1 Tɛm tatɔkɔ, Yuda pəbɔlɛnɛ awɛŋc aŋa, kɔ ɔŋkɔ pəyi kɔ wərkun wəlɔma nwɛ aŋcwe Hira mɔ, wəka Adulam ɛnayi. 2 Dəndo, kɔ Yuda ɛnəŋk wəyecəra wəKanahan wəlɔma pac-we kɔ Suwa. K'ɛlɛk kɔ k'ɛnɛŋcɛ k'ombocərnɛ kɔ. 3 Kɔ Suwa ɛmbɛkəs, k'oŋkomɛ Yuda wan wərkun k'ewe kɔ Er. 4 K'ɛmbɛkəs sɔ k'oŋkom wan wərkun k'ɔsɔŋ kɔ tewe ta Onaŋ. 5 K'ɔŋgbɔkərɛ sɔ kəkom wan wərkun nwɛ ɛnawe Sɛlah mɔ. Dare da Kisibu Yuda ɛnayi tɛm ntɛ Suwa oŋc-kom Sɛlah mɔ. 6 Kɔ Yuda ɛfacɛ coco cɔn wəyecəra nwɛ aŋcwe Tamar mɔ. 7 Mba Er, nwɛ ɛnayɔnɛ coco ca Yuda mɔ, ɛnatesɛ fɛ fɔr ya Kanu Kəpɔŋ kiriŋ. Kɔ Kanu Kəpɔŋ kəsɔŋɛ kɔ kəfi. 8 Kɔ Yuda oloku tɔŋɔ tɔn Onaŋ: «Məbocərnɛ wəran ka wəbek' am. Məsɔŋɛ wəran kɔn pəsɔtɔnɛ kɔ yuruya.» 9 Ntɛ Onaŋ ɛnacərɛ a wan nwɛ endesɔŋ wəran ka wəbek' ɔn mɔ, ɔfɔdeyɔnɛ wəkɔn. Kɔ ŋaŋc-kɔna-fəntərɛ kɔ wəran ka wɛŋc-ɛ, pəc-loŋ domun dɔn dəntɔf, ntɛ tɔŋsɔŋɛ ta ɔsɔŋɛ wəran nwɛ kəbɛkəs mɔ. 10 Mɔyɔ mɔn mamɔkɔ mɔŋc-bɔt fɛ Kanu Kəpɔŋ. Kɔ kəsɔŋɛ sɔ nkɔn Onaŋ kəfi. 11 Kɔ Yuda oloku Tamar wəran ka wan kɔn: «Məndɛ kəbal ka wos əm ndena papa kam haŋ wan kem wərkun Sɛlah pəc-bɛk.» Bawo Yuda oŋc-lokunɛ: «Wəkawɛ sɔ kəfi k'ender pəmɔ abek' ɔn.» Kɔ Tamar ɔŋkɔ pəyi nde kəlɔ ka papa kɔn.

12 Kɔ mataka mɛlarəm meŋcepər, kɔ wan wəran ka Suwa, wəran ka Yuda, efi. Ntɛ abəkəc ŋɛnator Yuda mɔ, k'ɛmpɛrnɛ kəca ka Timna kɔ wanapa kɔn Hira wəka Adulam, nde akɔ ŋaŋcfon ŋkesiya yɔn ŋanayi mɔ. 13 K'aŋkɔ paloku Tamar: Koŋci kam ɛntas Timna kəkɔ-fon ŋkesiya yɔn yɛfɛt. 14 Kɔ Tamar owurɛ yamos yɔn ya kəbal, k'ɛŋgbalərnɛ kəloto, k'ɛnɛpəsərnɛ ki, k'ɔŋkɔ pəndɛ dəkəbɛrɛ da Enayim nde dɔpɔ da Timna. Bawo ɛnanəŋk a Sɛlah ɛmbɛk, k'antɔlɛk kɔ pasɔŋ Sɛlah pəyɔnɛ wəran kɔn. 15 Kɔ Yuda ɛnəŋk Tamar, kɔ pəyi kɔ pəmɔ wəran wəyama-yama, bawo ɛnakumpənɛ kəro. 16 Kɔ Yuda ɛŋcaŋ Tamar moloku dɔpɔ: «Taŋkɔn, səkɔ səfəntərɛ.» Bawo Yuda ɛnacərɛ fɛ a wəran ka wan kɔn wərkun ɔfɔ. Kɔ Tamar eyif kɔ: «Ake məndekɔ-sɔŋ im, kɔ məmbocərn' em-ɛ?» 17 K'oloku: «Iŋkɔ-kɛr' am wir wowut yɔcɔl yem dacɔ.» Kɔ Tamar oloku: «Mɛnɛ məsɔŋ im paka pɔlɔm itɔmpər haŋ məc-kɛrɛ wir wowut wawɔkɔ.» 18 Kɔ Yuda eyif kɔ: «Ake indesɔŋ əm haŋ ic-kɛrɛ wir wowut nwɛ?» Kɔ Tamar oloku kɔ: «Məsɔŋ im tamp tam, kəbənda kɔ kəgbo kaŋkɔ məntɔmpər mɔ.» Kɔ Yuda ɔsɔŋ kɔ yi. Kɔ Yuda ɛfəntərɛ kɔ Tamar, kɔ Tamar ɛmbɛkəsɛ Yuda. 19 Kɔ Tamar ɛyɛfɛ k'ɔŋkɔ, k'owurɛ kəloto kaŋkɔ ɛnagbalərnɛ mɔ, k'ɛmbɛrnɛ sɔ yamos yɔn ya kəbal.

