102
Gbãnasaride aduakɛnaa
Wɛ̃ndade gbãnasaride kũ àtɛni a yã'ũmmananↄ bↄtɛ Dikirinɛɛ aduakɛnaa.
1 Dikiri, ǹ ma aduakɛna ma,
ǹ tó ma wiki n ki le.
2 Ǹsun wɛ́ utɛmɛnɛ ma warikɛgↄrↄaro,
ǹ sã kpámai,
tó ma n sisi, ǹ wema likalika.
3 Zaakũ ma gↄrↄ tɛn gɛ̃tɛ lán túsukpɛ bà,
ma mɛ̀ tɛn puusu bo lán tɛ́yↄ̃ↄ bà.
4 Ma nɛ̀sɛɛ yàka, ma gↄ̃ lán sɛ̃̀ kori bà,
ma sã pↄ́bleyãn.
5 Ma ndana gbãna mɛ́ à tò
ma gↄ̃ wàakuu ũ.
6 Ma gↄ̃ lán gbáranna tiongo bà,
lán bɛzĩ kóro bà.
7 I dì gɛ̃ ma wɛ́nlo,
ma gↄ̃ lán bã kũ à di kpɛ́ musu ado bà.
8 Ma ibɛrɛnↄ dìgↄ̃ ma sↄ̃sↄ̃ gↄrↄ sĩnda pínki,
ma foborinↄ dì gbɛ̃ ká kũ ma tↄ́o.
9 Túbumɛ ma pↄ́blee ũ,
ma wɛ́'i dì ká ma ímibↄn
10 n pↄfɛ̃ kũ n pɛ̃tɛ̃o yãi,
zaakũ n ma sɛ n ma zukũna.
11 Ma gↄrↄ tɛn gɛ̃tɛ lán uraa bà,
akũ matɛn kori kɛ lán sɛ̃̀ɛ bà.
12 Mↄkↄ̃n sↄ̃ Dikiri,
ndìgↄ̃ kú kpatan gↄrↄ sĩnda pínki,
n tↄ́ ni garo ari ó buria.
13 Ĩni futɛ ǹ Zaiↄ̃ wɛ̃nda gwa, zaakũ gↄrↄ kà,
gↄrↄ kũ n dìtɛ kà, kũ ĩni a pↄnna wɛtɛ.
14 A gbɛ̀nↄ kɛ̀ n zↄ̀blerinↄnɛ mana,
a gborona bùsuu dì kɛńnɛ wɛ̃nda.
15 Buri sĩnda pínki ni vĩna kɛnnɛ, Dikiri,
andunia kínanↄ ni n kíkɛ dↄ̃ ń pínki.
16 Zaakũ Dikiri ni Zaiↄ̃ kɛkɛ à bo dↄ,
ani bo à suḿma kũ gakurio.
17 Ani takasidenↄ aduakɛna sí,
ani ń wɛ́kɛna kpá sãkotoro.
18 Ò yã dí kɛ̃ kpɛdenↄ yãi
de gbɛ̃ kũ ò kpɛ́nↄ Dikiri táaki lɛ́.
19 Dikiri zĩtɛ gwà zaa a kúkia,
zaa musu à wɛ́ kpàtɛ zĩtɛ,
20 de à gbɛ̃nↄ zↄ̀ble ↄ́ↄ dↄ ma
à ń bo ga lɛ́i yãi.
21 Oni Dikiri tↄ́ bo Zaiↄ̃,
oni a táaki lɛ́ Yurusalɛmu,
22 zĩ kũ bùsu sĩnda pínki gbɛ̃nↄ ni kↄ̃ kakara gwe,
kũ kpatablerinↄ ò donyĩ kɛnɛ.
23 À ma gbãna bùsa zɛ́gbãn,
à ma wɛ̃̀ndi kɛ̀ kutu,
24 akũ ma pì: Ma Luda,
ǹsun ma wɛ̃̀ndi bo gugbãnlo,
mↄkↄ̃n kũ ń kun ari ó buria.
25 N andunia zĩni pɛ̀tɛ zaa káaku,
musu bi n ↄzĩmɛ.
26 Ń pínki ni gɛ̃tɛ, ama ĩnigↄ̃ kun,
oni zĩ kũ lán pↄ́kasa bà,
ĩni ń litɛ lán uta bà ǹ ń zukũna.
27 Mↄkↄ̃n sↄ̃ n kunnaa dìgↄ̃ dokↄ̃nↄ,
n gↄrↄ lakana vĩro.
28 N zↄ̀blerinↄ nɛ́nↄ nigↄ̃ kun aafia,
ń burinↄ ni zĩni pɛ́tɛ n kuru.