Bibeli Luayãtaalá Yáasiↄ 9

9

Ɔ̃nↄ ń sↄũkɛo

1 Ɔ̃nↄ a kpɛ́ dↄ̀,

à a gbapɛlɛↄ ã̀ mɛ̀n sopla a pɛ̀lɛpɛlɛ.

2 À nↄ̀ↄ dɛ̀ à vɛ̃ɛ kɛ̀kɛ,

à blɛↄ sↄukɛ̀ a kàlɛ.

3 À a wɛ̃́ndia zĩkɛnaↄ zĩ̀,

àlɛ lɛzu wɛ̃́lɛ sĩ̀sĩ misonaa à mɛ̀:

4 Gbɛ̃́ pↄ́ nↄ̀sɛ vĩoↄ à ɛa mↄ kɛ!

Ɔ̃nↄkɛ̃sãmadeↄ málɛ oɛ́,

5 à mↄ blɛblemanↄ,

í vɛ̃ɛ pↄ́ má kɛ̀kɛ mi.

6 À sↄũkɛ tó, íↄ aafia,

í táa'o wɛ́kɛ̃a zɛ́u.

7 Gbɛ̃́ pↄ́ lɛ́ lɛda gbɛ̃́laanikɛnawa

ì gↄ̃ sↄ̃́sↄ̃ɛɛ,

gbɛ̃́ pↄ́ lɛ́ vãikɛna dazɛwa

ì gↄ̃ tàaeɛɛ.

8 Ńsu gbɛ̃́laanikɛna dazɛwao,

asa a ĩ́isɛnnↄɛ.

Ɔ̃nↄna dazɛwa, iↄ yenzi.

9 Yãda ↄ̃nↄnaɛ, aà ↄ̃nↄ i dɛdɛ,

yã'o gbɛ̃maaɛ, aà dↄ̃a i kã́fĩ.

10 Vĩakɛa Diiɛ mɛ́ ↄ̃nↄ daalɛa ũ,

Lua pↄ́ a kua adoa dↄ̃a mɛ́ wɛ́kɛ̃a ũ.

11 Asa ńyↄ̃ gɛ̃gɛ̃ ma sabai,

n wɛ̃ni a gbã̀akũ.

12 Tó ń ↄ̃nↄ, nzĩaɛɛ,

tó gbɛ̃'awiambↄnan n ũ, n mi musu.

13 Mìsaikɛ dɛ lán nↄɛ lɛdewaɛ,

a sↄũ mɛ́ a yãe dↄ̃o.

14 Ì zↄ̃lɛ kìlau a kpɛɛlɛ,

aà kpɛ́ kú wɛ̃́lɛ sĩ̀sĩ musu,

15 ì lɛzu gbɛ̃́ pↄ́ lɛ́ gɛ̃ↄzi,

ì o gbɛ̃́ pↄ́ zɛ́ kũa súsuↄnɛ:

16 Làasoosaide, ɛa mↄ kɛ!

Ɔ̃nↄkɛ̃sãmade, málɛ onɛ,

17 í kpã́i mia ìↄ na,

blɛblea asii guuá zↄ́ɛ.

18 Gↄ̃ɛpi dↄ̃ kɛ́ gↄ̃a gyaade ũ zɛ́n weo,

gbɛ̃́ pↄ́ à ń sisiↄ sì bɛda gbã́ou.