Luda yã takada kũ Bisã yão DOKAGBƐSISINAA 34

Musa ganaa

1 Musa bò Mↄabunↄ bùsu sɛ̃̀ntɛ à dìdi Nɛbo kpia ari Pisiga kpi mìsↄ̃ntɛ kũ à arɛ dↄ Yɛrikoa, akũ Dikiri bùsuu pìi mↄ̀nɛ pínki zaa Giliada bùsun ari Daninↄ bùsun 2 kũ Nafatalinↄ bùsuuo pínki kũ Ɛflaimunↄ bùsuuo kũ Manasenↄ bùsuuo kũ Yudanↄ bùsuuo pínki ari ísira kũ à kú ifãlɛtɛ kpa 3 kũ Nɛgɛvio kũ Yɛriko wɛ̃tɛ dominalide guvutɛo ari Zoa. 4 Akũ Dikiri pìnɛ: Bùsu kũ ma la dà Ibrahĩnɛ kũ Isaakuo kũ Yakubuo ma pì mani kpá ń burinↄaa pìin gwe. Ma tò n wɛ́ sìalɛ, ama ĩni bikũ Yodaa ǹ gɛ̃nlo.

5 Akũ Dikiri zↄ̀bleri Musa gà Mↄabunↄ bùsun gwe lákũ Dikiri ò nà. 6 Akũ Dikiri a vĩ̀ guvutɛn gwe Bɛtɛpeo kpa. Gbɛ̃ke a mira ki dↄ̃ro ari kũ a gbãrao. 7 Musa gà a wɛ̃̀ basuddode gũmmɛ. A wɛ́ nna akũsↄ̃ a gbãna dí lagoro. 8 Isarailanↄ a gɛ̀ɛ kɛ̀ gↄrↄ baraakuri Mↄabunↄ bùsu sɛ̃̀ntɛ, akũ a gɛ̀kɛna kũ ↄ́ↄdↄo làka.

9 Ɔ̃ndↄ̃ pàpa Nuni nɛ́ Yↄsuaa kũ Musa ↄ nàa yãi. Isarailanↄ a yã mà, ò kɛ̀ lákũ Dikiri dà Musanɛ nà. 10 Annabi ke dí bo Isarailanↄ gũn lán Musa bà doro. Àdi yã o kũ Dikirio tɛ̃tɛ̃ntɛ̃ 11 akũsↄ̃ à sèedanↄ kũ daboyã kũ Dikiri à zĩ̀onↄ kɛ̀ Misila, Firi'auna kũ a ìbanↄ kũ a gbɛ̃nↄ arɛ ń pínki. 12 Gbɛ̃ke dí yã naasi zↄ̃kↄ̃ kɛ kũ iko gbãnao lán Musa bà Isarailanↄ wɛ́ sìalɛ doro.