YOƐLI
Gusunɔn sɔmɔ Yoɛlin wɑɑsu yɑ sɑ̃ɑ kirɔ ye u win tɔmbu kuɑ. U nɛɛ, Yinni Gusunɔn siribu bu koo nɑ bin sɑɑ sɔɔ. Siri bin sɑɑwɑ u sokumɔ Yinni Gusunɔn tɔ̃ru. Sɑɑ ye sɔɔ, twee yi koo nɑ yi tem wukiri yi ɑrumɑnibɑ kɑm koosiɑ. Nge mɛ twee yi, yi koo tem kɑm koosiɑ, nge mɛyɑ Gusunɔ u koo mɑɑ tɔn be bɑ ǹ nùn nɑɑnɛ doke kɑm koosiɑ.
Yoɛli u mɑɑ nɛɛ, sɑnɑm dɑ̃ɑkim sɔɔ, Yinni Gusunɔ u koo de win Hunde u nɑ win tɔmbu sɔɔ. Yɑ mɑɑ koorɑ nge mɛ sɑ gɑrimɔ GK 2:16-21 sɔɔ.
Yoɛli, yĩsi ten tubusiɑnɑ Gusunɔ u sɑ̃ɑwɑ Yinni.
Tire ten kpunɑɑ
1. Twee yi koo tem wukiri, wiru 1.
2. Yinni Gusunɔn tɔ̃ru, wiru 2:1-17.
3. Ye yɑ koo Yinni Gusunɔn tɔmbu deemɑ, wiru 2:18n di sere wiru 4:21.
1
1 Gɑri wee yi Yinni Gusunɔ u Yoɛli, Pɛtuɛlin bii sɔ̃ɔwɑ u Yudɑbɑ sɔ̃.
Twee wuuru kɑ gbeburu
2 U nɛɛ, bɛɛ Yudɑbɑn guro gurobu,
i swɑɑ dɑkio i nɔ.
Bɛɛ Yudɑbɑ kpuro kpuro
i swɑɑ tem kpĩiyɔ i gɑri yi nɔ.
Gɑ̃ɑ ninin bweseru nu koore bɛɛn wɑɑti sɔɔ,
ǹ kun mɛ bɛɛn sikɑdobɑn wɑɑti sɔɔ?
3 I bɛɛn bibu yen gɑri sɔ̃ɔwɔ.
Kpɑ bii be, bu mɑɑ ben bibu sɔ̃,
kpɑ be, bɑ̀ n seewɑ bu mɑɑ begibu sɔ̃.
4 Wee dĩɑ ni kɔkɔnu nu di n tiɑrɑ,
twee yi nɑ yi di.
Ye twee yi nɑ yi di n tiɑrɑ
mɑ swĩini yi nɑ yi di.
Ye swĩini yi di n tiɑrɑ,
mɑ gbɑɑnu nɑ nu ye di.
5 Bɛɛ be tɑm mu goomɔ, i dom yɑndo kpɑ i swĩ.
Bɛɛ tɑm nɔrobu, i weeweenu koowo.
Domi tɑm mu koo kpe resɛm biɑrun sɔ̃.
6 Domi twee wuurɑ nɑ nge tɑbu kowobu
tɑ bɛsɛn tem wukiri.
Yi dɑbi, yi mɑɑ dɑm mɔ.
Yin donnu dɑm mɔwɑ nge gbee sinɑnsuginu.
7 Yi bɛsɛn resɛm gbɑɑnu kɑm koosiɑmɔ.
Yi bɛsɛn figie dɑ̃nu dimɔ.
Yi yen kokosu wĩɑmɔ.
Mɑ yi yen kɑ̃ɑsi derimɔ kokosu sɑri.
8 I wuri koowo nge kurɔ kpɑo wi gɔminirɑ deemɑ.
9 Bɑ ku rɑ mɑɑ kɑ kɛ̃nu de Yinni Gusunɔn sɑ̃ɑ yerɔ
ni nu sɑ̃ɑ ɑlikɑmɑ kɑ tɑm.
