Luda yã takada kũ Bisã yão NAANAA 23

Sara ganaa

1 Sara kɛ̀ wɛ̃̀ basuddo awɛɛsuppla, 2 gbasa à gà zaa Kiriataba kũ òdi pi tera Ɛblↄnu, Kanaanↄ bùsun. Akũ Ibrahĩ a wɛ̃nda kɛ̀ à ↄ́ↄ dↄ̀ a gana yã musu. 3 Kũ à gò a nanↄ gɛ̀ kĩnaa, à gɛ̀ɛ à pì Iti burinↄnɛ: 4 Nibↄ kũ gbɛ̃ zĩ̀tↄↄon ma ũ á tɛ́. À zĩtɛ yíama ma gɛ̀vĩki ũ mà gɛ̀ vĩn. 5 Akũ Iti burinↄ pìnɛ: 6 Mare, ǹ ó yã ma. Luda gbɛ̃ arubarikademɛ n ũ ó tɛ́. Ǹ n gɛ̀ vĩ gbɛ̀wɛɛ kũ à kɛ̀nnɛ mana gũn. Ó gbɛ̃ke ni n tɛ̃ gbɛ̀wɛɛ kũ ĩni n gɛ̀ vĩ a gũnlo. 7 Akũ Ibrahĩ fùtɛ à kùtɛ bùsupidenↄnɛ 8 à pìńnɛ: À ma yã ma, tó a we mà a gɛ̀ vĩ la. À wɛ́ kɛmɛnɛ Zoa nɛ́ Ɛflↄnua 9 à Makpɛla gbɛ̀wɛɛ kũ à kú a bú lɛ́i yíama a ↄgↄa, ani gↄ̃ ma gɛ̀vĩki ũ á bùsun.

10 Ɛflↄnu vutɛna ń tɛ́ a wɛ̃tɛ bĩnilɛa gwe, akũ à ò Ibrahĩnɛ Itinↄ wára ń pínki à pì: 11 Oi mare, ǹ ma yã ma. Ma n gba bura pì kũ gbɛ̀wɛɛ kũ à kú gweo. Ma n gba ma gbɛ̃nↄ wára. Ma n gbamɛ, de ǹ n gɛ̀ vĩn. 12 Ibrahĩ kùtɛ bùsupidenↄnɛ, 13 akũ à pì Ɛflↄnunɛ ń pínki wára: Ǹ sã kpá ǹ ma yã ma. Mani bura pì fĩna bonnɛ. Ǹ ma ↄgↄ sí, mani ma gɛ̀ vĩn. 14 Akũ Ɛflↄnu pìnɛ: 15 Mare, ǹ ma yã ma. Zĩtɛ kũ a ↄgↄ kà andurufu wàa plamɛ, bↄ́n abire ũ ó daguraa? Ǹ n gɛ̀ vĩn. 16 Ibrahĩ a yã mà, akũ à andurufu kũ à òo yↄ̃̀nɛ gbɛ̃nↄ wára lagatarinↄ zakaaa. 17 Lɛmɛ Ɛflↄnu bú kũ à kú Makpɛla, Mamare sarɛ, gↄ̃̀ Ibrahĩ pↄ́ ũ lɛ kũ gbɛ̀wɛɛ kũ à kú gweo kũ lí kũ ò kú gwenↄ zaa bú pì lɛ́i pínki. 18 À gↄ̃̀ Ibrahĩ pↄ́ ũ Iti kũ ò sù wɛ̃tɛ bĩnilɛanↄ pínki wára.

19 Abire gbɛra Ibrahĩ a nanↄ vĩ̀ Makpɛla bura gbɛ̀wɛɛ pìi gũn Mamare kũ òdi pi tera Ɛblↄnu sarɛ, Kanaanↄ bùsun. 20 Lɛn bú kũ gbɛ̀wɛɛ kũ à de Itinↄ pↄ́ ũ yãoo gↄ̃̀ Ibrahĩnɛ gɛ̀vĩki ũ lɛ.