24
Nↄwɛtɛna Isaakunɛ
Ibrahĩ zĩ kũ̀ a gↄrↄnↄ kà zã̀, akũ Dikiri arubarikaa dàagu yã sĩnda pínki gũn. Akũ à ò a zĩkɛrinↄ gbɛ̃ zↄ̃kↄ̃ kũ à de a pↄ́ sĩnda pínki yãgↄ̃gↄ̃ri ũnɛ à pì: Ǹ ↄ sↄtↄ ma gbáda gbáru, mani tó ǹ la da kũ Dikiri, musu kũ zĩtɛo Luda tↄ́o kũ ĩni Kanaa kũ má kú ń tɛ́nↄ nↄ sɛ́ ma nɛ́nɛro. Ǹ gɛ́ ma bɛ bùsun ma danɛnↄ gũn, ǹ nↄ sɛ́ ma nɛ́nɛ gwe. Akũ a zĩkɛrii pì a là à pì: Tó nↄgbɛ̃ pì dí we à tɛ̀mai à sù kũmao bùsu díkĩnan sↄ̃ro bi? Mani gɛ́ kũ n nɛ́o bùsu kũ n bonn yá? Ibrahĩ pìnɛ: Ǹ laakari kɛ! Ǹsun gɛ́ kũ ma nɛ́o gwero. Dikiri Luda Musude ma bo ma de bɛa ma danɛnↄ bùsun, akũ à yã òmɛnɛ à la dà à pì, áni bùsu díkĩna kpá ma burinↄamɛ. Àkũ mɛ́ ani a Malaika zĩ à donnɛ arɛ. Gwen ĩni nↄ sɛ́n ma nɛ́nɛ. Tó nↄgbɛ̃ pì dí we à tɛ̀nyĩro, n bo ladana kũ n la dàmɛnɛ dí gũn. Ǹsun gɛ́ gwe kũ ma nɛ́oro fá! Akũ a zĩkɛrii pì a ↄ sↄ̀tↄ a dikiri gbáda gbáru, à la dànɛ yã pìi musu.
10 Zĩkɛrii pì a dikiri lakuminↄ sɛ̀ mɛ̀n kuri kũ a dikiri aruzɛkɛ buri pínkio, akũ à fùtɛ à gɛ̀ɛ Nao bɛ wɛ̃tɛn zaa Siria Mɛsↄpↄtamia bùsun. 11 Kũ à kà gwe, à tò lakuminↄ kámma bò lↄ̀gↄↄ sarɛ wɛ̃tɛ kpɛ. Kũ ↄkↄsi kɛ̀, gↄrↄ kũ nↄgbɛ̃nↄ dì bↄtɛ í tↄ́, 12 akũ à adua kɛ̀ à pì: Dikiri, ma dikiri Ibrahĩ Luda, ǹ gbɛ̃kɛ kɛ ma dikiriinɛ ǹ tó ma tá kɛ nna ↄkↄsiala. 13 Ǹ gwa, má zɛna lↄ̀gↄↄ sarɛ. Tó wɛ̃tɛ nↄkparenↄ bↄ̀tɛ í tↄ́, 14 nↄkpare kũ ma ònɛ à a lo kipa à í tↄ́mɛnɛ mà mi, tó à pìmɛnɛ mà mi, akũ à kpà ma lakuminↄa dↄ, de mani dↄ̃ kũ n gbɛ̃kɛ kɛ̀ ma dikiriinɛ, nↄgbɛ̃ kũ n dìtɛ n zↄ̀bleri Isaaku pↄ́ ũn gwe. 15 Adi yã pì o à làkaro, akũ Bɛtuɛli nɛ́ Rɛbɛka bò kũ loo dina a gã̀n. Bɛtuɛli bi Ibrahĩ vĩ̀ni Nao nɛ́ kũ à ì kũ a nanↄ Milikaomɛ. 16 Nɛ́ pì mana akũsↄ̃ à bũnumɛ, gↄ̃gbɛ̃ ke dí wutɛ kãao zikiro. À sù lↄ̀gↄ kĩnaa, à í tↄ̀ à a lo pà, akũ à ɛ̀ra àtɛn tá. 17 Akũ zĩkɛrii pìi bàa lɛ̀ à gɛ̀ɛ à zɛ́ zↄ̃̀nɛ à pì: Ǹ ma gba í mà mi, bee fíti. 18 Nↄgbɛ̃ pìi pì: Ǹ mi Baa! Akũ à a lo kìpa gↄ̃̀nↄ, à í kpàa à mì. 19 Kũ à í kpàa à mì à làka, à pì: Mani tↄ́ n lakuminↄnɛ dↄ, ò mi ari ò kã. 20 Akũ à a lo í kà pↄ́nↄ ímibↄn gↄ̃̀nↄ, à ɛ̀ra à bàa lɛ̀ à gɛ̀ɛ à í tↄ́ lↄ̀gↄn, akũ à í tↄ̀ lakuminↄnɛ pínki. 21 Gↄ̃gbɛ̃ pì zɛna àtɛni a gwa tíii, de à le à dↄ̃ tó Dikiri ni tó a tá kɛ nna, ke ani kɛ nnaro. 22 Kũ lakuminↄ í mì ò làka, akũ gↄ̃gbɛ̃ pì wura tãnka mana dà nↄ pìinɛ a yĩa, à wura zã dànɛ mɛ̀n pla. Tãnka pìi tìkisii kà giramu sↄↄro, zã pìnↄ sↄ̃ giramu basↄsↄↄro. 23 Akũ à a là à pì: Ǹ omɛnɛ, dí nɛ́mɛ n ũu? Óni iki e n de bɛa yá? 24 Akũ à wèa à pì: Bɛtuɛli nɛ́n ma ũ, Milika kũ Nao daikore. 25 Sɛ̃̀ kũ tàragaao din ó bɛa, akũ iki kun dↄ. 26 Akũ gↄ̃gbɛ̃ pìi kùtɛ à donyĩ kɛ̀ Dikirinɛ à pì: 27 Dikiri ma dikiri Ibrahĩ Luda arubarika vĩ kũ adi gí gbɛ̃kɛ kũ náanio yã kɛnɛro yãi. Makũ sↄ̃, Dikiri dòmɛnɛ arɛ ma dikiri danɛnↄ bɛa.
