3
Wərkun kɔ wəran: Kəbɛləs kəŋan nde dale da Edeŋ
Abok ŋɛnacərɛ mes ŋɛtas sɛm ya dalɛ fəp nyɛ Kanu Kəpɔŋ kənawurɛ mɔ. K'abok ŋeyif wəran: «Kanu kəloku nu yati: ‹A ta nədi yokom ya tɔk ya dalɛ dandɛ?›» Kɔ wəran oloku abok: «Səndi yokom ya tɔk ya dalɛ dandɛ yati. Mba kətɔk nkɛ kəyi dalɛ dacɔ mɔ, Kanu kəloku: ‹Ta nədi yokom ya ki, ta nəgbuŋɛnɛ ŋaŋ ki! Kɔ nəyɔ ti-ɛ, nəŋfi.›» K'abok ŋoloku wəran: «Nəfɔfi! Bawo Kanu kəŋcərɛ, a dɔsɔk ndɛ nəndi yi mɔ, fɔr yonu yeŋmepɛ, nəyi pəmɔ Kanu nkɛ kəŋcərɛ pətɔt kɔ pəlɛc mɔ.»
Kɔ wəran ɛnəŋk a pokom pa kətɔk pɔmbɔt kədi, pɔmbɔt kəmɔmən, pentam kəsɔŋ kəcərɛ pətɔt kɔ pəlɛc. Kɔ wəran oŋgbotu pokom k'endi. K'ɔsɔŋ wos wəkɔ ŋanasol mɔ, kɔ wəkakɔ sɔ endi. Kɔ ŋamepɛ fɔr, kɔ ŋaŋcərɛnɛ a kəsɔkər kɔ ŋawur. Kɔ ŋaŋgbotu bɔpər ya kətɔk ka cəpɔp* bɔpər ya f. «figuier», kətɔk kɔ nkɛ kəmpoŋ nde Yisrayel mɔ., kɔ ŋasɔt maŋkara kɔ ŋambɛrnɛ mi.
Dec dɔrɔfɔy, ntɛ tefef towur mɔ, wərkun kɔ wəran ŋane dim da Kanu Kəpɔŋ, nkɛ kəŋckɔtəs mɔ. wərkun kɔ wəran kɔ ŋaŋkɔ ŋagbɔpnɛ ŋabɔlɛ Kanu fɔr kiriŋ, tɔk ya dalɛ dadɔkɔ dacɔ. Kɔ Kanu Kəpɔŋ kəwe wərkun kɔ kəyif kɔ: «Deke məyi-ɛ?» 10 Kɔ wərkun oloku Kanu: «Dim d' in' am dalɛ disrɛ, k'inesɛ, bawo iwur kəsɔkər, ti t' iŋgbɔpnɛnɛ.» 11 Kɔ Kanu Kəpɔŋ kəyif kɔ sɔ: «Anɔ 'mentər əm a kəsɔkər kɔ məwur-ɛ? Cepɔ məndi pokom pa kətɔk kəŋkɔ inamɔn' am mɔ ba?» 12 Kɔ wərkun oloku: «Wəran nwɛ məsɔŋ im mɔ, nkɔn ɔsɔŋ im pi k'ina sɔ indi.»
13 Kɔ Kanu kəyif wəran: «Ta ake tɔ məyɔnɛ tantɛ-ɛ?»
Kɔ wəran oloku Kanu: «Abok ŋetiŋkər im, k'indi pokom pampɛ.»
14 Kɔ Kanu Kəpɔŋ kəloku abok:
 
«Bawo məsɔŋɛ wəran kəciya,
kəsɔŋ əm kənder pəlɛc sɛm yɔcɔl,
kɔ sɛm ya dop fəp dacɔ.
Kor kɔ mənde məcliŋɛnɛ,
məcdi kəbof mataka ma kiyi kam doru fəp.
15 Kəbɛrs əm k'inder dacɔ kɔ wəran,
kəyɛfɛ nəna haŋ awut a wəran
kəbəp awut a məna, Abok!
Wəran ende pəc-putək əm domp,
məna, Abok, məc-ŋaŋ kɔ dəmnɛ atek.»
 
16 Kɔ Kanu kəloku wəran:
 
«Indeyɔ kəbɛkəs kam kəc-cu'm.
Pəcuca pɔ mənde məc-kom.
Mɛfaŋ mam məndekɔ nda wos əm.
Mba endetasərn' am.»
17 Kɔ Kanu kəloku wərkun:
 
«Bawo, məŋcəŋkəl dim da wəran kam,
kɔ məndi pokom pa kətɔk nkɛ inamɔn' am kədi mɔ,
Indesɔŋ antɔf pəlɛc tetam:
Pəcuca pɔ mənde məcsɔtər ŋi yeri yam
dɔsɔk o dɔsɔk kiyi kam doru fəp.
18 Yika ya dəkulum yɔ mənde məc-di.
Mba antɔf ŋende ŋoc-kom am
bɛŋk kɔ ŋgbɔŋkəlɔ.
19 Kawonɛ ka tobu tam
kəndesɔŋ' am kəc-sɔm kəcom
haŋ tɛm ntɛ məndelukus dəntɔf
nde məyɛfɛ mɔ.
Bawo kəbof kɔ məyɔnɛ,
dəkəbof məndesɔ-lukus.»
 
20 Kɔ wərkun ɔsɔŋ wəran kɔn tewe ta «Hawa» «Iya», nwɛ ɔsɔŋ kəyi wəyeŋ, bawo nkɔn Hawa ɔyɔnɛ iya wəka afum a doru fəp.
21 Kɔ Kanu Kəpɔŋ kəlompsɛ Adama kɔ wəran kɔn, Hawa, yamos ya akata, k'ɛmbɛr ŋa yi.
22 Kɔ Kanu Kəpɔŋ kəloku: «Ah! Ntɛ fum ende pəyi oŋ pəmɔ səna mɔ, pəcərɛ pəlɛc kɔ pətɔt, səkɛmbərnɛ ta pətɛŋc kəca pəlɛk sɔ pokom pa kətɔk kəyinɛ wəyeŋ, pədeyi oŋ doru katina.» 23 Kɔ Kanu Kəpɔŋ kəwurɛnɛ kɔ dalɛ da Edeŋ disrɛ, pəkɔbəc antɔf nyɛ kənasɛlɛ kɔ mɔ. 24 Ntɛ Kanu kəwurɛnɛ fum dalɛ da Edeŋ mɔ, kɔ kəŋcəmbər mɛlɛke Serubɛŋ-mɛlɛke mɔ, mmɛ mombum dɛbɛ da Kanu mɔ. Serubɛŋ səyɔ dobomp da fum, dis da kusunuŋku, kɔ səyɔ sɔ baŋca yɛfɛlərɛ ntende dec dɛmpɛ dalɛ da Edeŋ, kɔ dakma ndɛ deŋcfikəlɛ dɛc-cɛsəŋɛ nɛŋc, ntɛ tɔŋsɔŋɛ ta alɔtərnɛ kətɔk ka kəyinɛ wəyeŋ mɔ.

*3:7 bɔpər ya f. «figuier», kətɔk kɔ nkɛ kəmpoŋ nde Yisrayel mɔ.

3:20 «Iya», nwɛ ɔsɔŋ kəyi wəyeŋ

3:24 Serubɛŋ-mɛlɛke mɔ, mmɛ mombum dɛbɛ da Kanu mɔ. Serubɛŋ səyɔ dobomp da fum, dis da kusunuŋku, kɔ səyɔ sɔ baŋca yɛfɛlərɛ