17
Tↄ̃̀zↄ̃yã
Kũ Abramu kà wɛ̃̀ basↄↄro donsari, Dikiri bò à sùa à pì: Luda Gbãnasĩndapinkiden ma ũ. Ǹ táa o kũmao ǹgↄ̃ kun taari sari. Ma bàka kunna kũnwo nigↄ̃ gɛ́, mani n buri karannɛ manamana. Abramu wùtɛ a gbɛrɛa Luda arɛ, akũ Luda pìnɛ: Lákũ ma bàka kú kũnwo nà, ĩni gↄ̃ buri dasinↄ dizi ũ. Onigↄ̃ pinnɛ Abramu doro, sé Ibrahĩ, zaakũ mani n kɛ buri dasinↄ dizi ũ. Mani tó n buri kɛ dasi, burinↄ kũ kínanↄ ni bo n kĩnaa. Ma bàka nigↄ̃ kú kũnwo kũ n burinↄ ari gↄrↄ sĩnda pínki. Manigↄ̃ de n Luda ũ kũ n burinↄ n gbɛra. Mani Kanaanↄ bùsu kũ ń kú a gũn nibↄ ũ kpámma pínki kũ n burinↄ n gbɛra, de ògↄ̃ vĩ gↄrↄ sĩnda pínki, manigↄ̃ de ń Luda ũ.
Luda ɛ̀ra à pì Ibrahĩnɛ: Mↄkↄ̃n kũ n burinↄ, àgↄ̃ ma bàka kunna kãáo yã kũna ari á buria. 10 Ma bàka kuna kãáo yã kũ ánigↄ̃ kũnan dí, mↄkↄ̃n kũ n burinↄ. Séde á gↄ̃gbɛ̃ sĩnda pínki tↄ̃̀ zↄ̃. 11 À tↄ̃̀ zↄ̃ ma bàka kunna kãáo sèeda ũ. 12 Séde n buri nɛ́gↄ̃gbɛ̃nↄ tↄ̃̀ zↄ̃ ń gↄrↄ sↄraakↄ̃de zĩ ari ń buria, nɛ́ kũ ò ń í n bɛanↄ kũ zĩkɛri kũ ò ń lú buri pãndenↄanↄ ń pínki. 13 Ò a ì n bɛan yá kesↄ̃ ò a lù zĩkɛri ũn yá, sé à tↄ̃̀ zↄ̃. Abire nigↄ̃ de ma bàka kunna kãáo gↄrↄ sĩnda pínki sèeda ũ á mɛ̀ɛa. 14 Oni gyↄfↄrↄde bo a gbɛ̃nↄ tɛ́, zaakũ gbɛ̃ kũ adi tↄ̃̀ zↄ̃ro yã kũ ma dìtɛárɛ kũnaro.
15 Akũ Luda ɛ̀ra à pì Ibrahĩnɛ: Ǹsun pi n nanↄnɛ Sarai doro, ǹgↄ̃ pinɛ Sara sà. 16 Mani arubarika dan mà tó à nɛ́ i gↄ̃gbɛ̃ ũ, ani gↄ̃ burinↄ dai ũ, bùsu kínanↄ ni bo a kĩnaa. 17 Akũ Ibrahĩ wùtɛ a nɛ̀sɛlɛ kutɛna Luda arɛ à yáa dↄ̀ à pì a nɛ̀sɛɛ gũn: Gbɛ̃ kũ à kà wɛ̃̀ basↄↄro ni nɛ́ i yá? Lákũ Sara kà wɛ̃̀ basiikↄ̃ akuri nà, ani nɛ́ i yá? 18 Akũ à ɛ̀ra à pì Ludanɛ: Ǹ sùru kɛ ǹ Sumaila gwa. 19 Luda pì: Yãpura n nanↄ Sara ni nɛ́ i gↄ̃gbɛ̃ ũ, ĩni tↄ́ kpánɛ Isaaku. Ma bàka nigↄ̃ kú kãao kũ a burinↄ ari gↄrↄ sĩnda pínki. 20 Sumaila yã musu, ma n yã mà. Mani arubarika dan, ani nɛ́ i à kara manamana. Ani nɛ́gↄ̃gbɛ̃nↄ i gbɛ̃nↄn kuri awɛɛpla, oni gↄ̃ kínanↄ ũ, a buri ni kɛ dasi. 21 Bee kũ abireo ma bàka kunna kũnwo ni gↄ̃ Isaakuamɛ. Ziki mandara'i Sara ni a i. 22 Kũ Luda yã ò Ibrahĩnɛ à làka, akũ à a tò à tà musu.
23 Akũ Ibrahĩ a nɛ́ Sumaila sɛ̀ kũ a bɛ gↄ̃gbɛ̃ kũ ò ń í a bɛanↄ kũ zĩkɛri kũ ò ń lúnↄ ń pínki, akũ à tↄ̃̀ↄ zↄ̃̀ńnɛ gↄrↄ birea gↄ̃̀nↄ lákũ Luda ònɛ nà. 24 Ibrahĩ kà wɛ̃̀ basↄↄro donsari, gbasa à tↄ̃̀ↄ zↄ̃̀, 25 a nɛ́ Sumaila sↄ̃ wɛ̃̀ kuri awɛɛ'aakↄ̃. 26 Gↄrↄ dokↄ̃nↄ pì zĩ Ibrahĩ tↄ̃̀ↄ zↄ̃̀ kũ a nɛ́ Sumailao 27 kũ a bɛ gↄ̃gbɛ̃ kũ ò ń í a bɛanↄ kũ zĩkɛri kũ ò ń lú buri pãndeanↄ ń pínki. Ò tↄ̃̀ↄ zↄ̃̀ gↄrↄ dokↄ̃nↄ zĩmɛ.