2
Nɛbukɑnɛsɑɑn dosu
Nɛbukɑnɛsɑɑn bɑndun wɔ̃ɔ yiruse sɔɔ, u dosu gɑgu kuɑ. Dosu ge, gɑ nùn bɛrum mwɑ sere u kpɑnɑ u dweeyɑ. Yerɑ u dobo dobogibu sokusiɑ kɑ sɔrobu kɑ bũu sinɑmbu kɑ bwisigibu bu kɑ nùn win dosu ge sɔ̃. Mɑ tɔn be kpuro bɑ nɑ bɑ mɛnnɑ win wuswɑɑɔ. Mɑ u bu sɔ̃ɔwɑ u nɛɛ, nɑ dosɑwɑ. Gɑ mɑɑ mɑn bɛrum mwɑ. Nɑ kĩwɑ i mɑn sɔ̃ ye nɑ dosɑ.
Mɑ bwisigii be, bɑ sinɑ boko sɔ̃ɔwɑ kɑ Arɑmugibun bɑrum bɑ nɛɛ, yinni, wunɛn hunde yu dɑkɑɑ dɑ! A sun dosu ge sɔ̃ɔwɔ kpɑ su nun gu tubusiɑ.
Mɑ sinɑ boko u mɑɑ bu sɔ̃ɔwɑ u nɛɛ, wee ye nɑ gɔ̃ru doke n bɛɛ kuɑ. Ì kun mɑn dosu gen tii sɔ̃ɔwɑ kɑ gen tubusiɑnu sɑnnu, kon de bu bɛɛ bɔtiri bɔtiriwɑ kpɑ bɛɛn yɛnusu su ko bɑnsu. Adɑmɑ ì n mɑn gu sɔ̃ɔwɑ kɑ gen tubusiɑnu sɑnnu, kon bɛɛ kɛ̃ɛ dɑbinu wɛ̃. Kpɑ i bɛɛrɛ bɑkɑ wɑ. Yen sɔ̃ tɛ̃, i mɑn dosu gen tii sɔ̃ɔwɔ kɑ gen tubusiɑnu.
Bɑ kpɑm nùn wisɑ bɑ nɛɛ, yinni, ɑ sun wunɛn dosu ge sɔ̃ɔwɔ kpɑ su nun gu tubusiɑ.
Sinɑ boko u bu wisɑ u nɛɛ, nɑ yɛ̃ sɑ̃ɑ sɑ̃ɑ mɑ i kĩ i gɑri gɑwɑwɑ. Domi i nuɑ ye nɑ gɔ̃ru doke n bɛɛ kuɑ. Mɑ i ǹ mɑn dosu ge sɔ̃ɔwɑ, ye nɑ gɔ̃ru doke n bɛɛ kuɑ mi, yɑ koo bɛɛ kpuro deemɑ. Domi i sɔɔru kpɑ i kɑ mɑn weesu kɑ gɑri suninu nɑɑwɑwɑ kpɑ n kɑ nɛn gere kɔsi. Yen sɔ̃, i mɑn dosu gen tii sɔ̃ɔwɔ kpɑ n giɑ mɑ i ko i kpĩ i gu tubusiɑ.
10 Yerɑ bɑ nùn sɔ̃ɔwɑ bɑ nɛɛ, goo sɑri duniɑ sɔɔ mini wi u koo kpĩ u wunɛn gɑri yini wisi bɑɑ be bɑ dɑm mɔ nge wunɛ, ben goo sɑri wi u gɑri yinin bweseru bikiɑre sɔrobun mi, ǹ kun mɛ dobo dobogibun mi, ǹ kun mɛ Bɑbilonin bwisigibun mi. 11 Ye wunɛ sinɑ boko ɑ bikiɑ mini, goo sɑri wi u koo kpĩ u nun ye tubusiɑ sere bũnu bɑɑsi yɑ! Wee nu ku rɑ n mɑɑ wɑ̃ɑ tɔmbun suunu sɔɔ.
12 Ye sinɑ boko u ben gɑri yi nuɑ, yerɑ u mɔru bɛsirɑ. Mɑ u woodɑ wɛ̃ bu Bɑbilonin bwisigibu kpuro go. 13 Mɑ bɑ sinɑ bokon gɑri yi kpɑrɑ mɑ bɑ koo Bɑbilonin bwisigii be go. Mɑ bɑ Dɑniɛli kɑ win kpɑɑsibu kɑsu bu go.