20 Kɔ Yuda osom wanapa kɔn wəAdulam, a pəkenɛ Tamar wir wowut, pəkɛrɛnɛ ca yɔkɔ ɛnacəmbər di sɛkɛ mɔ. Mba ɛnanəŋk fɛ kɔ. 21 Kɔ wəkakɔ ɔŋkɔ pəc-yifət afum akɔ ɛnabəp di mɔ: «Deke wəran wətɛn arkun, nwɛ ɛŋcəmɛna nnɔ dɔpɔ da Enayim mɔ, eyi-ɛ?» Kɔ akakɔ ŋaloku kɔ: «Wəran wətɛn arkun ɔfɔcəmɛ nnɔ.» 22 Kɔ wərkun nwɛ olukus k'ɔŋkɔ pəc-loku Yuda: «Inəŋk fɛ kɔ. Ali afum a tofo tatɔkɔ ŋaloku: ‹A wəran wətɛn arkun eyi fɛ nnɔ.›» 23 Kɔ Yuda oloku: «Pəmɛŋkərnɛ ca yem yɔkɔ ɔntɔmpər mɔ! Ta patɛnərnɛ malap. Bawo isom pakenɛ kɔ wir wowut kɔ məntɔnəŋk kɔ.» 24 Ntɛ yof maas yeŋcepər mɔ, k'ande paloku Yuda: «Wəran ka wan kam ɔŋkɔt yama-yama, kɔ tɔsɔŋɛ kɔ kəbɛkəs.» Kɔ Yuda oloku: «Nəwurɛnɛ kɔ. Pacɔf kɔ!» 25 Ntɛ asolɛ kɔ kəwurɛnɛ doru mɔ, k'osom nda koŋci kɔn: «Wəbɛkəsəs kem ɔyɔ ca nyɛ. Məsɛp məcərɛ nwɛ ɔyɔ tamp pampɛ, kəbənda kaŋkɛ, kɔ kəgbo kaŋkɛ mɔ.» 26 Kɔ Yuda ɛnɛpəl yi. K'oloku: «Tamar olomp pətas im, bawo iwosɛ fɛ kəsɔŋ kɔ wan kem Sɛlah.» Difɔ tɛnalip ɛŋcərɛ fɛ kɔ sɔ dɛran.

27 Ntɛ Tamar ɛyɛfɛ kəkom mɔ, k'anəŋk fɔ cəberi cəyi kɔ dəkor. 28 Tamar eyi kəkom. Kɔ wan wəcɔkɔ-cɔkɔ owurɛ kəca. Kɔ wəran wəbaŋ wan osumpər kənaka nkɛ kəca k'oŋkot kɔ debeŋa deyim dəkəca, pəcloku: «Wəkawɛ andenuŋkɛnɛ kəkom.» 29 Mba kɔ kənaka nkɛ kəliŋ kəca kɔ wɛŋc onuŋkɛnɛ kəwur. Kɔ wəbaŋ wan eyifnɛ: «Kəpəc kəre kɔ məwurɛ kaŋkɛ-ɛ?» Kɔ Tamar ewe wan wəkakɔ Perɛc. * Perɛc = «kəpəc» 30 Kɔ wan wəka mɛrəŋ owur, nwɛ anakot debeŋa dəkəca mɔ, kɔ Tamar ewe wəkakɔ tewe ta Serah. † Serah = «Kəpɛ ka dec»