2
Mala elaw bi ni bugan bugagu ᵽe
1 Firimom fáamumma fo fuomme min uakenal ni galaw n’écin nímoro Aláemit bi ni bugan bugagu ᵽe. Nuotale ufotenoral bújoŋorol ban nusalalol mala wo nakanolal me ᵽe. 2 Mbi galaw gukani bi ni úviaw ni bugagu ᵽe gaamme ni guhow gagu, tima nújual uroŋal buroŋ bájebie, baa gásumay, bo an mat’ajel, dó ᵽe min úkanumal Aláemit ban nuroŋal buroŋ baᵽiloe eyab gasal. 3 Dáuru díari me ban ni dúsum Aláemit aamme aᵽagenaolal, 4 amaŋ me bugan bugagu ᵽe guyab gaᵽah ban ni jáenumil iki guffas maagen mamu.
5 Maagen mamu Aláemit anur pat abaje,
ban ᵽoᵽ ajaa-bulago anur pat abaje tutor Aláemit ni bugan bugagu.
An ahumu o aamme Yésu Kirista,
6 asen me súñunduol bi eallor utilolal wolal ᵽe.
No tinah talu to Aláemit aᵽi me naĉob tiĉih me,
Yésu Kirista nakan mo bi egiten me búoh
Aláemit namamaŋ min bugan bugagu ᵽe guyab gaᵽah.
7 Dáuru diĉil me min Aláemit aĉobom íni aloba-uhoŋen ni ᵽoᵽ aᵽotora, bi egiten bugan bugagu galet me Esúif wa uomme gáinen ni maagen. Ibijut, maagen mamu nilobeul.
Gailo gagu go ánaine ni anaare guot me gubaj ni jangu
8 Nimaŋe ñer tánotan wáineaw guteben guñen gakure mbal émit min gulaw m’babajut bitiña-fiiñ ter biinum baa gárig.
9 Nimaŋe may waareaw nihi gusimo jon, jambi lejeho, jambi ᵽoᵽ sanumeto ; jambi gueĉo gueĉo gattinenie, ter gúibor úibor wal éurus, ter waa banuh, ter mul bisimo básumut ebaj, 10 bare til gukan maaro, ti jáhor me ni waare gaage bugo Aláemit gúkanume. 11 Waareaw guote gualenoro ban ni guᵽanor an baamer n’eligenil. 12 Ijíut min anaare nah’aligen bugan, ter min ágogen ánaine ; naate ajoh butumol. 13 Leti Aláemit Adam namundum me áuwen, mbiban Eva ? 14 Ban Seytane let Adam nabute, bare til aarema, min alo mamu ni gatil. 15 Bare hani mo bae, aare ahu ᵽan ayab gaᵽah o babuger uñil, íni me najoge liŋ ni éinen yay ni Yésu, íni me nábbolie gupalol, íni me naroŋe buroŋ banabe, íni me may naalenoroe.