Gusunɔ
u Dɑniɛli dosu ge sɔ̃ɔwɑ
14 Sɑnɑm mɛ Ariɔku sinɑ bokon kirukubɑn guro guro u yɑrɑ u kɑ Bɑbilonin bwisigii be go, Dɑniɛli u kɑ nùn gɑri kuɑ kɑ bwisi kɑ lɑɑkɑri. 15 U nɛɛ, ɑmɔnɑ sinɑ bokon woodɑ yeni yɑ kɑ dɑm mɔ mɛ. Yerɑ Ariɔku u nùn gɑri yin ɑsɑnsi tubusiɑ. 16 Mɑ Dɑniɛli u dɑ sinɑ bokon mi u nùn kɑnɑ u nùn deri sɑɑ fiiko, kpɑ u wɑ u nùn dosu ge tubusiɑ.
17 Mɑ Dɑniɛli u wurɑ dirɔ u win kpɑɑsibu Hɑnɑniɑ kɑ Misɛli kɑ Asɑriɑ gɑri yi sɔ̃ɔwɑ. 18 Mɑ u bu yiire bu Wɔrukoo kɑnɑ u ben wɔnwɔndu wɑ kpɑ u bu dosu ge sɔ̃ kpɑ bu ku rɑɑ bu go kɑ bwisigii be sɑnnu.
19 Yen biruwɑ Gusunɔ u Dɑniɛli dosu ge sɔ̃ɔwɑ wɔ̃kuru, kɑ̃siru sɔɔ. Mɑ Dɑniɛli u nùn siɑrɑ. U nɛɛ,
20 Yinni Gusunɔ,
wunɑ ko nɑ n siɑrɑmɔ kɑ bɑɑdommɑɔ.
Wunɑ ɑ bwisi kɑ dɑm mɔ.
21 Wunɑ ɑ rɑ sɑɑbɑ gɔsie.
Wunɑ ɑ rɑ sinɑmbu bɑndu wɛ̃.
Wunɑ ɑ rɑ mɑɑ bu bɑndu yɑre.
Wunɑ ɑ rɑ lɑɑkɑrigibu lɑɑkɑri wɛ̃,
kpɑ ɑ bwisigibu yɛ̃ru kɛ̃.
22 Wunɑ ɑ rɑ tɔnu sɔ̃ɔsi ye yɑ beruɑ,
ye u ǹ kpɛ̃ u kɑ tii tubu.
A yɛ̃ ye yɑ wɑ̃ɑ wɔ̃kuru sɔɔ.
Domi yɑm bururɑm mu rɑ n wɑ̃ɑwɑ wunɛn mi.
23 Gusunɔ nɛn bɑɑbɑbɑn Yinni, nɑ nun siɑrɑmɔ.
Nɑ tɑkɑru mɔ̀ bwisi kɑ dɑm mɛ ɑ mɑn kɑ̃n sɔ̃.
Domi ɑ mɑn sɔ̃ɔsi ye sɑ nun bikiɑ.
A sun sinɑ bokon dosu ge sɔ̃ɔwɑ.
24 Yen biru, Dɑniɛli u dɑ Ariɔkun mi, wi sinɑ boko u woodɑ wɛ̃ u kɑ Bɑbilonin bwisigibu go. Mɑ u nùn sɔ̃ɔwɑ u nɛɛ, ɑ ku tɔn be go. A de ɑ kɑ mɑn dɑ sinɑ bokon mi. Kpɑ n nùn win dosu ge tubusiɑ.
25 Mɑ Ariɔku u kɑ Dɑniɛli dɑ fuuku sinɑ bokon mi. Ye bɑ turɑ mi, yerɑ u sinɑ boko sɔ̃ɔwɑ u nɛɛ, wee nɑ durɔ goo wɑ Yudɑ be bɑ mwɛɛrimɑ sɔɔ, wi u koo nun wunɛn dosu ge tubusiɑ.
Dɑniɛli u sinɑ boko dosu ge
sɔ̃ɔwɑ kɑ gen tubusiɑnu
26 Mɑ sinɑ boko u Dɑniɛli wi bɑ mɑɑ yĩsiru kɑ̃ Bɛlitɑsɑɑ bikiɑ u nɛɛ, kɑɑ kpĩ ɑ mɑn nɛn dosu gen tii sɔ̃ kɑ gen tubusiɑnu?
