Bibeli Luayãtaalá Isaia 61

Dii ɛ̀fãaigↄↄ

1 Dii Lua Nisĩna kua,

à ma sɛ mà baonakpa taasideↄnɛ,*

à ma zĩ mà pↄsiadeↄ gba sↄ̃

mà zĩ̀zↄↄ gↄ̃a wɛ̃́ɛↄ ũ ń dakpɛunaↄ gbaɛao kpàwakɛ,

2 mà Dii gbɛ̃kɛkɛnɛgↄↄ†

ń wá Lua tↄsimagↄↄo onɛ́,

pↄsiadeↄ nↄ̀sɛ i níni píi.‡

3 À ma zĩ mà fùakpa Siↄna ↄↄlↄnaↄnɛ túfu gbɛu,

mà pↄna nísi dↄↄmá an gbãsĩkpaa gbɛu,

mà táasilɛa pↄkasa danɛ́ an kãgaa gbɛu.

Aaↄ maa, wiↄ mɛnɛ́

lí pↄ́ Dii bà azĩa tↄbↄa yã́iↄ.

4 Aa bɛzia sà zizi vu,

aa pↄ́ pↄ́ wà a dɛɛlɛmpà yãaↄ kɛkɛ,

aa ɛa wɛ̃́lɛ pↄ́ gↄ̃̀ da wáiwai za káauↄ kálɛ lↄ.

5 Bui zĩ̀loↄ á pↄ́ↄ dã́dãɛ́,

buipãleↄ á bua ń á vɛ̃ɛbuↄ sɛ̃waɛ́.

6 Ápiↄ sↄ̃, wa mɛɛ́ Dii gbàgbanaↄ,

wa á sísi wá Lua zĩkɛnaↄ.

Á buiↄ àizɛɛble,

á ĩ́anadã ń ń pↄmaaↄ.

7 Ma gbɛ̃́ↄ asea e lɛɛ pla

wí pↄ́ wa dàmá gbɛu,

aa pↄnakɛ ń ń baao

an gɛɛkpanwɛia gbɛu.

Aa gↄ̃ bùsu lɛɛ pla vĩ,

pↄna láasai aↄ dɛ ń pↄ́ ũ.

8 Asa ma Dii, yã́zɛde mɛ́ ì kamagu,

má za pↄ́siama ń gbãableamáogu.

Má ń asea kpámá ń náaio,

ma bàa aↄ kúńnↄ gↄↄpii.

9 Waↄ ń buiↄ dↄ̃ dṹniau,

an nɛ́ↄ tↄbↄ bui píi kĩ́i,

gbɛ̃́ pↄ́ ń é píi i dↄ̃ kɛ́

aa dɛ gbɛ̃́ pↄ́ ma báaadàńguↄ ũ.

10 Mi pↄnakɛ ń Diio maamaa,

ma pↄ na ma Luawa,

asa à suabaa nàmazi pↄkasa ũ,

à bↄa maa dàmɛɛ ula ũ,

lán nↄsɛna pↄ́ kákakɛ̀wa,

lá aà nↄ pↄ́ a zãblebↄↄ fĩ̀wawa.§

11 Lá tↄↄlɛ ì to pↄ́ bↄlɛwa,

mɛ́ bua ì to pↄ́wɛna fɛlɛ,

màa Dii Lua a to yã́zɛde ligua,

a to wà ma táasilɛ bui píi wáa.

Isaia
<
61
>

*61:1 Mat 11.5, Luk 7.22

†61:2 Luk 4.18-19

‡61:2 Mat 5.4

§61:10 Zia 21.2