Bibeli Luayãtaalá Zelemii 49

Yã́ pↄ́ a Amↄniↄ le

(Eze 21.28-32, 25.1-7, Amↄ 1.13-15, Sof 2.8-11)

1 Amↄniↄ yã́ musu Dii mɛ̀:

Isailiↄ nɛgↄ̃ɛↄ vĩo lé?

Aa túbiblenaↄ vĩo lé?

Àkɛa tã́a Mↄlↄku gↄ̃̀ Gada bùsu vĩi?

Bↄ́yãi aà gbàgbanaↄ ku a wɛ̃́lɛↄui?

2 Ma Dii ma mɛ̀,

a gↄↄ lɛ́ mↄ́ kɛ́ má kúkua dↄ

Amↄniↄ mɛɛwia Labawa,

i gↄ̃ bɛzia ũ.

Isailiↄ i tɛsↄ̃ a zↄ̃ɛwiaↄwa,

aai gbɛ̃́ pↄ́ ń yá yãapiↄ ya sↄ̃.

Ma Dii mámɛ má ò.

3 Ɛsɛbↄ̃deↄ, à wiilɛ,

asa Ai kàalɛɛ.

Labadeↄ, à búbuapɛ,

í zwã̀nkasaↄ kákaála,

í ázĩa gbɛ̃gbɛ̃,

à bã̀abãabo á wɛ̃́lɛ bĩ́idepiu,

asa wa Mↄlↄku sɛ́lɛ taò sãnu

ń a gbàgbanaↄ ń ń kíaↄɛ.

4 Bↄ́yãi álɛ ĩ́anadã

á guzulɛ táaedeↄ yã́ musui?

Pↄ̀ↄbↄzãkɛnaↄ, i á àizɛɛ náaikɛ

à mɛ: Deↄ mɛ́ aa fↄ̃ lɛ́lɛwái?

5 Ma Dii Lua Zĩgↄ̃de,

má tó bui pↄ́ liaaáziↄ gili gɛ̃águɛ,

aai pɛ́wá ápii,

gbɛ̃e ku à á gbɛ̃́ pↄ́ fãaaaↄ kãaao.

6 Gbɛzã má su ń Amↄniↄ ń pá ziu,

ma Dii mámɛ má ò.

Yã́ pↄ́ a Ɛdↄũↄ le

(Isa 34.5-17, 63.1-6, Eze 25.12-14, 35.1-15, Amↄ 1.11-12, Abd 1-14, Mal 1.2-5)

7 Ɛdↄũↄ yã́ musu Dii Zĩgↄ̃de mɛ̀:

Ɔ̃nↄnae ku Temani lↄo lé?

Laaideↄ lɛdama làa yã̀?

An ↄ̃nↄ gɛ̃̀zɛa yã̀?

8 Dedãdeↄ, à ɛa ń bao,

í gɛ ulɛ gbɛ̀'ɛↄ guu,

asa má tó á Esau buiↄ yã'e

á wɛtãgↄↄpiɛ.

9 Tó vɛ̃ɛkↄzↄ̃zↄ̃naↄ mɛ́ mↄ̀ sì á vɛ̃ɛbuↄu,

vɛ̃ɛ kↄ̃na ↄ̃ aa tóɛ́o lò?

Tó kpã́iↄ mɛ́ gɛ̃̀ázi gwã́ sↄ̃,

pↄ́ pↄ́ an pↄ́ dↄwà ↄ̃ aa sɛ adoo lò?

10 Mapi sↄ̃ má Esauↄ pↄ́ↄ pilimá píiɛ,

má bↄmá ń ulɛkĩiↄ guuɛ,

aa naalɛkĩi e guei lↄo.

An nɛ́ↄ ń ń daɛↄ ń ń gbɛ̃́deeↄ gaga,

an bui aↄ ku lↄo.

11 À tonɛ pↄ́ gwana vĩoↄ to we,

má ↄliańzi.

Á gyaa gbɛ̃andoↄ i ma náaikɛ lↄ.