27 Dɑniɛli u sinɑ boko sɔ̃ɔwɑ u nɛɛ, bwisigibu kɑ sɔrobu kɑ dobo dobogibu kɑ bũu sinɑmbu bɑ ǹ kpɛ̃ bu nun ɑsiri ye ɑ bikiɑ mini sɔ̃. 28 Adɑmɑ Yinni goo wɑ̃ɑ wɔllɔ wi u rɑ tɔnu ɑsiri sɔ̃ɔsi, wiyɑ Gusunɔ. U mɑɑ nun sɔ̃ɔsi ye n koo koorɑ. Sɑnɑm mɛ ɑ kpĩ, ye ɑ dosɑ kɑ ye ɑ wɑ kɑ̃siru sɔɔ wee. 29 Siɑn bwisikunɑ ɑ mɔ̀. Yerɑ wi u rɑ tɔnu ɑsiri sɔ̃ɔsi u nun sɔ̃ɔsi ye n koo koorɑ. 30 Adɑmɑ bɑ ǹ mɑn ɑsiri ye sɔ̃ɔsi yèn sɔ̃ nɑ tɔn be bɑ tie bwisi kere. Bɑ mɑn ye sɔ̃ɔsiwɑ kpɑ n kɑ nun tubusiɑ kpɑ ɑ n kɑ yɛ̃ ye ɑ bwisikɑ wunɛn gɔ̃ruɔ.
31 Sinɑ boko, ye ɑ wɑ wee. Bwɑ̃ɑroku bɔkɔ gɑgɑ gɑ yɔ̃ wunɛn wuswɑɑɔ. Bwɑ̃ɑroku ge, gɑ gunu, gɑ bɑllimɔ gem gem. Mɑ gɑ nɑnum mɔ n kpɑ̃. 32 Gen wiru tɑ sɑ̃ɑwɑ wurɑ geɑn tii tii. Gen tororu kɑ gen gɑ̃senu mɑɑ sɑ̃ɑ sii geesu. Gen nukuru kɑ gen tɑɑnu mɑɑ sɑ̃ɑ sii gɑndu. 33 Gen kɔ̃ri yi mɑɑ sɑ̃ɑ sii wɔ̃kusu. Mɑ gen nɑɑsu sɑ̃ɑ sii wɔ̃ku si bɑ kɑ sɔndu mɛnnɑ. 34 Sɑnɑm mɛ ɑ gu mɛɛrɑ, yerɑ kperu gɑru tɑ mɛndɑmɑ guurun di te goo kun kɑrɑmɛ. Tɑ nɑ tɑ gen nɑɑsu so tɑ kɔsukɑ muku muku. 35 Mɑ sii wɔ̃ku si, kɑ sɔn te, kɑ sii gɑn te, kɑ sii gee si, kɑ wurɑ ye, ye kpuro yɑ sunkurɑ muku muku. Mɑ yɑ kuɑ nge doo diri yi bɑ sɑrɑ sɔ̃ɔ sɑ̃rerun sɑɑ. Mɑ yi kɑ woo doonɑ. Bɑɑ yin yirɑ ɑ ǹ mɑɑ kpɛ̃ ɑ wɑ. Adɑmɑ kpee te tɑ bwɑ̃ɑroku ge so mi, tɑ gɔsirɑwɑ guu bɑkɑru. Mɑ tɑ hɑnduniɑn tem kpuro wukiri.
