1 I kɔbɑ soowo Siɔniɔ.

I de bu ye nɔ Yinni Gusunɔn guu dɛɛrɑru mi.

Bɛɛ be i wɑ̃ɑ tem mɛ sɔɔ kpuro, i diirio bɛrum sɔ̃.

Domi Yinni Gusunɔn mɔrun tɔ̃rɑ wee.

Wee tɑ mɑm turuku kuɑ.

2 Tɔ̃ɔ te, tɑ tĩriwɑ.

Tɑ guru wiru kɑ bukɔ sɔɔwɑ.

Mɑ twee wuurɑ wee yi dɑbi,

yi mɑɑ dɑm mɔ.

Yin wuu te, tɑ tĩriwɑ

nge yɑm wɔ̃kurɑ guuru wukiri.

Sɑ ǹ yen bweseru wɑɑre.

Sɑ ǹ mɑɑ yen bweseru wɑsi.

3 Mi yi sɑrɑ kpuro,

n dɑ kowɑ nge dɔ̃ɔ mwɑɑrɑ u doonɑ.

Yi ku rɑ gɑ̃ɑnu deri.

Yellu bɛsɛn tem mu geɑ sɑ̃ɑ

nge gbɑɑ te bɑ mɔ̀ Edɛni.

Adɑmɑ tɛ̃ yi mu kuɑ nge mi gɑ̃ɑnu ku rɑ kpi.

4 Twee yi, yi sɑ̃ɑwɑ nge tɑbu mɑɑsɔbu

be bɑ dumi yɑkiɑmɔ.

5 Yi yɔ̃ɔkumɔ yi guunu gɑsirimɔ.

À n yen wɔkinu nuɑ

ɑ rɑ n tɑmɑɑ nge tɑbu kɛkɛbɑrɑ,

ǹ kun mɛ yɑkɑ si su dɔ̃ɔ mwɑɑrɑmɔn wɔkinu.

Yi rɑ n weewɑ nge tɑbu durɔ be bɑ tɑbun sɔɔru sɑ̃ɑ.

6 Tɔmbu kpuro bɑ rɑ n nɑndewɑ yì n tunumɑ.

Kpɑ ben wuswɑɑ yu burisinɑ.

7 Yi rɑ tii yɔ̃suwɑ nge tɑbu durɔbu,

yi n gbɑ̃rɑru gɑsirimɔ,

yen bɑɑyere yɑ n yen swɑɑ swĩi.

Yi ku rɑ gɑm gɛre.

8 Yi ku rɑ mɑɑ bɑɑsinɛ.

Yen bɑɑyere yɑ rɑ n yen sĩɑ swĩiwɑ.

Gɑ̃ɑ ni nu koo ye gɔngɛrɛ ko,

yi rɑ nu wɔriwɑ sɑnnu.

Nu ku rɑ mɑɑ ye yɔ̃rɑsie.

9 Yi rɑ wuu wukiriwɑ

yi n gbɑ̃rɑru kɑ yɛnusu gɑsirimɔ,

kpɑ yi n dumɔ fɛnɛntibɑn di nge gbɛnɔbu.

10 Mi yi duɑ, tem mu rɑ diiriwɑ,

kpɑ n sɑ̃ɑre wɔllɑ koo wɔrumɑ,

kpɑ suru kɑ sɔ̃ɔ yɑm tĩrɑ,

kpɑ kperin bɑllibu kpe.

11 Nge mɛyɑ Yinni Gusunɔ ù n gɑri geruɑ win tɑbu kowobun wuswɑɑɔ,

bɑ rɑ nùn mɛm nɔɔwɛwɑ.

Bɑ dɑbi, bɑ mɑɑ dɑm mɔ.

Yen sɔ̃nɑ win tɔ̃ɔ te, tɑ nɑnum mɔ.

Wɑrɑ u koo yɔ̃rɑ u tu mɑ.

12-13 Yinni Gusunɔ u nɛɛ,

nɑ sɑ̃ɑwɑ wɔnwɔndugii.

Nɛn kĩru tɑ kpɑ̃.

Nɛn mɔru yɑ ku rɑ fuuku se.

Nɑ rɑ mɑɑ tɔnu suuru kue

kɔ̃sɑ ye nɑ rɑɑ kĩ n nùn kuɑ sɔɔ.

Tɛ̃, i wurɑmɑ kɑ bɛɛn gɔ̃ru kpuro nɛn mi,

i nɔɔ bɔke, kpɑ i wuri ko.

Bɛɛn gɔ̃ruwɑ i ko i gɔsiɑ,

n ǹ mɔ i yɑ̃nu gɛ̃ɛku tɔnɑ.

I wurɑmɑ nɛ, Gusunɔ bɛɛn Yinnin mi.

14 Sɔrɔkudo kon gɔ̃ru gɔsiɑ,

kpɑ n bɛɛ durom kuɑ.