12 Ma Dii ma mɛ̀,

tó gbɛ̃́ pↄ́ aai ka ma pↄkũma í miaoↄ sù wa mì,

ápiↄ sↄ̃ á bↄ pãe?

Á bↄ pão, á mi sↄ̃ɛ.

13 Ma Dii má sì ń mazĩao,

Bↄzɛla a gↄ̃ bɛzia ũɛ,

iↄ da gii lán gbáawa.

Aↄ dɛ láanipↄ ũ, láaipↄ ũ,

a zↄ̃ɛwiaↄ iↄ da gii gↄↄpii.

14 Ma baomà Diiwa,

wà zĩnae zĩ̀ buiↄwa aà onɛ́,

aa kↄ̃ kãaa aa gɛ lɛ́lɛwá,

aa fɛlɛ gɛ́ zĩkaiánↄ.

15 À ma! Má tó à gↄ̃ kpɛɛ buiↄ guu,

wìliↄ sakaágu.

16 Á nↄ̀sɛ pãsĩ ń á kàamaio mɛ́ á sãsã.

Á gbɛ̃́ pↄ́ a gbɛ kɛ̀ á kpɛ́ ũ,

á zↄ̃lɛa gbɛ̀sĩsĩ musu,

baa kɛ́ a á sakpɛ dà musumusu lán baɛwa,

má á bãɛɛ.

Ma Dii mámɛ má ò.

17 Ɛdↄũ bùsu a gↄ̃ wáiwai,

yã́pi i di gbɛ̃́ pↄ́ lɛ́ gɛ̃ weↄwa,

aaiↄ a láanikɛ wɛ́tɛ̃a pↄ́ wà mↄ̀ɛ̀ yã́i.

18 Aↄ dɛ lán Sↄdↄũ ń Gↄmↄↄo*

ń wɛ̃́lɛ pↄ́ kú ń saɛↄ míↄnzↄ̃awaɛ.

Gbɛ̃e a zↄ̃lɛ weo, baa do.

Ma Dii mámɛ má ò.

19 Lá nↄ̀ↄmusu ì bↄ Yuudɛ̃ dàou

à gɛ̀ bualoũ àizɛɛdeu,

màa má Ɛdↄũↄ ya mà ń bↄlɛ ń bùsuu gↄ̃̀ↄ,

mí gbɛ̃́ pↄ́ má sɛ̀ dilɛ we.

Démɛ muaamanↄi?

Démɛ a fↄ̃ ma gbɛa a yã́ii?

Dↄaana kpele mɛ́ a fↄ̃ zɛ gimɛɛi?

20 Ayãmɛto à yã́ pↄ́ Dii zɛ̀ò à kɛ Ɛdↄũↄnɛ ma

ń yã́ pↄ́ a dìlɛ Temanideↄ musuo.

Nↄ̀ↄmusupi a ń nɛ́ↄ naaa taò lán sãↄwaɛ,

i ń bualoũpi dɛ̃ↄnzↄ̃ ń yã́i.

21 An kwɛa a tↄↄlɛ lualua,

wa ń wii ma e Ísia Tɛ̃ai.

22 À ma! Ibɛɛ a fɛlɛ kúu'omá,

i a gã̀sĩa poo Bↄzɛla.

Gↄↄ bee sↄ̃ a kɛ̃ Ɛdↄũ nɛgↄ̃naↄgu

lán nↄɛ pↄ́ lɛ́ nɛ'i wãwãkɛwa.

Yã́ pↄ́ a Damasi le

(Isa 17.1-3, Amↄ 1.3-5, Zkl 9.1)

23 Damasi yã́.

Amatadeↄ ń Aapadadeↄ gɛɛ gↄ̃̀ kpá ń wɛ́i,

kɛ́ aa bao ĩ́i mà yã́i.

An sↄ̃ zɛa tɛɛɛo lán ísia íwa,

an nↄ̀sɛ daa doũo.

24 Damasideↄ kúsu kwɛ̀,

aalɛ olo'olobo,

aa lɛ̀kↄ̃wa ń bao.