36 Dosu geyɑ mi. Tɛ̃, gen tubusiɑnu wee. 37-38 Wunɛ sinɑ boko, wunɑ ɑ sɑ̃ɑ sinɑmbun sunɔ. Wunɑ ɑ sɑ̃ɑ nge wii wurɑgii te. Wɔrukoowɑ u nun bɑndu kɑ dɑm kɑ yiiko kɑ bɛɛrɛ wɛ̃. Mɑ u nun tɔmbu kɑ gbeeku yɛɛ kɑ gunɔsu nɔmɑ bɛriɑ ɑ n kɑ sɑ̃ɑ ye kpuron yinni. 39 Wunɛn biru, bɑndu gɑru tɑ koo se te tɑ ǹ wunɛgiru dɑm turɑ. Yen biru, bɑndu itɑseru gɑrɑ koo mɑɑ se kpɑ tɑ n dɑm mɔ hɑnduniɑ kpuro sɔɔ. Terɑ tɑ sɑ̃ɑ nge sii gɑndu. 40 Mɑ bɑndu nnɛseru gɑrɑ koo mɑɑ se, kpɑ tɑ n dɑm mɔ nge sii wɔ̃kusu si su rɑ gɑ̃ɑnu kpuro kɔsuku. Nge mɛyɑ bɑn te, tɑ ko n dɑm mɔ tu kɑ bɑnnu kpuro kɔsuku. 41 Mɛyɑ ɑ mɑɑ wɑ mɑ bwɑ̃ɑroku gen nɑɑsu kɑ gen niki binu sɑ̃ɑwɑ sii wɔ̃kusu si bɑ mɛnnɑ kɑ sɔndu. Yen tubusiɑnɑ bɑn te, tɑ ko n bɔnu sɑ̃ɑwɑ yiru. Kɑ mɛ, bɔnu tiɑ yɑ ko n dɑm mɔ nge sii wɔ̃ku si. 42 Kpɑ bɔnu tiɑ yu dɑm biɑ nge nɑɑ niki bii ni nu sɑ̃ɑ sii wɔ̃ku si bɑ kɑ sɔndu mɛnnɑ. 43 Sii wɔ̃kusu kɑ sɔn te ɑ wɑ yɑ mɛnnɛ mi sɑnnu, yɑ mɑɑ sɔ̃ɔsimɔ mɑ bɑn ten wirugibu bɑ ko n kɑsu ben bibu bu suɑnɑ kpɑ bwesenu nu kɑ ko tiɑ. Adɑmɑ yɑ ǹ koorɔ nge mɛ yɑ ǹ koorɔ sisu kɑ sɔndu bu ko tiɑ.
44-45 Kpee te ɑ wɑ tɑ mɛndɑmɑ kɑ tii mi, mɑ tɑ sii wɔ̃ku si, kɑ sii gɑn te, kɑ sɔn te, kɑ sii gee si, kɑ wurɑ ye kpuro kɔsukɑ muku muku mi, ten tubusiɑnɑ, bɑn ten sinɑmbun wɑɑti sɔɔ, Wɔrukoo u koo bɑndu gɑru swĩi. Goo sɑri wi u koo bɑn te fukɑ. Bweseru gɑru mɑɑ sɑri te tɑ koo tu yoru diisiɑ. Bɑn te, tɑ koo bɑn ni nu tie kpeerɑsiɑ kpɑ te tɔnɑ tɑ n wɑ̃ɑ sere kɑ bɑɑdommɑɔ. Gusunɔ Dɑm kpurogii wiyɑ u nun sɔ̃ɔsi ye n koo koorɑ. Ye ɑ wɑ wunɛn dosu ge sɔɔ kpuro, yɑ weewɑ win min di. Yen tubusiɑnu mɑɑ sɑ̃ɑwɑ nge mɛ nɑ nun sɔ̃ɔwɑ.
46 Yerɑ sinɑ boko Nɛbukɑnɛsɑɑ u yiirɑ u wiru tem girɑri Dɑniɛlin wuswɑɑɔ. Mɑ u derɑ bɑ yɑ̃kuru kuɑ kɑ turɑre bu kɑ Dɑniɛli siɑrɑ. 47 Sinɑ boko u Dɑniɛli sɔ̃ɔwɑ u nɛɛ, kɑ geemɑ bɛɛn Yinni wini u bũnu kpuro kere, u mɑɑ sɑ̃ɑwɑ sinɑmbun Yinni. Wiyɑ u rɑ tɔnu gɑri ɑsirigii sɔ̃. Domi u derɑ ɑ kpĩɑ ɑ gɑri ɑsirigii yini geruɑ.
48 Yerɑ sinɑ boko u Dɑniɛli kuɑ tɔn boko win bɑndu sɔɔ. Mɑ u nùn kɛ̃ɛ bɑkɑ dɑbinu kɑ̃. Yen biru, u nùn kuɑ Bɑbilonin berɑn wirugii kɑ mɑɑ yen bwisigibun tɔnwero. 49 Mɑ Dɑniɛli u sinɑ boko kɑnɑ u Sɑdɑki kɑ Mɛsɑki kɑ Abɛnɛgo Bɑbilonin berɑ ye nɔmu bɛriɑ. Mɑ win tii u kuɑ sinɑ bokon bwisi kɛ̃ɔ.