1 Piyɛr kɔ Saŋ ŋanayi kəlok-lokər afum tɛm ntɛ aloŋnɛ a kəlɔ kəpɔŋ ka Kanu ŋanabɛrɛ kɔ wəbɛ ka asɔdar aŋɛ ŋaŋc-bum ki mɔ, kɔ aSadisi. 2 Pənatɛlɛ ŋa ntɛ ŋanane Piyɛr kɔ Saŋ ŋac-təksɛ kɔ ŋac-cam afum kəyɛfɛ ka defi fənɔntər fa Yesu. 3 Kɔ ŋasumpər Piyɛr kɔ Saŋ, kɔ ŋandəs ŋa pac-bum ŋa dəbili haŋ dɔckɔsɔk, bawo pənabiyɛ. 4 Afum alarəm alɔma aŋɛ ŋanane moloku maŋan mɔ, ŋanalaŋ, kɔ kəgba kəŋan kəŋc-bəp arkun wul kəcamət (5.000).

5 Dɔckɔsɔk abɛ aŋan, abeki apɔŋ a dɔtɔf, kɔ atəksɛ a yecicəs ya Aŋnabi Musa ŋambəpsɛnɛ Yerusalɛm 6 kɔ wəloŋnɛ wəpɔŋ Anas, kɔ Kayifa, Saŋ, Alɛksandər, kɔ akɔ ŋanayɔnɛ aka kəbənda ka dokom da aloŋnɛ apɔŋ mɔ. 7 Kɔ ŋaŋcəmbər Piyɛr kɔ Saŋ fɔr yaŋan kiriŋ kəyifət: «Fənɔntər fəre, kɔ tewe ta ana tɔ nəyɔnɛ tantɛ-ɛ?»

8 Awa kɔ Amera Ŋecempi ŋa Kanu ŋɛlarɛ Piyɛr, kɔ ŋɔsɔŋɛ kɔ kəloku ŋa: «Abɛ a afum kɔ abeki a dɔtɔf: 9 Ayifət su mɔkɔ teta pətɔt mpɛ ayɔnɛ wəbəc mɔ, kɔ ntɛ antaməs kɔ mɔ. 10 Nəcərɛ ti bel-bel, fəp fonu kəbəp ka aYisrayel: Tewe ta Yesu Krist wəka Nasarɛt, wəkɔ nənacaŋ dəkətɔk kəpandən, akɔ Kanu kəntimi kɔ afi dacɔ mɔ, tewe tɔn tɔsɔŋɛ ntɛ fum wəkawɛ ɛŋcəmɛ nu dacɔ pətamnɛ mɔ. 11 Nkɔn Yesu ‹ɔyɔnɛ togbu mpɛ nəna acəmbər kəlɔ nənater mɔ, mba ɛnayɔnɛ togbu pɔtɔt, pa dacɔ.› *Yabura Dawuda 118:22. CəKresi = «Nkɔn ɔyɔnɛ tasar mpɛ nəna acəmbər kəlɔ nənater mɔ, akɔ pɔyɔnɛ pɔtɔt pa dətoŋkubut.» 12 Nkɔn gbəcərəm ɛntam kəsɔŋ su kəfis. Kanu kənasɔŋ fɛ tewe tɔlɔma ta fum nnɔ doru dandɛ ntɛ pəmar payacnɛnɛ mɔ.»

13 Ntɛ abeki aŋɛ ŋanəŋk Piyɛr kɔ Saŋ ŋabaŋsɛ mɔ, kɔ pəŋciyanɛ ŋa, bawo ŋanacərɛ a afum gbəcərəm ŋanayi aŋɛ ŋanatɔ-təkəs mɔ. Kɔ ŋanɛpəl ŋa dacɔ akɔ ŋanayi kɔ Yesu mɔ. 14 Mba ntɛ abeki apɔŋ ŋaŋc-nəŋk fum nwɛ anataməs pəcəmɛ ŋa fɔr kiriŋ mɔ, ŋanayɔ fɛ toloku. 15 Kɔ aboc kiti a aSuyif ŋaloku Piyɛr kɔ Saŋ kəwur ka dukəlɔ ndɛ aŋc-yifət ŋa mɔ, kɔ ŋamɛŋksɛnɛ taŋan, 16 kɔ ŋayifɛnɛ: «Cəke c’ andeyɔ afum akaŋɛ-ɛ? Bawo tɔsɔkər aka Yerusalɛm fəp a ŋa ŋasɔŋɛ kɔ tɛgbɛkərɛ ta Kanu tantɛ teyi. Afɔtam kəgbɛkəl ti. 17 Mba, ntɛ aŋyɔ a ta tɛsam nnɔ afum ŋayi mɔ, pabeŋnɛ ŋa, pamɔnɛ ŋa kəc-lok-lokər nwɛ o nwɛ tewe tatɔkɔ.

