3 Isaŋ
An'ɔ Isaŋ ɔyɔnɛ-ɛ, t'ake tɔ pəmar pakaraŋɛnɛ areka ŋɔn ŋa maas-ɛ?
Isaŋ wəsom wəka Yesu ɛnacicəs areka ŋa maas ŋaŋɛ. Ɛnacicəs ŋi meren wəco camət-maas kɔ kəcamət (85) kəbəp ka meren wəco camət-maŋkəlɛ kɔ kəcamət (95) ntɛ kəkom ka Yesu Krist kənacepər mɔ (85-95). Isaŋ ɛnamentərnɛ fɛ kəyɔnɛ ka wəcicəs ka areka ŋaŋɛ, mba encwenɛ nkɔnsərka «Wəbeki» (1.1). Towurɛnɛ tayi tɔyɔ d'areka ŋa mɛrəŋ ŋa Isaŋ (1.1). Ancɛm-cɛmnɛ a kəloŋkanɛ ka alaŋ a Yesu ŋɔ Isaŋ ɛnacicsɛ Kawandi kɔn kɔ reka yɔn maas ntɛ ɛnandɛ dare da Efesi mɔ. Wəlaŋ wəlɔma nwɛ ancwe Kayu mɔ, nkɔn Isaŋ ɛnacicsɛ areka ŋaŋɛ. Pəclokər-lokər Kayu d'areka pəmɔ wanapa kɔn, Isaŋ pəcsom kɔ kəfaynɛ alaŋ a Yesu acikəra aŋɛ ŋaŋkɔt atɔf disrɛ mɔ.
Tokotərɛnɛ ta moloku ma areka
1. Isaŋ ementər areka ŋɔn (1.1).
2. Isaŋ eyeŋkəs Kayu abəkəc kəmentər dofum nnɔ awɛnc aŋa ŋayi mɔ (1.2-8).
3. Kɔ tɛyɛfɛ dənda, k'oloku teta afum mɛrəŋ: Diyotərɛf kɔ Demeteri (1.9-12).
4. Dəkələpsər k'ɛncaŋ areka ŋɔn (1.13-14).
1
Kəyif
1 Ina, wəbeki, incic areka nŋɛ kəkɔ nda məna Kayu, nwɛ imbɔtər yati mɔ.
2 Məna nwɛ imbɔtər mɔ, intola mes mam fəp mɔckɔt belbel, mətamnɛ pəmɔ ntɛ amera ŋam ŋɔŋkɔt belbel mɔ. 3 Pənabɔt im belbel ntɛ awɛnc asu alaŋ alɔma ŋanader ŋalok'im ntɛ məyi dəkance kɔ tɔkɔ məŋkɔtɛnɛ sɔ ki mɔ. 4 Tes o tes tɛnaŋkanɛ fɛ kəbɔt im, mɛnɛ kəne a awut em ŋayi kəkɔt kance disrɛ.
Kəyeŋkɛ ka kəlaŋ ka Kayu
5 Məna nwɛ imbɔtər mɔ, məmentər kəyeŋkɛ ka kəlaŋ kam dəmes mam mɔyɔ fəp mmɛ məŋyɔnɛ awɛnc asu alaŋ haŋ acikəra mɔ. 6 Ŋanatəŋnɛ kəbɔtər ka Kanu kam nnɔ kəloŋkanɛ k'alaŋ kəyi mɔ. Məmar ŋa ŋasɔtɔ ca ncɛ pəmar ŋa kəyɔ marɛnt maŋan disrɛ mɔ, pəmɔ tɔkɔ Kanu kəfaŋ ti mɔ. 7 Bawo teta tewe ta Krist tɔ ŋawurɛnɛ, ali paka ŋawer fɛ atɔlaŋ. 8 Pəmar səna sɔ səbaŋ afum akakɔ ntɛ tɔŋsɔŋɛ papaŋnɛ yɛbəc teta kance.
Diyotərɛf kɔ Demeteri
9 Incicɛ kəloŋkanɛ k'alaŋ areka ŋɔlɔma, mba Diyotərɛf nwɛ dekiriŋ dɔmbɔt mɔ, owosɛ fɛ kəbaŋ su. 10 It'ɔsɔŋɛ, k'indeder-ɛ, indesɔksər nu mes mɔkɔ ɔŋyɔ mɔ fəp, tɔkɔ eŋyemsɛnɛ su mɔ. Tatɔkɔ tɔfɔtəŋnɛ kɔ, pəcfati kəmɛŋk awɛnc alaŋ acikəra, pəcyamsər sɔ akɔ ŋaŋfaŋ kəmɛŋk ŋa mɔ, pəcbɛləs ŋa kəloŋkanɛ ka alaŋ dacɔ.
11 Məna nwɛ imbɔtər mɔ, ta mətubucnɛ pəlɛc pa fum, mba pətɔt. Nwɛ o nwɛ ɔŋyɔ pətɔt mɔ, wəka Kanu məyɔnɛ. Nwɛ ɔŋyɔ pəlɛc mɔ, ɛncərɛ fɛ Kanu.
12 Teta Demeteri, alaŋ fəp ŋantəŋnɛ a fum wətɔt ɔfɔ. Tɔkɔtɛnɛ tɔn pətɔt tementər sɔ belbel a fum wəlompu ɔfɔ. Səna səndeŋər sɔ sede sosu tetɔn, kɔ məncərɛ a kəsumpər kosu sede kance kɔ yati.
Kəyif kəlpəs
13 Iyɔ mes mɛlarəm mecic'am mba ifaŋ fɛ kəloku nu mi d'areka ŋecicəs. 14 Intola ta pəwon sɔ sənəŋkɛnɛ, mba iŋgbɛkər amera kəkɔnəŋk un, ilok-lokər nu patɛfərɛnɛ.
15 Kanu kəsɔŋ əm pəforu! Anapa asu ŋayif əm. Iyif anapa, nwɛ o nwɛ kɔ tewe tɔn.