Luda yã takada kũ Bisã yão NAANAA 12

Dikiri ona Abramunɛ à bo a bùsun

1 Dikiri pì Abramunɛ:

Ǹ bo n bùsun n danɛnↄ tɛ́ n de bɛa,

ǹ tá bùsu kũ mani mↄnnɛn.

2 Mani tó n buri kɛ dasi,

mani arubarika dangu mà n tↄ́ bo,

n kĩnaan onigↄ̃ arubarika len.

3 Mani arubarika da gbɛ̃ kũ oni sa mana onnɛnↄn,

mani gbɛ̃ kũ oni sa vãni onnɛnↄ ká.

Andunia buri sĩnda pínki ni arubarika le n gãi.

4 Akũ Abramu dà zɛ́n lákũ Dikiri ònɛ nà. Lutu gɛ̀ɛ kãao. A wɛ̃̀ baaakↄ̃ akuri awɛɛsↄↄrode gũn à bò Arana 5 kũ a nanↄ Saraio kũ a vĩ̀ni nɛ́ Lutuo kũ ń aruzɛkɛ kũ ò vĩnↄ kũ gbɛ̃ kũ ò sɛ̀ gwenↄ. Lɛn ò bò Arana lɛ ò dà Kanaa zɛ́n. Kũ ò kà gwe, 6 akũ ò gɛ̃̀tɛ bùsuu pìn ari ò kà Mↄre gbiri lí kĩnaa Sɛkɛmu. Kanaanↄn kú bùsuu pìn gↄrↄ birea. 7 Akũ Dikiri bò à sù Abramua à pì: Mani bùsu dí kpá n burinↄamɛ. Akũ à Dikiri gbagbaki bò gwe. 8 Kũ à fùtɛ gwe, à mìi pɛ̀ kpi kũ ò kú Bɛtɛli ifãboki kpanↄa, akũ à bùraa kàtɛ gwe, Bɛtɛli kú ifãlɛtɛ kpa, Ai kú ifãboki kpa. À Dikiri gbagbaki bò gwe dↄ, akũ à a sìsi. 9 Akũ à dà zɛ́n dↄ à mìi pɛ̀ Nɛgɛvia.

10 Kũ nàa kà bùsuu pìn, akũ Abramu gɛ̀ɛ gↄrↄ pla kɛ Misila, zaakũ nàa pìi gɛ̃̀ ↄla. 11 Kũ à kà kãni kũ Misilao, à pì a nanↄnɛ: Má dↄ̃ nↄ manamɛ n ũ. 12 Tó Misilanↄ n e, oni pi ma nanↄmɛ n ũ, oni ma dɛ oni n tó. 13 Ǹ pińnɛ ma dãremɛ n ũ de ò ma sí ↄplapla n yãi. Lákũ ĩni ma mì sí nàn gwe. 14 Kũ ò kà Misila, Misilanↄ è nↄgbɛ̃ pì mana gɛ̃̀. 15 Kũ Misilanↄ kína Firi'auna ìbanↄ a è, ò a mana gↄ̃̀gↄ̃nɛ, akũ ò a sɛ̀ ò gɛ̃̀ kãao Firi'aunanɛ a bɛa. 16 Akũ à Abramu gwà manamana a yãi, à sãnↄ kpàa kũ zùnↄ kũ zaakinↄ kũ gↄ̃gbɛ̃ zĩkɛrinↄ kũ nↄgbɛ̃ zĩkɛrinↄ kũ lakuminↄo. 17 Akũ Dikiri gyã pãsĩnↄ kà Firi'aunagu kũ a bedenↄ Abramu nanↄ pì yãi. 18 Akũ Firi'auna Abramu sìsi à pìnɛ: Bↄ́ yã n kɛ̀mɛnɛ gwee? Bↄ́ yã mɛ́ à tò ńdi omɛnɛ kũ n nanↄnloo? 19 À kɛ̀ dera n pì n dãremɛ, akũ ma a sɛ̀ nↄ ũu? N nↄn di! Ǹ n pↄ́ sɛ́ ǹ táo. 20 Firi'auna yã ò a gbɛ̃nↄnɛ Abramu yã musu, akũ ò gɛ̀ɛ ò zɛ̀nɛ kũ a nanↄo kũ a aruzɛkɛnↄ pínki.