2 Isaŋ
An'ɔ Isaŋ ɔyɔnɛ-ɛ, t'ake tɔ pəmar pakaraŋɛnɛ areka ŋɔn ŋa mɛrəŋ-ɛ?
Isaŋ wəsom wəka Yesu ɛnacicəs areka ŋɔn ŋa mɛrəŋ nŋɛ meren wəco camət-maas kɔ kəcamət (85) kəbəp ka meren wəco camət-maŋkəlɛ kɔ kəcamət (95) ntɛ kəkom ka Yesu Krist kənacepər mɔ. Isaŋ ɛnamentərnɛ fɛ kəyɔnɛ ka wəcicəs ka areka ŋaŋɛ, mba encwenɛ nkɔnsərka «Wəbeki». Moloku ma Areka ŋa mɛrəŋ ŋa Isaŋ mɔlɔtərnɛ kəsurɛnɛ mmɛ ambəp Kawandi kɔn mɔ. Tatɔkɔ tɔ tɛntam kəyi pəmɔ tɔkɔ oloku teta tosom ta Yesu mɔ, a pabɔtərɛnɛ aŋɛ kɔ akɔ. Kɔ ntɛ oloku kəbɔtər ka Yesu dəmosom mɔ (1.5-6, Isaŋ 15.9-10). Ancɛm-cɛmnɛ a Isaŋ wəsom wəka Yesu ɛnacicəs Kawandi kɔn kɔ reka yɔn maas tɛm ntɛ ɛnayi dare da Efesi mɔ. Isaŋ ɛnacicsɛ kəloŋkanɛ ka alaŋ a Yesu nkɛ ɛnawe «Wəran wəyɛk-yɛk kɔ awut ɔn»*Isaŋ pətubcɛnɛ kəloŋkanɛ ka alaŋ a Yesu kɔ «wəran wəyɛk-yɛk kɔ awut ɔn.» mɔ. Tɛfaŋ ta Isaŋ ntɛ tɛnasɔŋɛ kɔ kəcicəs areka ŋaŋɛ mɔ tɛnayɔnɛ kəyeŋkəs kəloŋkanɛ ka alaŋ bəkəc pəsɔŋɛ ŋa kəbumnɛ mɛtəksɛ ma yem.
Tokotərɛnɛ ta moloku m'areka
1. Isaŋ oncop areka pəcbonc akɔ ancicɛ ŋi mɔ pəcyifɛnɛ ŋa sɔ (1.1-3).
2. Kɔ tɛyɛfɛ dənda-ɛ pəcyeŋkəs kəloŋkanɛ ka alaŋ a Yesu bəkəc, pəccɛm-cɛməs ŋa sɔ tosom tɔkɔ tɛmbɛk mosom fəp mɔ (1.4-6).
3. Kɔ tencepər-ɛ, Isaŋ oloku afum kəkɛmbərnɛ atiŋkər afum aŋɛ ŋander mɔ (1.7-11).
4. Kəloŋkanɛ ka alaŋ a Yesu nkɛ eyi mɔ, k'ɛləpsər kəyif (1.12-13).
1
Kəyif
1 Ina, wəbeki, incic areka nŋɛ kəkɔ nda wəran nwɛ Kanu kəyɛk-yɛk mɔ†Wəran nwɛ Kanu kəyɛk-yɛk mɔ kɔ awut ɔn = kəloŋkanɛ ka alaŋ Yesu kɔ awut ɔn aŋɛ imbɔtər yati mɔ. Bafɔ ina sona ɔbɔtər nu, mba akɔ ŋancərɛ kance mɔ fəp. 2 Imbɔtər nu teta kance nkɛ kəyi su kɔ kəndeyi su doru o doru mɔ. 3 Papa Kanu kɔ Yesu Krist wan ka Papa ŋasɔŋ su kəmar kifəli, nɔnɔfɔr kɔ pəforu dəkance kɔ dəkəbɔtər mɔ.
Tosom ntɛ asɔtər Papa mɔ
4 Bel-bel bɔ pəmbɔt im kəbəp awut am alɔma ŋackɔtɛnɛ kance, pəmɔ tɔkɔ Papa osom su ti mɔ. 5 Ndɛkəl oŋ, məna wəran nwɛ Kanu kəyɛk-yɛk mɔ‡Wəran nwɛ Kanu kəyɛk-yɛk mɔ = Kəloŋkanɛ ka alaŋ a Yesu. , intol'am ntɛ iyi kəcic'am mɔ: Pabɔtərɛnɛ! Bafɔ tosom tofu tɔ, mba ntɛ sənasɔtɔ kəyɛfɛ dəkəcop da kəlaŋ kosu mɔ. 6 Kəbɔtər kəyɔnɛ: Pəmar pakɔt mosom ma Kanu pəmɔ tɔkɔ kəloku mi mɔ. Tatɔkɔ tɔyɔnɛ tosom ntɛ pəmar nəkɔt mɔ, pəmɔ tɔkɔ nənane ti kəyɛfɛ dəkəcop da kəlaŋ konu mɔ.
7 Atiŋkər afum alarəm ŋasamsər doru, ŋafati kəwosɛ kəloku a Yesu Krist kance disrɛ ɔyɔnɛ fum. Wətiŋkər afum wəkakɔ wəter ka Krist ɔyɔnɛ. 8 Nəkɛmbərnɛ nənasərka ntɛ tɔŋsɔŋɛ ta yokom ya yɛbəc yonu yɔsɔlər nu mɔ, mba nəsɔtɔnɛ ti kəway kətəŋnɛnɛ ka ti.
9 Məna nwɛ o nwɛ ɔŋkɔ pəbɔlɛ, mba ta məyi kətəksɛ ka Krist mɔ, məyɔ fɛ Kanu. Məna nwɛ məŋyi kətəksɛ kaŋkɔ disrɛ mɔ, məyɔ Kas kɔ Wan. 10 Kɔ fum ender pəy'un dacɔ mba ta ɛŋkɛrɛ kətəksɛ kaŋkɔ-ɛ, ta məbaŋ kɔ nde ndaram, ta məyif kɔ yati. 11 Bawo məna nwɛ məŋyif kɔ mɔ, wəmar kɔn məyɔnɛ dəyɛbəc yɔn yɛlɛc.
Moloku mɛlpəs
12 Ali ntɛ moloku mɛlar im kəloku nu mɔ, ifaŋ fɛ kəloku nu mi d'areka ŋecicəs. Mba iŋgbɛkər amera kəkɔnəŋk un, ilok-lokər nu patɛfərɛnɛ ntɛ tɔŋsɔŋɛ pəbotu posu pɛlarɛ mɔ.
13 Awut a wəkirɛ kam nwɛ Kanu kəyɛk-yɛk mɔ§Awut a wəkirɛ kam nwɛ Kanu kəyɛk-yɛk mɔ = Kəloŋkanɛ ka alaŋ Yesu ŋayif nu.