60
Óni zĩ̀ ble kũ Luda gbãnao
Lɛ̀ kũ Dauda dà gↄrↄ kũ à zĩ̀i kà kũ Siria kũ ò kú Mɛsↄpↄtamia bùsun kũ Zoba bùsuu gũnnↄ, akũ Yoabu sù à Ɛdↄmunↄ dɛ̀dɛ Guvutɛ Wisiden gbɛ̃nↄn dúbu kuri awɛɛpla.
1 Luda, n pↄ fɛ̃̀wái,
n ↄ gbàrɛwái n ó zukũna.
Ǹ ɛra ǹ arɛ dↄwá sà.
2 N tò ó bùsuu yĩ̀gã ari à pàra.
Ǹ ɛra ǹ tata a gbɛ̀n,
zaakũ à gↄ̃̀ kpámmɛ.
3 N tò yã zĩ'ũ sù n gbɛ̃nↄa,
n ó káka kũ í gbãnao,
akũ ótɛn tàtantatan kɛ.
4 Ama n tuta dↄ̀ n vĩnakɛrinↄnɛ,
de ò le ò bo gbɛ̃nↄ ságana lɛ́i.
5 Ǹ wewá ǹ ó sura ba kũ n gã̀sã gbãnao
de ókↄ̃nↄ n gbɛ̃ yenyĩdenↄ le ò bo.
6 Luda yã ò zaa a kúkia à pì:
Mani Sɛkɛmu kpaatɛ kũ kùwikio,
mani gba da kũ Suko guvutɛo.
7 Giliada bùsu bi ma pↄ́mɛ,
Manase burinↄ bùsu bi ma pↄ́mɛ,
Ɛflaimu burinↄ bùsu bi ma mↄ̀furaamɛ,
Yudanↄ bùsu bi ma gòomɛ.
8 Mↄabunↄ bùsu bi ma ↄpipibↄↄmɛ,
madì ma kyate kátɛ Ɛdↄmunↄ bùsun,
madì kùwiki dↄ Filisitininↄ bùsuua.
9 Dí mɛ́ ani gɛ̃ kũmao wɛ̃tɛ bĩnide gũnn?
Dí mɛ́ ani domɛnɛ arɛ ari Ɛdↄmunↄ bùsunn?
10 Luda, à de mↄkↄ̃n mɛ́ n ↄ gbàrɛwái,
ndì bo kũ ó zĩ̀karinↄ doroo?
11 Ǹ ↄ dawá ó ibɛrɛnↄ yãi,
zaakũ bisãsiri kpányĩ bi yã pãmɛ.
12 Óni zĩ̀ ble kũ Luda gbãnao,
àkũ mɛ́ ani gɛ̀sɛ pɛ́tɛpɛtɛ ó ibɛrɛnↄa.