Yen sɔ̃nɑ Yinni Gusunɔn sɔm kowo be bɑ sɑ̃ɑ yɑ̃ku kowobu bɑ sɑ̃ɑre bɑ gɔɔ sɔ̃.
10 Gbeɑ kpuro yɑ kɑm kuɑ.
Mɑ yen tem mu sɑɑrɑ.
Alikɑmɑ sɑri, resɛm kɑ gum mɑɑ sɑri.
11 Gbee wukobu bɑ sɔ̃ biti sɔɔ.
Be bɑ rɑ resɛm yewe, weeweenɑ bɑ mɔ̀.
Domi dĩɑ bimi sɑri.
Dĩɑnu kpuro nu kɑm kuɑ.
12 Resɛm gbɑɑnu nu gberɑ.
Figie yɑ dɛllɑ.
Dɑ̃ɑ gbɑɑnu kpuro nu geɑ yinɑ.
Yɑ derɑ tɔmbu bɑ ǹ mɑɑ nuku dobu mɔ.
Yoɛli u tɔmbu kɑnɑmɔ
bu Yinni Gusunɔ suuru kɑnɑ
13 Bɛɛ Yinni Gusunɔn sɔm kowobu, yɑ̃ku kowobu,
i sɑɑki sebuo
i kɑ kpunɑ wɔ̃ku giriru nuku sɑnkirɑnun sɔ̃.
Domi wee bɑ ku rɑ mɑɑ kɑ ɑlikɑmɑ kɑ tɑm kɛ̃nu nɛ
Gusunɔ bɛsɛn Yinnin sɑ̃ɑ yerɔ.
14 I tɔ̃ru gɑru wunɔ
tè sɔɔ i ko i nɔɔ bɔke.
I tɔmbu kpuro mɛnnɔ sere kɑ durɔ tɔkɔnɔ
Gusunɔ bɛsɛn Yinnin sɑ̃ɑ yerɔ,
kpɑ i nùn kɑnɑ.
Yinni Gusunɔn mɔrun tɔ̃ru
15 Yinni Gusunɔn tɔ̃ru tɑ turuku kuɑ.
Tɔ̃ɔ te, tɑ sɑ̃ɑwɑ win tɔ̃ru.
Te sɔɔrɑ wi, Dɑm kpurogii u koo kpuro kɑm koosiɑ.
Annɑ ɑ tɔ̃ɔ kɔ̃suru wɑ te tɑ sisi mi.
16 Wee sɑ mɛɛrɑ bɑ kɑ bɛsɛn dĩɑnu doonɔ.
Mɑ nuku dobu kpɑ Gusunɔ bɛsɛn Yinnin sɑ̃ɑ yerɔ.
17 Ye bɑ duurɑ, yɑ gberɑ tem kusɑnu sɔɔ.
Dĩɑnu kpɑ birɑnu sɔɔ.
Mɑ birɑ ni, nu wɔrukumɔ.
Domi nu ǹ mɑɑ dĩɑnu mɔ.
18 I swɑɑ dɑkio i nɔ nge mɛ yɛɛ yi wuri mɔ̀,
mɑ yi bɔsu bɑɑmɑ.
Domi yi ǹ yɑkɑsu wɑ kpɑrɑ yerɔ.
Bɑɑ kɑ yɑ̃ɑnɔ nu nɔni sɔ̃ɔre.
Yoɛli u kɑnɑru mɔ̀
19 Yinni Gusunɔ, wunɑ nɑ nɔɔgiru suemɔ.
Domi wee, yɑkɑsu kɑ dɑ̃ɑ dɔ̃ɔ mwɑɑrɑ gberɔ.
20 Mɑ yɛɛ yi nɔɔgiru sue yi nun kɑnɑmɔ.
Domi dɑɑnu gberɑ, yɑkɑsu mɑɑ dɔ̃ɔ mwɑɑkirɑ gbɑburɔ.