Sɑɑ ye sɔɔrɑ i ko i kpĩ i kɑ mɑn ɑlikɑmɑ kɑ tɑm kɛ̃nu nɑɑwɑ.

15 I kɔbɑ soowo Siɔniɔ.

I tɔmbu mɛnnɔ,

kpɑ i nɔɔ bɔkurun tɔ̃ru yi.

16 I tɔmbu mɛnnɔ bu mɑn sɑ̃,

guro gurobu kɑ bibu, kɑ bii wɛ̃ɛnɔ.

Bɑɑ kɑ be bɑ wɑ̃ɑ kurɔ kpɑɑ dirɔ,

bu yɑrio ben kurɔ kpɑɑ dirun di.

17 Kpɑ yɑ̃ku kowo be bɑ mɑn sɑ̃ɑmɔ

bu du nɛn sɑ̃ɑ yerɔ kɑ swĩi,

yɑ̃ku yeru kɑ kɔnnɔn bɑɑ sɔɔ,

bu nɛ ben Yinni kɑnɑ bu nɛɛ,

n ben wɔnwɔndu wɑɑwo, be, nɛn tɔmbu.

N ku bu sekuru doke.

N ku de tɔn tukobu bu bu yɛ̃ɛ bu nɛɛ,

mɑnɑ nɛ, ben Yinni nɑ wɑ̃ɑ.

18 Yinni Gusunɔ u nisinu mɔ win tem sɔ̃.

U win tɔmbun wɔnwɔndu mɔ.

19 Mɑ u win tɔmbun kɑnɑru wisɑ,

u nɛɛ, kon bɛɛ ɑlikɑmɑ kpɑɑ wɛ̃, kɑ resɛm, kɑ gum.

I ko i deburu wɑ.

Nɑ ǹ mɑɑ derimɔ bweseru gɑru tu bɛɛ yɛ̃ɛ.

20 Kon bɛɛ yibɛrɛ be bɑ nɑ sɑɑ sɔ̃ɔ yɛ̃sɑn nɔm geu giɑn di girɑ,

kpɑ n de bu dɑ n tomɑ

mi tem mu gbere mɑ gɑ̃ɑnu ku rɑ kpi.

Kon de ben swɑɑ gbiobu bu nim wɔ̃ku bɔruguu wɔri.

Kpɑ be bɑ wɑ̃ɑ biruɔ bu nim wɔ̃ku ge bɑ mɔ̀ Mɛditerɑnɛ wɔri.

Ben gonu nu koo numiɑ sere bu kpɑnɑ bu wɛ̃siɑ.

Geemɑ, Yinni Gusunɔ u gɑ̃ɑ bɑkɑnu kuɑ.

21 Tem, ɑ ku bɛrum ko,

ɑ nuku dobu koowo,

domi Yinni Gusunɔ u gɑ̃ɑ bɑkɑnu kuɑ.

22 Bɛɛ gbeeku yɛɛ, i ku nɑndɑ.

Domi yɑkɑsu su koo wure su kpi temɔ,

kpɑ dɑ̃nu nu mɑ.

Figie kɑ resɛm yɑ koo binu mɑ siki siki.

23 Bɛɛ Siɔnigibu i nuku dobu koowo Gusunɔ bɛɛn Yinni sɔɔ.

Domi u koo de gurɑ yu nɛ yen sɑɑ sɔɔ nge yellu.

U koo de yu nɛ sɑɑ ye yɑ rɑ tore

kpɑ u de yu kpe sɑɑ ye yɑ rɑ kpe.

24 Alikɑmɑn soo yerɑ kun mɑɑ gberɑmɔ.

Olifin gum, kɑ resɛm tɑm kun mɑɑ biɑrɑmɔ wekenɔ.

25 Kon bɛɛ wɔ̃ɔ si kɑ dĩɑ nin kɔsire wɛ̃,

ni nɛn tɑbu kowobu, kɔkɔnu, kɑ gbɑɑnu, kɑ twee yi di

wɔ̃ɔ si su doonɑ sɔɔ.

26 Bɛɛ nɛn tɔmbu, i ko i di i debu.

I ǹ sekuru wɑsi.

Kpɑ i nɛ, Yinni Gusunɔ bɛɛrɛ wɛ̃,

nɛ wi nɑ bɛɛ sɔm mɑɑmɑɑkiginu kuɑ.

27 Sɑɑ ye sɔɔ, i ko i giɑ

mɑ nɑ wɑ̃ɑ bɛɛ Isirelibɑn suunu sɔɔ.

Mɑ nɑ sɑ̃ɑ Gusunɔ bɛɛn Yinni.

Nɛ bɑɑsi, Yinni goo mɑɑ sɑri.

Bɛɛ nɛn tɔmbu, i ǹ mɑɑ sekuru wɑsi.