Luda yã takada kũ Bisã yão NAANAA 11

Babɛli kpɛ́didikↄ̃anaa

1 Andunia gũn yã pínki buri mɛ̀n domɛ, yã dokↄ̃nↄn òdi o. 2 Lákũ gbɛ̃nↄ tɛn sↄ̃sↄ̃ ifãboki kpa nà, kũ ò kà Babilↄnia bùsu gusaran, akũ ò vùtɛ gwe. 3 Ò pìkↄ̃nɛ: Ò gɛ́ ò kúnku bo ò kpáta manamana. Kúnkumɛ ń gbɛ̀ ũ, ↄ̀daamɛ ń simiti ũ. 4 Akũ ò pì: Ò wɛ́ra kátɛ ò kpɛ́didikↄ̃ana bo a mìsↄ̃ntɛ zↄ̃ ludambɛa. Ò ó zĩda tↄ́ bo de òsungↄ̃ fãkↄ̃ana dodo andunia gũnlo yãi.

5 Akũ Dikiri kìpa à wɛ́ra pìi gwà kũ kpɛ́ lei kũ bisãsirinↄ bòoo. 6 Akũ à pì: Ń pínki ń buri dokↄ̃nↄmɛ, yã dokↄ̃nↄn òdi o, akũ yã kũ òtɛn boon dí yá? Yã kũ ò a laasun lɛ̀ tera sà oni kɛmɛ, pↄ́ke ni kpáńnɛ a kɛnaa gũn doro. 7 Ò kipa ò gɛ́ gwe ò ń yã yãkatɛńnɛ de òsun kↄ̃ yã ma doro. 8 Akũ Dikiri ń fãkↄ̃a gwe dodo andunia gũn pínki, akũ ò ń wɛ́ra katɛnaa tò. 9 A yã mɛ́ à tò, ò tↄ́ kpà wɛ̃tɛ pìinɛ Babɛli, zaakũ gwen Dikiri tò andunia buri sĩnda pínki yã bòn. Zaa gwen à ń fãkↄ̃a andunia gũn pínki.

Sɛmu kũ Terao burinↄ

10 Sɛmu burinↄ yãn dí. Sɛmu wɛ̃̀ basↄↄrode gũn à Apasada ì ídana anduniala gbɛra wɛ̃̀ pla. 11 A gbɛra à kɛ̀ wɛ̃̀ wàa pla kpɛ́ basↄↄro à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

12 Apasada wɛ̃̀ baraakuri awɛɛsↄↄrode gũn à Sela ì. 13 A gbɛra à kɛ̀ wɛ̃̀ wàa pla kũ aakↄ̃o à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

14 Sela wɛ̃̀ baraakuride gũn à Eberu ì. 15 A gbɛra à kɛ̀ wɛ̃̀ wàa pla kũ aakↄ̃o à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

16 Eberu wɛ̃̀ baraakuri awɛɛsiikↄ̃de gũn à Pɛlɛgi ì. 17 A gbɛra à kɛ̀ wɛ̃̀ wàa pla kũ baraakurio à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

18 Pɛlɛgi wɛ̃̀ baraakuride gũn à Rɛu ì. 19 A gbɛra à kɛ̀ wɛ̃̀ wàa do awɛɛkɛ̃ndo à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

20 Rɛu wɛ̃̀ baraakuri awɛɛplade gũn à Serugu ì. 21 A gbɛra à kɛ̀ wɛ̃̀ wàa do awɛɛsuppla à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

22 Serugu wɛ̃̀ baraakuride gũn à Nao ì. 23 A gbɛra à kɛ̀ wɛ̃̀ wàa do à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

24 Nao wɛ̃̀ baraakuri donsaride gũn à Tera ì. 25 A gbɛra à kɛ̀ wɛ̃̀ basuddo donsari à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.

26 Tera kɛ̀ wɛ̃̀ baaakↄ̃ akuri, akũ à Abramu kũ Nao kũ Aranao ì. 27 Tera burinↄ yãn dí. Tera Abramu kũ Nao kũ Aranao ì, akũ Arana Lutu ì. 28 Arana gà a de Tera wára zaa Urumɛ Kaladia bùsun, gu kũ ò a ìn. 29 Abramu kũ Nao nↄ sɛ̀. Abramu nanↄ tↄ́n Sarai, Nao nanↄ sↄ̃ tↄ́n Milika, Arana nɛ́. Arana pì mɛ́ à Isika ì dↄ. 30 Sarai sↄ̃ paramɛ, adi nɛ́ iro.

31 Akũ Tera a nɛ́ Abramu kũ a daikore Lutuo kũ Abramu nanↄ Saraio sɛ̀ bona Uru, Kaladia bùsun, òtɛn gɛ́ Kanaanↄ bùsun. Kũ ò kà Arana, ò vùtɛ gwe. 32 Tera wɛ̃̀ wàa do awɛɛsↄↄrode gũnn à gà zaa Arana.