40
Bisãsiri dì fↄ̃ à Luda vãni boro
1 Akũ Dikiri ɛ̀ra à pì Ayubanɛ:
2 Makũ Gbãnasĩndapinkide,
ĩni ma taari e ǹ ma gba laakari yá?
Ludavãnibori, ǹ yã wema sà.
3 Akũ Ayuba wèa à pì:
4 Pↄ́ken ma ũro fá! Deran mani wemmaa?
Séde mà ↄ kú ma lɛ́a baasiro.
5 Ma yã ò gɛ̃̀n do, mani ɛra mà o doro,
ma ò gɛ̃̀n pla se, mani yã wemma doro.
6 Akũ Dikiri ɛ̀ra à yã ò Ayubanɛ zàga'ĩa gũn à pì:
7 Ǹ futɛ ǹ zɛ lán nɛ́gↄ̃gbɛ̃ bà,
mani n lala yãi, ĩni wema.
8 Ĩni lá kú ma yãkɛna a zɛ́alan yá?
Ń ye ǹ ma taari e de n yã bo nnan yá?
9 N gã̀sã gbãna kà ma pↄ́ ũ yá?
N kòto ni fↄ̃ à gu yĩgã lán ma pↄ́ bà yá?
10 Ǹ zↄ̃kↄ̃kɛ kũ kíkɛo da pↄ́kasa mananↄ ũ,
ǹ gakuri kũ bɛ̀ɛrɛɛo da uta zↄ̃kↄ̃ ũ.
11 Ǹ n pↄfɛ̃ kipaḿma,
ǹ zĩdabirinↄ gwa kũ wɛ́ pãsĩo ǹ wé'i daḿma.
12 Ǹ zĩdabirinↄ gwa kũ wɛ́ pãsĩo ǹ ń busa,
ǹ ń dúgu zↄ̃ gu kũ ò kún,
13 ǹ ń vĩ zĩtɛ ń pínki,
ǹ ń yĩyĩ ǹ ń ká gyãwãnn,
14 gbasa mà n sáabu kpá,
kũ n zĩ̀i blè kũ n gã̀sã gbãnao yãi.
Ũma yã
15 Ǹ ũma gwa,
kũ ma a kɛ̀ lákũ ma n kɛ nà.
Àdi sɛ̃̀ ble lán zùu bàmɛ.
16 A gbãna kú a wógbaaamɛ,
a iko kú a gbɛrɛ báasiamɛ.
17 A vlã porona lán sida lí bà,
a gbáda tĩ de lán bà tãnaa bà.
18 A wánↄ gbãna lán mↄ̀gotɛ̃ bà,
a gbánↄ de lán mↄ̀ gòo bà.
19 A zↄ̃kↄ̃ mɛ́ à de pↄ́ bɛ̃nɛ kũ ma kɛ̀nↄla pínki,
a Kɛ̀ri ado mɛ́ ani a fↄ̃.
20 Sĩ̀sĩnↄ musun àdi pↄ́ blen,
gwen nↄ̀bↄsɛ̃ntɛnↄ dì fàai bon ń pínki.
21 Àdi wútɛ lɛ̀'itɛ gbáru,
àdigↄ̃ sↄtↄ vↄ̃n dã̀dãa gũn.
22 Lɛ̀'itɛ uraa dì daala,
swa sarɛ lubanↄ dì likai.
23 Bee tó ísↄ̃ tɛn vĩvĩ, àdi bídi kɛro,
tó Yoda ísↄ̃kɛna tɛni a lɛ́ pá,
a laakarii dìgↄ̃ kpátɛnamɛ.
24 Oni fↄ̃ ò a wɛ́ wíwi ò a kũ yá?
Oni fↄ̃ ò ↄ̃ndↄ̃ kɛnɛ ò a yĩ fↄ̃ yá?