Eletar yay étiar yo Pool ahiĉ me
Tímonte
Waf waw wabaj me n’eletar yauye
Ñammeŋe, Tímonte nauneniwunen n’élebur yay yaa Mukanay Uᵽotoraaw ni ᵽoᵽ ni siletar sasu saa Pool. Maagen mamu, Tímonte arambena omene ala Pool ni burokol. Nátinenol n’újaorol wammeŋe. Pool naboñol ajow ulago wátañie, fáŋum wo najow me bi Tesalonik ni ᵽoᵽ bi Korent.
Pool nahiĉe Tímonte siletar súuba. Siletar sausu sihiĉi no ejangara gútiar guju me éinen, no gúĉit jangu yauyu guileni me guban. Maer ñer ŋañool esen sijangu sasu gailo gagu gájahor me ni ᵽoᵽ eliŋen gáinen gagu gala so.
Eletar yay étiar yay ehiĉihiĉ bi etar ejangaraay, ufan sijangu sasu, ni ᵽoᵽ aĉila Tímonte faŋaol.
Baje ejangara guce guman bugo nihi gubet bugan bugagu ni galim ni baloberil (1 Tímonte 1.3-7 ; 4.1-4 ; 6.3-5). Ni bajugeril buroŋ babu bal eliᵽ wásum me enil buarat, yaĉil me n’gulat waf waa búyabo, ni ᵽoᵽ etiñ mitiñay micemo. Ban wo Aláemit átut me ᵽee úariari. Dáuru Tímonte aat me aosen ejangaraay.
Ni guomunor ejangaraay baj ró ufan sijangu sasu gáĉibbeneil me ban nihi guligenil ; babaj ró may bugan bugagu garambeneil me ban ni gurok bi mala galeh me ni ᵽoᵽ bi mala úsotaaw.
Bugaa guomunor gaugu gusoholae eroŋ ni gásumay, gusoholae ᵽoᵽ min ésuh yay guruhenil. Pool nahiĉe eletar yauye bi etar bugan bugagu mala bu guot me nihi gukan bíteŋen babu, ni may bu guot me nihi gulaw nogor (1 Tímonte 2). Nagitene ᵽoᵽ bu ufan jangu yay guot me guroŋ nogor (1 Tímonte 3).
Tímonte ᵽayol an mo ala mof mamu maa Geres ; jaol, o, ajangara Asúif átut omene. Tímonte Pool aogenol min aligenol, yaĉil me náni ti añil áᵽullo ni farol. Nabile áni áĉibbena-bugan, afan ala sijangu. Pool n’eletar yauye nagitenol búoh naate anamo aroka aaro ala Yésu Kirista. Nagitenol may bu náari me ajoh guñen gúuba ajangara ánoan dó ni guomunor gagu, ni ᵽoᵽ wo naat me aligenil ban nah’ataril.
1
Basaf babu baa Pool
1 Injé Pool aamme aᵽotora ala Kirista ihiĉuli eletar yauye. Aᵽagenaolal Aláemit ni Yésu Kirista o núhagumal me ni o, bugo gumaŋe min íni aᵽotora. 2 Injé ihiĉuli eletar yauye, aw Tímonte, aamme añolom ala maagen ni gáinen gagu : mbi Ᵽayolal Aláemit ni Ataolal Yésu Kirista guseni gáji, ñarum enil ni gásumay.
