1 Dikiri, ó utɛkimɛ n ũ wɛ̃̀ kũ wɛ̃̀ɛo.

2 De ń kpɛ́ ǹ kpinↄ kɛ,

de ń kpɛ́ ǹ zĩtɛ kũ anduniao kátɛ,

Ludamɛ n ũ zaa káaku ari gↄrↄ sĩnda pínki.

3 N dìtɛ kũ bisãsiri ɛra zĩtɛ,

ndì pińnɛ ò ɛra bùsun.

4 Wɛ̃̀ wàa sↄↄro dennɛ lán gↄrↄ do bà,

à dennɛ lán gĩa ke gwãani zaka bà.

5 Ndì bisãsiri sɛ́ kũ ga'io,

ò de lán sɛ̃̀ yĩda bà kↄnkↄ.

6 Àdi butɛ kↄnkↄ à gbã,

àdi yitoro kũ ↄkↄsi à kori kɛ.

7 N pↄfɛ̃ dì ó kakatɛ,

n patammanaa dì swɛ̃̀ kɛ̃ógu.

8 Ó yã vãninↄn katɛna n arɛ,

ó asiriyãnↄ bò gupuran n kùru.

9 Ó gↄrↄ dì gɛ̃tɛ n pɛ̃tɛ̃ yãi,

ó wɛ̃̀ndii dì láka kũ ndanaao.

10 Ó wɛ̃̀ɛ dì ká baaakↄ̃ akuri,

tó ó gbãna sↄ̃, basiikↄ̃.

Wari kũ pↄsiraoon wɛ̃̀ɛ pìnↄ dì suowɛrɛ,

òdi gɛ̃tɛ likalika, akũ odì kpágui.

11 Dí mɛ́ à n pↄfɛ̃ gbãna lɛ́ dↄ̃ↄ?

n pɛ̃tɛ̃ zↄ̃kↄ̃ↄ kà vĩna kũ à de ò kɛnnɛ ũ.

12 Ǹ dadawɛrɛ ògↄ̃ ó wɛ̃̀ndi kutukɛ lɛ́ dↄ̃,

de ò ↄ̃ndↄ̃ le ó swɛ̃̀ɛ gũn.

13 Dikiri, bↄrɛn ĩni n pↄfɛ̃ kpátɛɛ?

Ǹ n zↄ̀blerinↄ wɛ̃nda gwa.

14 Ǹ tó n gbɛ̃kɛ suwá lákũ gu dìgↄ̃ dↄ nà,

de ògↄ̃ pↄnna kɛ kũ ayuwiikɛnaao ari ó gↄrↄ lɛ́n.

15 Ǹ ó pↄ kɛ nna ↄ kũ n tↄ̃̀wá gↄrↄ lɛ́n,

wari kũ o kɛ̀ wɛ̃̀ lɛ́n.

16 Ǹ n yãkɛnanↄ mↄ ókↄ̃nↄ n zↄ̀blerinↄnɛ,

ǹ tó ó nɛ́nↄ n gbãna gakuri dↄ̃.

17 Dikiri ó Luda, ǹ tó ò n pↄnna le,

ǹ tó ó zĩ àre le,

ee, ǹ tó ó zĩ àre le.