OSEE
Oseen tire teni, Isirelibɑn bwese kɛri wɔkurɑ tɑ gerusimɔ yèn sɔ̃ bɑ kuɑ nɑɑnɛ sɑribɑ Yinni Gusunɔn mi. Osee u tu yoruɑwɑ u kɑ wigibu kirɔ ko bu kɑ wɑ bu gɔ̃ru gɔsiɑ kpɑ bu wurɑ Gusunɔn mi. U sɔ̃ɔsimɔ mɑ Yinni Gusunɔn kĩru tɑ kpɑ̃, tɑ ǹ mɑɑ nɔru mɔ. Tire te, tɑ kĩi te tɑ wɑ̃ɑ Gusunɔ kɑ Isirelibɑn bɑɑ sɔɔ weesinɑmɔwɑ nge kĩi te tɑ wɑ̃ɑ durɔ kɑ win kurɔ kɑ ben bibun bɑɑ sɔɔ.
Tire ten kpunɑɑ
1 Oseen kurɔ suɑbu, wiru 1n di sere wiru 3.
2. Osee u Isirelibɑ gerusimɔ, wiru 4n di sere wiru 13.
3. U bu kirɔ mɔ̀ bu gɔ̃ru gɔsiɑ, wiru 14.
1
1 Sɑnɑm mɛ sinɑm beni Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑn temɔ, kɑ sɑɑ ye Yeroboɑmu Yoɑsin bii u bɑndu dii Isirelin temɔ, sɑnɑm mɛyɑ Yinni Gusunɔ u kɑ Osee Berin bii gɑri kuɑ.
Oseen kurɔ kɑ win bibu
2 Gɑri yi Yinni Gusunɔ u gbiɑ u Osee sɔ̃ɔwɑ yi wee. U nɛɛ,
Osee, ɑ doo ɑ kurɔ suɑ wi u rɑ sɑkɑrɑru ko.
Bɛɛn bibu bɑ koo mɑɑ win yirɑ swĩi.
Domi Isirelibɑ bɑ bũnu gɑsirimɔ bɑ sɑ̃ɑmɔ
nge kurɔ sɑkɑrɑ wi u durɔbu gɑsirimɔ.
Mɑ bɑ nɛ, Yinni Gusunɔ deri.
3 Mɑ Osee u seewɑ u Gomɛɛ Dibilɑimun bii suɑ kurɔ. Yerɑ u kɑ nùn mɛnnɑ. Mɑ kurɔ wi, u gurɑ suɑ u nùn bii tɔn durɔ mɑruɑ. 4 Mɑ Yinni Gusunɔ u nɛɛ,
i bii wi yĩsiru kɛ̃ɛyɔ Yisirɛɛli.
Domi sɑɑ fiiko sɔɔ kon Yehun yɛnugibu wɔri
yèn sɔ̃ bɑ tɔmbun yɛm yɑri Yisirɛɛliɔ,
kpɑ n Isirelibɑn bɑndu kpeerɑsiɑ.
5 Tɔ̃ɔ te sɔɔ, kon Isirelibɑn tɑbu durɔbun tɛnnu bɔɔku Yisirɛɛlin wɔwɑɔ.
6 Yenibɑn biru, Gomɛɛ u mɑɑ gurɑ suɑ mɑ u bii tɔn kurɔ mɑrɑ. Mɑ Yinni Gusunɔ u Osee sɔ̃ɔwɑ u nɛɛ,
ɑ nùn yĩsiru kɛ̃ɛyɔ Lo Ruhɑmɑ.
Yen tubusiɑnɑ bii wi bɑ yinɑ.
Domi nɑ ǹ mɑɑ Isirelibɑ wɔnwɔndu kuɑmmɛ.
Nɑ ǹ bu suuru kuɑmmɛ.
7 Adɑmɑ kon Yudɑbɑ wɔnwɔndu kuɑ, kpɑ nɛn tii n bu fɑɑbɑ ko nɛ wi nɑ sɑ̃ɑ Gusunɔ ben Yinni. Adɑmɑ n ǹ mɔ kon kɑ ben yibɛrɛbɑ tɑbu ko. Nɑ ǹ tɛndu dendimɔ ǹ kun mɛ tɑkobi ǹ kun mɛ dumi kɑ yin mɑɑsɔbu.
8 Yenibɑn biru, Gomɛɛ u bii wi bom kɑrɑ. Mɑ u wure u gurɑ suɑ u bii tɔn durɔ mɑrɑ. 9 Mɑ Yinni Gusunɔ u nɛɛ,
ɑ nùn yĩsiru kɛ̃ɛyɔ Lo Ami.
Yen tubusiɑnɑ n ǹ nɛn tɔmbu.
Domi i ǹ mɑɑ sɑ̃ɑ nɛn tɔmbu,
nɑ ǹ mɑɑ sɑ̃ɑ bɛɛn Yinni.