89
Luda lɛ́sɛna Daudanɛ
Ɛzɛra buri Etani lɛ̀ɛ.
Dikiri, manigↄ̃ lɛ̀ sí n gbɛ̃kɛ yã musu lakanaa sari,
manigↄ̃ n náanikɛna kpàkpa kɛ wɛ̃̀ kũ wɛ̃̀ɛo.
Mani o kũ n gbɛ̃kɛ lakana vĩro,
n náanikɛna zĩni pɛtɛna n bɛa zaa musu.
 
N pì: Ma bàka kú kũ gbɛ̃ kũ ma sɛ̀ɛo,
ma lɛ́ sɛ̀ ma zↄ̀bleri Daudanɛ.
Mani tó a buri gↄ̃ kí ble gↄrↄ sĩnda pínki,
mani a kpata gba gbãna ari a buria.
 
Musudenↄ dì n daboyãnↄ sáabu kpá, Dikiri,
malaikanↄ dì n náanikɛna yã o ń kↄ̃kakaranaa gũn.
Zaakũ gbɛ̃ke kú musu kũ à kà Dikiri ũro,
malaika ke ni sí lɛkↄ̃a kãaoro.
Luda vĩna dì malaikanↄ kũ ń kↄ̃kakaranan,
à naasi vĩ de gbɛ̃ kũ ò likainↄla.
Dikiri Luda Zĩ̀karide, dí mɛ́ à lɛɛlɛ kũnwoo?
Ń gbãna kũ náanio vĩ yã sĩnda pínki gũn.
 
Ndì gbãna mↄ ísiranɛ,
tó à sↄ̃ fùtɛ kũ vĩvĩnaao, ndì a gbãna fↄ̃.
10 N Misilanↄ dúgu zↄ̃̀, ò gↄ̃̀ gɛ̀nↄ ũ,
n n zãngurinↄ fã̀kↄ̃a kũ n gã̀sã gbãnao.
11 Musu bi n pↄ́mɛ, zĩtɛ dↄ bi n pↄ́mɛ,
n andunia kàtɛ kũ pↄ́ kũ ò kú a gũnnↄ pínki.
12 N gugbãnduru kũ gɛ̀nↄmidↄkio kɛ̀,
Tabo kũ Ɛmↄ gbɛ̀nↄ dì ayuwii kɛ kũ n tↄ́o.
13 N gã̀sã bi gbãna pↄ́mɛ,
n ↄ gbãna akũsↄ̃ n ↄpla dↄ musu.
 
14 Yãmanakɛ kũ yãzɛdekɛoomɛ n kpata zĩni ũ,
gbɛ̃kɛ kũ náanio mɛ́ à donnɛ arɛ.
15 Arubarikadenↄmɛ gbɛ̃ kũ ò ayuwiikɛmmanↄ ũ,
kũ òdigↄ̃ táa o gupura kũ à kú n kurunyĩ, Dikiri.
16 Òdigↄ̃ pↄnna kɛ kũ n tↄ́o gↄrↄ sĩnda pínki,
òdi ĩa dã kũ n manakɛo.
17 Zaakũ ń gakuri kũ ń gbãnaomɛ n ũ,
n zɛna kũoo dì ó sɛ́ lei.
18 Ó kína bi Dikiri pↄ́mɛ,
ó sɛ̃gbako pì bi Isarailanↄ Luda pↄ́mɛ.
 
19 N yã ò n yãmarinↄnɛ yã wɛ́gupu'enaa gũn
n pì: Ma kpányĩ kɛ̀ gↄ̃saanɛ,
ma kɛfɛnna sɛ̀ musu a gbɛ̃nↄ tɛ́.
20 Ma a zↄ̀bleri Dauda lè,
ma a nísi kùa ma a dìtɛ.
21 Manigↄ̃ a kũna ma ↄĩ,
ma gã̀sã gbãna nigↄ̃ kú kãao.
22 Ibɛrɛ ke ni fↄ̃ à táfe síaro,
gbɛ̃ vãni ke ni le à gbãna mↄnɛro.
23 Mani a wɛtɛrinↄ mì dɛ a arɛ,
mani a zãngurinↄ nɛ.
24 Mani gbɛ̃kɛ kɛnɛ kũ náanio,
oni a sɛ́ lei kũ ma tↄ́o.
25 Mani ísira nanɛ a ↄĩ,
anigↄ̃ iko vĩ swanↄa.
26 Ani ma sísi à pi,
má de a De ũ kũ a Ludao,
a gbɛ̀si ũ kũ a surabariio.
27 Mani a kɛ ma daudu ũ,
anigↄ̃ de andunia kínanↄ mìde ũ.
28 Manigↄ̃ gbɛ̃kɛ vĩ kãao gↄrↄ sĩnda pínki,
ma bàka kũ à kú kãao gborona vĩro.
29 Mani tó a buri gↄ̃ kí ble gↄrↄ sĩnda pínki,
a kpata nigↄ̃ kun lákũ ludambɛ dìgↄ̃ kun nà.
 
