Bibeli Luayãtaalá Yáasiↄ 10

10

Salomↄↄ yáasiↄ

1 Nɛ́ ↄ̃nↄna ì to a mae pↄ kɛ na,

nɛ́ sↄũ ì a da pↄ yaɛ̀.

2 Ɔvãi lí àikɛo,

yãkɛa a zɛ́wa ì ń sí gawa.

3 Dii lí to nↄana gbɛ̃maa dɛo,

mɛ́ ì vãikɛnaↄ tɛ̃́ ń pↄeã pↄ́.

4 Pↄewosai ì to wà taasikɛ,

zĩkɛa ↄplapla mɛ́ ì to wà kɛ pↄde ũ.

5 Nɛ́ pↄ́ blɛ gba dↄ̀ saɛá nɛ́ laaideɛ,

nɛ́ pↄ́ ì i'o pↄkɛkɛgↄↄ wí dↄ̃o.

6 Gbɛ̃maa mi ìↄ báaa vĩ,

ãma yãpãsĩ mɛ́ vãikɛna lɛ́ pà.

7 Gbɛ̃maa lí ga ń a tↄ́oo,

vãikɛna tↄ́ ì midɛ.

8 Ɔ̃nↄna ì zĩkɛ yãdilɛnɛↄwa,

yãbↄlɛna ì azĩa nɛ́.

9 Gbɛ̃́ pↄ́ ì yãkɛ a zɛ́wa ku dↄdↄa,

yãbɛ̃ɛkɛna yã́ a bↄ.

10 Gbɛ̃gwaa ń wɛ́ vãio ì mↄ́ ń yã́o,

gbɛ̃́ gbaa laai ì íbɛlɛmidɛ.

11 Gbɛ̃maa lɛ́á nibↄna wɛ̃nideɛ,

yãpãsĩ mɛ́ vãikɛna lɛ́ pà.

12 Zaakↄ̃u ì sòle da,

yeakↄ̃i ì láka tàae píia.*

13 Ɔ̃nↄyã ìↄ dↄ laaide lɛ́u,

flã mɛ́ ↄ̃nↄkɛ̃sãmade pↄ́ ũ a kpɛsɛa.

14 Ɔ̃nↄna ìↄ dↄ̃a kũ̀sũa dia,

laaisaide lɛ́ ì aà dayãu àa.

15 Ɔde àizɛɛ ìↄ dɛɛ̀ wɛ̃́lɛ bĩ́ide ũ,

wɛ̃nade taasikɛa mɛ́ aà midɛa ũ.

16 Gbɛ̃maa asea ì mↄɛ̀ ń wɛ̃nio,

vãikɛna ài ì ĩadama iɛ̀.

17 Gbɛ̃́ pↄ́ ì lɛdama ma wɛ̃ni zɛ́ sɛ̀,

gbɛ̃́ pↄ́ ì totoa dilɛ pã zã̀ zɛ́wa.

18 Gbɛ̃́ pↄ́ za gbɛ̃́u mɛ́ a ye wa dↄ̃o ɛɛdeɛ,

gbɛ̃'ↄ̃ↄkpanaá sↄũɛ.

19 Duuna a gíↄ kui yã́ dasi bↄlɛa guuo,

gbɛ̃́ pↄ́ ì a lɛ́ fↄ̃́á laaideɛ.

20 Gbɛ̃maa lɛ́naá ã́nusu maaɛ,

vãikɛna nↄ̀sɛ gbiao.

21 Gbɛ̃maa yã'oa ì ń dazɛwa dasi,

laaisaide ì ga ↄ̃nↄkɛ̃sãma guuɛ.

22 Dii báaadaańgu ì ń kɛ ↄde ũ,

zĩkɛa ń taasio lí pↄe kã́fĩo.

23 Dàakɛa dɛ sↄũɛ kↄ̃̀ↄ yã́ ũɛ,

ↄ̃nↄkũa mɛ́ ì kɛ laaideɛ na.

24 Yã́ pↄ́ vãikɛna lɛ́ a vĩakɛ mɛ́ a aà le,

Lua a gbɛ̃maa pↄeã pↄ́ kpawà.

25 Tó ĩ́ana kàka à gɛ̃̀,

vãikɛnaↄ aaↄ ku lↄo,

gbɛ̃maa zĩ́na mɛ́ ìↄ pɛ́lɛa gↄↄpii.†

26 Lá lɛmuu kũ̀ma ì kɛ swaaɛ,

lá súɛlɛ ì kɛ wɛ́ɛ,

màa zígbiade dɛ gbɛ̃́ pↄ́ aa aà zĩↄnɛ.

27 Vĩakɛa Diiɛ ì wɛ̃ni gbã̀a kã́fĩ,

vãikɛnaↄ sↄ̃, an wɛ̃ni a kulunkũ.

28 Gbɛ̃maaↄ wɛ́ ìↄ dↄ pↄnai,

vãikɛnaↄ sↄ̃, tãmaa a ń nɛ́ɛ.

29 Dii zɛ́ mɛ́ mikpakĩi ũ gbɛ̃maaↄnɛ,

vãikɛnaↄ sↄ̃, Dii ì ń kaalɛɛ.

30 Gbɛ̃maa a fu bauo,

gbɛ̃vãi sↄ̃ a zↄ̃lɛkĩi e dṹniauo.

31 Ɔ̃nↄ ì bↄ gbɛ̃maa lɛ́u,

lɛvãide sↄ̃, wa aà lɛ́na zↄ̃ɛɛ.

32 Gbɛ̃maa yã́ pↄ́ kũ̀ wà onɛ́ dↄ̃,

yãbɛ̃ɛ ìↄ dↄ gbɛ̃vãi lɛ́u.

*10:12 1Kln 13.7, Zaa 5.20, 1Piɛ 4.8

†10:25 Mat 7.24-27