28 Akũ nↄkpare pìi bàa lɛ̀ à gɛ̀ɛ à yã pì gbã̀ a ↄndenↄnɛ. 29 Rɛbɛka pì dãgↄ̃ vĩ kũ òdi pinɛ Labã. À bò wɛ̃tɛ kpɛ kũ bàao à gɛ̀ɛ à gↄ̃gbɛ̃ pìi lè lↄ̀gↄ lɛ́a, 30 zaakũ à è a dãre tãnka kũ zão dana, akũ à yã kũ gↄ̃gbɛ̃ pìi ònɛɛ mà. Kũ à gɛ̀ɛ à a lè kũ lakuminↄ lↄ̀gↄ lɛ́a, 31 à pì: Ǹ mↄ́ mↄkↄ̃n kũ Dikiri arubarikaa dàngu! À kɛ̀ dera ń zɛna wɛ̃tɛ kpɛɛ? Ma kpɛ́ kɛ̀kɛnnɛ kũ lakuminↄ bàdↄkio. 32 Gↄ̃gbɛ̃ pìi gɛ̃̀ ↄnn, akũ Labã lakuminↄ aso pòro à sɛ̃̀la kori kũ tàragaao kpàḿma à í kpà gↄ̃gbɛ̃ pìia à a gbá pípio kũ a gbɛ̃nↄ ń pínki.
33 Ò pↄ́ble dìtɛnɛ, akũ à pì: Mani pↄ́ ble gĩaro ari mà yã kũ ma suo o. Akũ Labã pì: Ǹ o. 34 Akũ à pì: Ibrahĩ zĩkɛriimɛ ma ũ. 35 Dikiri arubarikaa dà ma dikiriinɛ manamana, akũ à gↄ̃̀ aruzɛkɛde ũ. À a gbà sãnↄ kũ zùnↄ kũ andurufuuo kũ wuraao kũ gↄ̃gbɛ̃ zĩkɛrinↄ kũ nↄgbɛ̃ zĩkɛrinↄ kũ lakuminↄ kũ zaakinↄ. 36 Ma dikirii pì nanↄ Sara nɛ́ ì gↄ̃gbɛ̃ ũ a zĩkũnaa gũn, akũ ma dikiri pↄ́ kũ à vĩ kpà nɛ́ pìia pínki. 37 Ma dikirii tò ma la dà, zaakũ à pì màsun Kanaa kũ à kú ń tɛ́nↄ nↄ sɛ́ a nɛ́nɛro. 38 À pì mà gɛ́ a de bɛa a buri gũn mà nↄ sɛ́ a nɛ́nɛ gwe. 39 Akũ ma a dikirii là ma pì, tó nↄgbɛ̃ pì dí we à tɛ́mai sↄ̃ro bi? 40 À wèma à pì, Dikiri kũ a táa ò kãao mɛ́ ani a Malaika zĩ à gɛ́ zɛmɛnɛ, de ma tá kɛ nna, mani nↄ sɛ́ a nɛ́nɛ a de bɛ danɛnↄ tɛ́. 41 À pì tó ma gɛ a buri kĩnaa, tó odi wero, mani bo ladana kũ ma la dàarɛ gũn. 42 Kũ ma ka lↄ̀gↄ kĩnaa gbãra ma pì: Dikiri, ma dikiri Ibrahĩ Luda, tó n we, ǹ tó ma tá kɛ nna. 43 Má kú lↄ̀gↄ lɛ́a. Nↄkpare kũ à sù í tↄ́, akũ ma pìnɛ à ma gba í fíti mà mi, 44 tó à pì mà mi, akũ à tↄ̀ ma lakuminↄnɛ dↄ, mani dↄ̃ kũ nↄkpare kũ n dìtɛ à kɛ ma dikiri nɛ́ pↄ́ ũn gwe. 45 Ari màgↄ̃ yã pì o ma nɛ̀sɛɛ gũn mà láka, akũ Rɛbɛka bò kũ loo dina a gã̀n à sù lↄ̀gↄ lɛ́a à í tↄ̀. Akũ ma pìnɛ à ma gba í mà mi. 46 À a lo kìpa gↄ̃̀nↄ, à pì mà mi áni kpá ma lakuminↄa dↄ. Kũ ma mì, akũ à kpà ma lakuminↄa. 