30 Tó a burinↄ pã kpà ma dokai,
akũsↄ̃ odi tɛ́ ma yãditɛnanↄiro,
31 tó ò bò ma yã kpɛ,
akũsↄ̃ ò ma yãdannɛnanↄ kũnaro,
32 mani gò tↄ̃ḿma ń taarinↄ yãi,
mani ń kɛ búgubugu ń vãnikɛnaa musu.
33 Ama gbɛ̃kɛ kũ má vĩ kãao ni lákaro,
mani fↄ̃ mà náanisariyã kɛro.
34 Mani ma bàka kunna kãao yã gbororo,
mani yã kũ à bò ma lɛ́n litɛro.
35 Ma sì kũ ma kunnaao gɛ̃̀n do,
mani ɛ́kɛ to Daudanɛro, kũ ma pì,
36 a buri nigↄ̃ kun gↄrↄ sĩnda pínki,
a kpata nigↄ̃ kun ma wára lán ifãntɛ̃ bà.
37 Lákũ mↄvura de sèeda náanide ũ musu nà,
lɛn a kpata nigↄ̃ kun gↄrↄ sĩnda pínki lɛ.
 
38 Bee kũ abireo n gi kína kũ n kài,
n ↄ gbàrɛi n pↄ fɛ̃̀ kãao manamana.
39 N n bàka kunna kũ n zↄ̀bleriio yã gbòro,
n a kífura gya bò n pã̀tɛ zĩtɛ.
40 N a wɛ̃tɛ bĩninↄ gbòro,
n a zɛki gbãnanↄ kↄ̀tɛ n dàtɛ.
41 Gbɛ̃ kũ òtɛn gɛ̃tɛnↄ ń baka bòn ń pínki,
à gↄ̃̀ lalandi pↄ́ ũ a buri dakenↄnɛ.
42 N a wɛtɛrinↄ gã̀a sɛ̀ lei,
n tò a ibɛrɛnↄ pↄnna kɛ̀.
43 N a fɛ̃nɛda gbãna ɛ̀,
ńdi zɛ kãao zĩ̀i gũnlo.
44 N a kíkɛgoo sìa,
n a kpataa nɛ̀.
45 N tò à zĩ kũ̀ a gbãnan,
n wé'i dàa arukĩmba ũ.
 
46 Dikiri, ĩnigↄ̃ utɛnawɛrɛ ari bↄrɛmɛɛ?
N pↄfɛ̃ tɛ́ nigↄ̃ kũ gↄrↄ sĩnda pínkin yá?
47 Ǹ laasun lɛ́ ma wɛ̃̀ndi kutukɛa.
N bisãsiri kɛ̀ pãn yá?
48 Dí mɛ́ anigↄ̃ kun à gí gaii?
Dí mɛ́ ani fↄ̃ à a zĩda sí mira gbãnaaa?
49 Dikiri, gbɛ̃kɛ kũ ń vĩ yã gɛ̀ɛ máa?
N yenyĩ kũ n a lɛ́ sɛ̀ Daudanɛ kũ náanio sↄ̃ bi?
50 Ǹ tó n zↄ̀bleri fobona yã dↄngu,
burinↄ ma sↄ̃sↄ̃ ò ma nɛ̀sɛɛ yàka.
51 N ibɛrɛnↄ kína kũ n kà lalandii kɛ̀
ari gu kũ a gɛ̀sɛɛ pɛ̀tɛn, Dikiri.
 
52 Arubarikaden Dikiri ũ ari gↄrↄ sĩnda pínki!
Aami! Aami!
TAKADA SIIKƆ̃DE
Zabura 90-106