2
Kirisi kũ a gana lía yão
Ma gbɛ̃nↄ, kũ ma su á kĩnaa, ma su Luda yã kpàkpa kɛárɛmɛ, adi kɛ ma su ↄ̃ndↄ̃ gbãna ke lɛ́nna kɛárɛnlo. Ma zɛo kũ mani yãke oárɛro, séde Yesu Kirisi yã baasiro, atɛ̃nsa a gana lía yã. Ma suna á kĩnaa gũn ma su kũ swɛ̃̀vĩnaao kũ vĩnao kũ lukalukanaao. Ma waazikɛnaa gũn matɛn yã o kũ lɛ́nnao ke kũ ↄ̃ndↄ̃oro. Ma ò kũ Luda Nini gbãna mↄárɛnaaomɛ, de á ludanaanikɛna sún bo bisãsiri ↄ̃ndↄ̃ gũnlo, sé Luda gbãna gũn.
Ɔ̃ndↄ̃ kũ Luda Nini dì dańnɛ
Bee kũ abireo odì ↄ̃ndↄ̃yã o gbɛ̃ kàsaranↄnɛ. Adi kɛ andunia tera díkĩna ↄ̃ndↄ̃ ke a gbãnade kũ ń gbãna tɛn lákanↄ pↄ́nlo. Luda ↄ̃ndↄ̃n ótɛni o, a pↄyenyĩna kũ à utɛna yã pìi. À gĩnakɛ à dìtɛ ó gakuri lena yãi zaade adi andunia kátɛro. Andunia tera díkĩna gbãnade ke ↄ̃ndↄ̃ pì dↄ̃ro. Tó ò dↄ̃mɛ yã, de odi Dikiri gakuride pá líaro. Lákũ à kɛ̃na Luda yãn nà ò pì:
Pↄ́ kũ wɛ́ dí ero, akũsↄ̃ sã dí maro,
a laasun dí gɛ̃ gbɛ̃ke swɛ̃̀ɛ gũnlo,
àkũ Luda a soru kɛ̀ gbɛ̃ kũ ò yeinↄnɛ.
10 Luda mↄ̀wɛrɛ kũ a Nini gbãnao, zaakũ a Nini pì yã sĩnda pínki tàasikana, bee kũ Luda asiri zↄ̃kↄ̃nↄ.
11 Gbɛ̃ke a dake nɛ̀sɛgũnyã dↄ̃ro, tó adi kɛ a nini kũ à kú a gũn baasiro. Lɛmɛ dↄ gbɛ̃ke Luda nɛ̀sɛgũnyã dↄ̃ro, tó adi kɛ Luda pì Nini baasiro. 12 Andunia dí ninin o lèro, Nini kũ à bò Luda kĩnaan o lè, de ò gba kũ Luda dàwɛrɛ dↄ̃. 13 Yã kũ ótɛni on gwe, adi kɛ yã kũ bisãsiri ↄ̃ndↄ̃ dì dańnɛnlo, yã kũ Luda Nini dì dańnɛmɛ. Lɛn odì Luda Nini yã bↄkↄtɛ gbɛ̃ kũ ò Luda Nini vĩnↄnɛ lɛ. 14 Andunia gbɛ̃ dì Luda Nini yãnↄ síro, zaakũ à denɛ mìsariyã ũmɛ. Ani fↄ̃ à a mì dↄ̃ sero, zaakũ Luda Nini pì gbãnan òdi a yãzɛ dↄ̃o. 15 Gbɛ̃ kũ Luda Nini dì donɛ arɛ dì yã sĩnda pínki zɛ́ dↄ̃, gbɛ̃ke sↄ̃ à zɛ́ vĩ à a vãni boro. 16 À kɛ̃na Luda yãn ò pì: Dí mɛ́ à Dikiri nɛ̀sɛ dↄ̃ gbasa à lɛ́ daaa? Ama ókↄ̃nↄ ó Kirisi nɛ̀sɛ vĩ.