Pↄsia ń wãwão tↄ̃̀má,

lán nↄɛ pↄ́ lɛ́ nɛ'ìwa.

25 Bↄ́yãi aai bↄlɛ wà wɛ̃́lɛ tↄdepi tò weo ni?

Mɛɛwia pↄnadepi.

26 Wɛ̃́lɛpi ɛ̀waasoↄ kwɛ a zɛaↄ guuɛ,

wi a zĩgↄ̃ↄ dɛdɛ zĩbeezĩ píi.

Ma Dii Zĩgↄ̃de mámɛ má ò.

27 Má tɛsↄ̃ Damasi bĩ́iↄwa,

kí Bɛnadada zɛgikĩi i tɛ́kũ.

Kedaaↄ ń Azoo bùsudeↄ

28 Kedaaↄ ń Azoo bùsu pↄ́ Babɛli kí Nɛbukanɛza lɛ̀lɛmáↄ yã́ musu Dii mɛ̀:

À fɛlɛ gɛ́ lɛ́lɛi Kedaaↄwa,

í gukpɛdepiↄ dɛ̃ↄnzↄ̃.

29 Wa ń zwã̀akpɛↄ ń ń pↄtuoↄ símá,

wi tá ń ń zwãa pↄ́ aaì da ń kpɛ́uↄ

ń ń yiongoↄ ń ń pↄ́ↄ píi.

Wi wiidↄmá: Vĩa pↄ́ↄ liaaázi!

30 Azoo bùsudeↄ, à bàalɛ fãaa,

í gɛ ulɛ gbɛ̀'ɛↄ guu.

Ma Dii mámɛ má ò.

Babɛli kí Nɛbukanɛza yãsɛ̀ánↄ,

à lɛkpàaĩázi ń gbɛ̃́ↄ à mɛ̀:

31 À gɛ lɛ́lɛ bui pↄ́ kálɛa dↄdↄa,

aalɛ ńzĩa náaikɛↄwa.

An wɛ̃́lɛↄ gbaↄ ń gbã́aↄ vĩo,

aamɛ ká we ńtɛ̃ɛ.

Ma Dii mámɛ má ò.

32 Wa ń yiongoↄ naaa,

wi tá ń ń zuↄ dasidasi.

An gbɛ̃́ pↄ́ aaì mizↄ̃iↄ,

má tó yã́ bↄ gupiiu à ń le,

mí ń fãaa dṹnia gola síiↄ̃u.

Ma Dii mámɛ má ò.

33 Azoo bùsu a gↄ̃ gbɛ̃gbonaↄ tòo ũɛ,

iↄ da wáiwai gↄↄpii.

Gbɛ̃e aↄ ku we lↄo, baa do.

Elaũ bùsu

34 Dii yã'ò ãnabi Zelemiiɛ Elaũ bùsu yã́ musu Yudaↄ kí Zedekia kpalablea daalɛgↄↄ à mɛ̀:

35 Ma Dii Zĩgↄ̃de ma mɛ̀,

má Elaũↄ sá ɛ́'ɛ,

asa sápi ↄ̃ aalɛ gbãa'ewà.

36 Má dṹnia gola síiↄ̃ ĩ́ana gbaɛmá,

mí ń fãaa gupiiu.

Bùsue ku kɛ́ an lala'onaↄ gí tauio.

37 Má Elaũↄ kãdɛ ń ibɛɛ pↄ́ aalɛ ń wɛↄnɛ,

mí yã́yiamá ń pↄfɛ̃ pãsĩo.

Ma Dii mámɛ má ò.

Má pɛ́má ń fɛ̃ndao

e mà gɛ ń midɛɛ.

38 Má Elaũↄ kía ń ń dↄaanaↄ dɛdɛɛ,

mí a kpalabaa kpálɛ an bùsuu.

Ma Dii mámɛ má ò.

39 Gbɛzã má su ń Elaũↄ ń pá ziu

Ma Dii mámɛ má ò.

*49:18 Daa 19.24-25