Mala ékanum uligenaaw gálodit me maagen
3 Ti nilai yo me no niomme n’ejow mbaa Masedonia, urobo ᵽan dó Efes dó nuom mee. Baj dó bugan gaam n’eligen ésuh yay gurim gannamut ni wo núinenal me ni wo. Nuote úfirenil ekan burok ti baubu. 4 Uogil guhat urej waw wañulout mee, guhat ᵽoᵽ eᵽinen sipaya gufan yámusut ebao : úru ndi ramben bugan bugagu ni gáinenil min guffas waf waw wo Aláemit aamme n’ekan, bare síceŋor bare nihi ŋárul. 5 Nilobilob maa min mbi gurimom guinnul ni bugan bugagu gábbolior gáᵽullo n’éĉigir yakure ni biinum baaro, sammeŋe gáinen gaa maagen. 6 Baje hum bugan guce gahalene dáuru ᵽe dauneni mee min gunogen ni síceŋor sabajut nafa yánoyan. 7 Gumaŋe gujogil uligena búgamah bugaa gúboñ Aláemit, bare gurim gagu go bugo faŋail gulobe me gujogut go, hani sulob sasu so gulobe mee ni gafium dó.
8 Nuffasale ᵽe búoh gúboñ gagu gaa Móis waf waaro, íni me nunabenale ni wo gulob me. 9 Nuffasale may búoh gúboñ gaugu let bi ni bugan bugagu gakane me maaro gúomum to, bare til bi n’ukana-maarat bugagu, bi ni gaceŋe me ekan wo gulobil me, bi ni gálaᵽut me ni utilaaw, bi ni gákanumut me Aláemit ni wánowan wanab me, bi ni gamuge me sipail ter sijail, ter bugagu, 10 bi ni bugagu gafiye me ni aletalet, bi ni wáineaw gafilene me gupalil wáine, bi ni gannomene me umigel, bi n’ubijaaw ni bugagu gabbate me ni jibij ró, ni bugagu ᵽe gakane me waf uce mul wannamut ni baligener babu baa maagen. 11 Baligener baubu ni Firim fafu Fásum me bujoumulo, falob me mala bájalo Aláemit ammeŋ me gasal. Nafiumomfium bireg nasenom fo min mb’ivare fo.
Pool o n’esal Yésu Kirista mala músumol
12 Injé umu n’esal Ataolal Yésu Kirista, mala min ajoh me búoh niᵽiloᵽilo bi éni aroka ola, ban nasenom sembe sasu sal ekan burok baubu. 13 Hani min iloben me maarat iya ni o, min iyogenenol me, min ijelenol me, bare Aláemit narumom enil mata iffasenut wa nikanene, ban gáinen gánogan gulelen n’ínje. 14 Maagen Ataolal Yésu Kirista nammeŋenom gájiol iki gupus, min ñer asenom gáinen ni gábboli so gajogor gagu ni o nihi gúŋarul me.
15 Firim ufe faa maagen faᵽiloe min bugan bugagu ᵽe gukan fo ni gaᵽin : Yésu Kirista najoulojow ni mof bi eᵽagen bugan bugagu gatile me, ban ínje gatilom gufaŋe wolil ᵽe. 16 Bare Aláemit narumom enil min Yésu Kirista agiten gamutenol ᵽoogo go náju me n’ínje, aamme atila ahu átiar. Nakanmokan min mbi ní fútalloum bi ni bugan bugagu gajae me éinen ni o, ban ni guyab buroŋ bábaerit. 17 Mbi bugan bugagu ᵽe gumigelet ban ni gusal Aláemit bi nánonan, aĉila aamme Aví ahu ala bándor añumut me émus aĉet, o an mát’áju me ajuh, aamme Aláemit ahu anur pat ala maagen ! Amen !
18 Añolom Tímonte, niseni ñer firim faufe fannam me ni wo Aláemit alob me míya n’utum waa bugan ᵽio bo. Ujoh gurim gaugu ti nihi gúni me mitiguma min mb’úju utih fitih fafu fáari me, 19 aw n’ejoh gáinen gagu gúiya guñen gúuba ban nubaj biinum bakure. Baje bugan bugo uinumil ukurut galale ekan mo, ban ñer guĉile mamu min gáinenil gullim. 20 Baje ni bugan bugaubugi Himene bugo ni Alsandul, bugo nihat me ni guñen gaa Seytane min mbi guteh mahat mala gújel gagu go gujele me Aláemit.