18 Kɔ ŋawe ŋa, kɔ ŋambeŋnɛ ŋa kətɔ-loku kɔ kətɔ-təksɛ afum tewe ta Yesu. 19 Piyɛr kɔ Saŋ ŋayif ŋa: «Pəmar fɔr ya Kanu kiriŋ paleləs nəna patas Kanu Nkɔn ba? Nəna nəmɔmən ti bel-bel, 20 bawo səna səfɔtam kəyi ta səloku tɔkɔ sənəŋk kɔ tɔkɔ səne mɔ-ɛ.»

21 Kɔ aboc kiti ŋaŋgbɔkərɛ sɔ kəbeŋəsnɛ ŋa, kɔ ŋasak ŋa. Ŋasɔtɔ fɛ tes ntɛ tɔŋsɔŋɛ ŋa kəsumpər mɔ teta afum. Fəp fəŋc-kor-koru Kanu teta tɔkɔ tɛnayi mɔ. 22 Fum nwɛ ɛnasɔtɔ tɛgbɛkərɛ ta kətaməs tatɔkɔ mɔ, ɛnatam kəsɔtɔ meren wəco maŋkəlɛ pəcepər.

23 Ntɛ asak Piyɛr kɔ Saŋ mɔ, kɔ ŋaŋkɔ ŋalɔmər afum aŋan tɔkɔ aloŋnɛ apɔŋ kɔ abeki a dɔtɔf ŋanaloku ŋa mɔ. 24 Ntɛ ŋane moloku mamɛ mɔ, kətəŋnɛ disrɛ kɔ ŋampɛnɛ sim nnɔ Kanu kəyi mɔ, ŋac-loku: «Wəbɛ, məna nwɛ məlompəs kɔm, antɔf, kəba kɔ ca yɔkɔ yeyi ki mɔ fəp, 25 dəAmera Ŋecempi ŋɔ mənalokɛ kusu ka kas kosu Dawuda wəmarəs kam:

27 Bawo kaŋce, Herodu kɔ Pɔŋse Pilat ŋantəŋnɛ pəlɛc dare dandɛ disrɛ atɔyɔnɛ Suyif kɔ aYisrayel nnɔ wəmarəs kam wəcempi Yesu eyi mɔ, nwɛ mənayɛk-yɛk mɔ. 28 Ŋanayɔ mes fəp mmɛ mənanuŋkɛnɛ kəwosɛ kəyɔ mɔ. 29 Ndɛkəl oŋ, Wəbɛ, məgbɛkərɛ kəbeŋəsnɛ kəŋan, məsɔŋɛ acar am kəbaŋsɛ kəloku toloku tam kaŋce disrɛ. 30 Məteŋci kəca ntɛ tɔsɔŋɛ kətaməs, mɛgbɛkərɛ, kɔ mes mɛwɛy-wɛy meyi tewe ta wəcar kam wəsoku Yesu.

31 Ntɛ ŋalip kətola Kanu mɔ, kɔ kəfo kəŋkɔ ŋanaloŋkanɛ mɔ kəyikcɛ, kɔ Amera Ŋecempi ŋɔsɔŋɛ fəp faŋan kəloku toloku ta Kanu kəbaŋsɛ disrɛ.

32 Kənay nkɛ kənalaŋ mɔ, ŋasɔtɔ bəkəc yin yayi, kɔ ŋayɔnɛ sɔ akin ayi. Nwɛ o nwɛ oŋc-loku fɛ a nkɔn sona ɔyɔ daka dɔn, mba a fəp faŋan fɔ ŋanapaŋnɛ di. 33 Asom a Yesu ŋaŋc-loku tɔkɔ ŋananəŋk kəyɛfɛ ka Wəbɛ Yesu afi dacɔ mɔ. Kɔ kəmar ka Kanu kəyi alaŋ fəp kəroŋ. 34 Afum akaŋɛ dacɔ, nwɛ o nwɛ abəkəc ŋɛnalɛcɛ fɛ sɔ teta kətɔ-yɔ kɔn daka, bawo aŋɛ ŋanayɔ dalɛ, kɔ pəyɔnɛ fɛ ti, wɔlɔ mɔ, ŋanacaməs yi. Kɔ ŋaŋkɛrɛ kəway ka ca yayɔkɔ, 35 kɔ ŋaŋc-bocər ki asom a Yesu dəntɔf. Kəway kaŋkɔ k’ aŋc-yer nwɛ o nwɛ kɔ tɔkɔ pəcuca peyi kɔ mɔ.

36 Isifu wəka kor ka Levy ɛnayi, nwɛ asom a Yesu ŋaŋc-we Barnabas mɔ, tatɔkɔ kusu kəŋan «Wəcəpəs bəkəc.» Nde dare da Sipər anakom kɔ. 37 Nkɔn ɛnacaməs antɔf nŋɛ ɛnayɔ mɔ, k’ɛŋkɛrɛ kəway kaŋkɔ fəp k’ender pəbocər ki asom a Yesu dəntɔf.