1 Siↄna yã́i máↄ nílɛao,

Yelusalɛũ yã́i ma lɛ́ a gↄ̃ kpaaũao

e a gɛ bↄò maa lá gu ì dↄwa,

e a suabaa gɛ àↄ pípi lán sɛ̃tɛwa.

2 Buiↄ n bↄa maa e,

kíaↄ wɛsi n gawilɛ ḿpii.

Wa tↄ́ dafu pↄ́ a bↄ Dii lɛ́u kpánɛ.

3 Ńyↄ̃ↄ dɛ lán tulu gawidewa Dii ↄzĩ,

ńyↄ̃ↄ dɛ kíafua ũ á Lua ↄlau.

4 Wa mɛnɛ Bɛzia bau lↄo,

wa n bùsu sísi Guwaiwai bau lↄo.

Waↄ mɛnɛ Mapↄeãwɛ̃lɛ,

n bùsu sↄ̃ Nↄzãe,

asa Dii pↄ aↄ dↄma,

mɛ́ n bùsu a zãkɛaànↄ.

5 Lá ɛ̀waaso ì wɛ̃́ndia sɛ́,

màa n Kɛna a n sɛ́.

Lá nↄsɛna ì pↄnakɛ ń a nↄo,

màa n Lua a pↄnakɛnnↄ.

6 Yelusalɛũ, ma gudↄ̃anaↄ dilɛ n bĩ́iↄ musu,

aaↄ nílɛao fãanɛ ń gwãasĩnao píi.

Á Dii sìsinaↄ, ásu kã́maboo,

7 àↄ zɛaàzi e a gɛ Yelusalɛũ kálɛ,

i aà kɛ wɛ̃́lɛ pↄ́ dṹnia àↄ aà táasilɛ ũ.

8 Dii ladà ń ↄlɛlɛao,

a ò ń a gã̀sa gbãa dↄao à mɛ̀

á á blɛwɛ kpá á ibɛɛↄwa bau lↄo,

buipãleↄ vɛ̃ɛ pↄ́ a a zĩkɛ̀ mi lↄo.

9 A kɛ̀kɛnaↄ ble, aai ma táasilɛ,

vɛ̃ɛkↄzↄ̃zↄ̃naↄ mi ma kpɛ́ kpɛɛlɛ.

10 À bↄlɛ! À bↄlɛ wɛ̃́nkpɛ!

À zɛkɛkɛ gbɛ̃́ↄnɛ!

À kpá! À zɛda kpá! À gbɛↄ gágau,

í gudↄkↄ̃ɛkĩi dilɛ buiↄnɛ!

11 Gwa! Dii kpàwakɛ̀ e dṹnia lɛ́wa:

O Siↄnaɛ aà Suabana lɛ́ mↄ́.

Gwa! A a asea kũa

mɛ́ a a zĩ ài kpán'aɛkɛa.*Isa 40.10, Zia 22.12

12 Wa mɛnɛ́ Lua gbɛ̃́ↄ,

gbɛ̃́ pↄ́ Dii ń bóↄ.

Wa mɛnɛ Wa'ↄliai, Bɛzianlↄo.