47 Akũ ma a la, dí nɛ́n a ũu? À pì Bɛtuɛli nɛ́n a ũ, Milika kũ Nao daikore. Akũ ma tãnka dànɛ a yĩa, ma zã dànɛ a ↄnↄa. 48 Akũ ma kutɛ ma donyĩ kɛ̀ Dikiri ma dikiri Ibrahĩ Ludanɛ ma sáabu kpàa, zaakũ à dòmɛnɛ arɛ zɛ́ súsu gũn, de mà a dikiri vĩ̀ni daikore sɛ́ a nɛ́nɛ. 49 Tera sà tó áni we à gbɛ̃kɛ kũ náanio yã kɛ ma dikiriinɛ, à omɛnɛ. Tó ádi we sↄ̃ro, à omɛnɛ, mani gɛ́ gu pãndea. 50 Labã kũ Bɛtuɛlio wèa ò pì: Yã pìi bò Dikiri kĩnaamɛ, ó yãke ona vĩro, a mana ke a vãni. 51 Rɛbɛkan dí, ǹ a sɛ́ ǹ tá kãao, à gↄ̃ n dikiri nɛ́ nanↄ ũ lákũ Dikiri ò nà. 52 Kũ Ibrahĩ zĩkɛrii pì ń yã mà, à wùtɛ zĩtɛ Dikirinɛ. 53 Akũ à nↄmanablebↄ kũ ò kɛ̀ kũ andurufuuo kũ wuraao kũ pↄ́kasanↄ bↄ̀tɛ à kpà Rɛbɛkaa. À a vĩ̀ni kũ a daoo gbà pↄ́ ↄgↄdenↄ dↄ. 54 Akũ àpii kũ gbɛ̃ kũ ò kú kãaonↄ pↄ́ blè ò í mì, akũ ò ì gwe.
Kũ ò fùtɛ kↄnkↄ à pì: À ma gbarɛ mà tá ma dikiri kĩnaa. 55 Nↄ vĩ̀ni kũ a dao pì: Ǹ tó nɛ́ pì gↄ̃ kũoo bee gↄrↄ kuri, á gbasa à tá. 56 Akũ gↄ̃gbɛ̃ pìi pìńnɛ: Lákũ Dikiri ma tá kɛ̀ nna nà lán dí bà, àsun ma dãdã doro. À ma gbarɛ mà tá ma dikiri kĩnaa. 57 Akũ ò pì: Ò nɛ́ pì sísi ò a la. 58 Akũ ò Rɛbɛka sìsi ò a là ò pì: Ĩni tá kũ gbɛ̃ pìio yá? Akũ Rɛbɛka pì: Mani tá kãao. 59 Akũ ò Rɛbɛka gbàrɛ kũ a gwàri kũ à a gwà zaa a fítinna zĩo, òtɛn tá kũ Ibrahĩ zĩkɛriio kũ a gbɛ̃nↄ. 60 Ò sa mana ò Rɛbɛkanɛ ò pì:
Nɛ́, Luda tó ǹ gↄ̃ gbɛ̃ dasinↄ dai ũ,
n burinↄ gↄ̃ gbãna vĩ ń zãngurinↄa.
61 Akũ Rɛbɛka fùtɛ kũ a nↄgbɛ̃ zĩkɛrinↄ, ò dì lakuminↄ kpɛ ò tɛ́ gↄ̃gbɛ̃ pìii, akũ à tà kũńwo.
62 A sù à lè Isaaku sù kũ lↄ̀gↄ kũ òdi pi Ludabɛ̃nɛkũadima'eo à vùtɛ Nɛgɛvi bùsun. 63 À bò à gɛ̀ɛ à laasun lɛ́ sɛ̃̀n ↄkↄsi, akũ kũ à wɛ́ sɛ̀, à è lakuminↄ tɛn su. 64 Rɛbɛka wɛ́ sɛ̀ à Isaaku è se, akũ à kìpa a lakumi kpɛ likalika 65 à zĩkɛrii pìi là à pì: Dín gↄ̃gbɛ̃ kũ àtɛn kure sɛ̃̀n àtɛn su daolɛ zã̀ dire ũu? Akũ zĩkɛrii pìi wèa à pì: Ma dikiriimɛ. Akũ Rɛbɛka a pↄ́dangãnn sɛ̀ à kù a ãnnwa. 66 Kũ ò kà Isaaku kĩnaa, zĩkɛrii pì yã kũ à kɛ̀ɛ bàbanɛ pínki. 67 Isaaku gɛ̃̀ kũ Rɛbɛkao a da Sara bizakutan, akũ à a sɛ̀ à gↄ̃̀ a nↄ ũ. À ye nↄ pìii, akũ a laakari kpatɛna a da ga gbɛra.