄ pàńzi e wɛ̃̀ blai, mɛ́ i kɛ gbɛ̃́ pↄ́ aa duunakɛ̀, an gɛ gↄ̃̀ kálɛ guwaiwaiuↄ bàasio? 18 Deↄ a ònɛ́ ń azĩao aa gɛ̃ a kã́mabokĩiuo ni, mɛ́ i kɛ gbɛ̃́ pↄ́ gì aà yãmaiↄ bàasio?‡ 19 Wá è aai e gɛ̃̀uo an luanaaikɛsai yã́i.

*3:2 Nao 12.7

†3:11 Soũ 95.7-11

‡3:18 Nao 14.26-35