Luda yã takada kũ Bisã yão NAANAA 16

Hazara kũ a nɛ́ Sumailao

1 Abramu nanↄ Sarai dí nɛ́ iro. À nↄgbɛ̃ zĩkɛri vĩ Misila gbɛ̃ ũ kũ òdi pinɛ Hazara. 2 Akũ Sarai pì Abramunɛ: Lákũ Dikiri ma kɛ para ũ nà, ǹ wútɛ kũ ma zĩkɛriio. Ma sì kũ mani nɛ́nↄ le a gãi. Akũ Abramu Sarai yã mà. 3 Abramu wɛ̃̀ kuri kɛna Kanaanↄ bùsun gbɛran Sarai a zĩkɛri Hazara kpàa nↄ ũ. 4 Abramu wùtɛ kãao, akũ à nↄ̀ↄ sì. Kũ à è á nↄ̀sinaa, à dↄkɛ̀ kũ a dikiriio. 5 Akũ Sarai pì Abramunɛ: Taari kũ ò kɛ̀mɛnɛ gↄ̃̀ n yã ũmɛ. Ma a zĩkɛrii kpàmma. Kũ à è á nↄ̀sina, akũ àdigↄ̃ dↄkɛ kũmao. Mↄkↄ̃n kũ makũo, Dikiri mɛ́ ani yã gↄ̃gↄ̃wɛrɛ. 6 Akũ Abramu wèa à pì: N zĩkɛri kun n pↄ́ ũmɛ. Ǹ kɛnɛ lákũ ń yei nà. Kũ Sarai wari dↄ̀a, akũ à bàa lɛ̀nɛ.

7 Dikiri Malaika a è ísɛ̃bokia gbárannan, ísɛ̃boki pì kú Suru zɛ́ sarɛmɛ. 8 Akũ à a là à pì: Sarai zĩkɛri Hazara, n bo mámɛɛ? Ntɛn gɛ́ mámɛɛ? Akũ à wèa à pì: Matɛn bàa lɛ́ ma dikiri Sarainɛmɛ. 9 Akũ Dikiri Malaikaa pìnɛ: Ǹ ɛra ǹ tá n dikirii pì kĩnaa ǹgↄ̃ mì natɛnɛ.

10 Mani n buri kara ògↄ̃ dasi,

oni fↄ̃ ò ń lɛ́ dↄ̃ro.

11 Ń nↄ̀sina, ĩni nɛ́ i gↄ̃gbɛ̃ ũ,

ĩni tↄ́ kpánɛ Sumaila,

zaakũ Dikiri n yã mà n wɛ́tãmma gũn.

12 Anigↄ̃ de lán zaakisɛ̃ntɛ bà,

ani ibɛrɛ sɛ́ kũ gbɛ̃ sĩnda pínkio,

gbɛ̃ sĩnda pínki ni ibɛrɛ sɛ́ kãao se.

Anigↄ̃ kú kↄ̃ yãn kũ a gbɛ̃nↄro.

13 Akũ Hazara pì: Ma wɛ́ sì Luda kũ àdi ma elɛ. Akũ à tↄ́ kpà Dikiri kũ à yã ònɛɛnɛ Ludakũadima'e. 14 A yã mɛ́ à tò ò tↄ́ kpà lↄ̀gↄↄ pìinɛ Ludabɛ̃nɛkũadima'e lↄ̀gↄↄ. À kú Kadɛsi kũ Bɛrɛdio daguramɛ.

15 Hazara nɛ́gↄ̃gbɛ̃ ì kũ Abramuo, akũ Abramu tↄ́ kpànɛ Sumaila. 16 Gↄrↄ kũ Hazara Sumaila ì, Abramu wɛ̃̀ basiikↄ̃ awɛɛsuddomɛ.