1 Kɔ Yakuba ɛndɛ atɔf ŋa Kanahan nde kas ɛnandɛ mɔ. 2 Dokombəra da Yakuba dɛndɛ: Kəsɔtɔ ka Isifu meren wəco kɔ camət-mɛrəŋ, kɔ Isifu ɛyɛfɛ pəc-cɛpsɛ awɛŋc aŋa darəŋ ŋackɛk ŋkesiya kɔ cir. Pəyɔnɛ wan wəfɛt, pəc-cəmɛ awut arkun a Bilha kɔ Silpa darəŋ, aran a kas. Mba Isifu eŋcder pəcsɔŋɛ papa kəŋan kəcərɛ mɛcɛmcɛmənɛ mɛlɛc mɔkɔ meŋc-cepər di mɔ fəp. 3 Yakuba*H. «Yisrayel» = tewe tantɛ tɔ Kanu ki sərka kənasɔŋ Yakuba. Məmɔmən ɛnabɔtər Isifu pətas awut ɔn aləpəs aŋɛ fəp, bawo detem disrɛ d' ɛnasɔtɔ kɔ. Kɔ Yakuba ɔsɔt bərumus bɔnɔŋkəsəl lom k'ɔsɔŋ bi Isifu. 4 Kɔ awɛŋc a Isifu ŋande ŋanəŋk, a kas kəŋan ɔmbɔtər Isifu pətas ŋa fəp. Kɔ ŋamɛŋkɛ Isifu mɛtɛlɛ mamɔkɔ. Kɔ ŋayi ta ŋaŋlok-lokər Isifu bel-bel-ɛ. 5 Kɔ Isifu ɛwɛrəp, k'ɔŋkɔ pəloku mere mamɔkɔ awɛŋc aŋa, kɔ akakɔ ŋanaŋkanɛ sɔ kəter kɔ. 6 Kɔ Isifu oloku ŋa: «Awɛŋc im aŋa, nəcəŋkəl mere mmɛ iwɛrəpna mɔ! 7 Dəkulum ayina pacsek mɛmpəlɛ. Pəwon fɛ kɔ kilim kem ka mɛmpəlɛ kəyɛfɛ kɔ kəŋcəmɛ sot! Kɔ cilim ca mɛmpəlɛ ma nəna cənder cənɔŋkər kemi, kɔ cəntontnɛnɛ ki.» 8 Kɔ awɛŋc aŋa ŋaloku kɔ: «Mba məna məŋcɛm-cɛmnɛ kəyɔnɛ ka wəbɛ ka səna ba? Məyi su kəroŋ?» Kɔ ŋambɛrɛnɛ sɔ kəter kɔ teta moloku mɔn mamɔkɔ. 9 Kɔ Isifu endesɔ pəwɛrəp, k'oloku sɔ ti awɛŋc aŋa. K'oloku: «Iwɛrəpna sɔ: Dec, ŋof kɔ cɔs wəco kɔ pin yontontnɛn' em.» 10 Kɔ Isifu oloku mere mamɔkɔ papa kɔn kɔ awɛŋc aŋa. Kɔ papa kɔn oŋkul-kulər kɔ, k'eyif kɔ: «Cəke cɔ mere mamɛ məwɛrəp mɔ moloku-ɛ? Məŋcɛm-cɛmnɛ a səndeder, iya kam, awɛŋc əm aŋa, kɔ ina sədetontnɛn' am dəntɔf?» 11 Kɔ awɛŋc a Isifu ŋayɔnɛ kɔ kəraca. Mba kɔ kas kəŋan ɛmɛŋkərnɛ kəwɛrəp kaŋkɔ.

12 Kɔ awɛŋc a Isifu ŋande ŋawur, kəkɔ-kɛk ŋkesiya kɔ cir ya kas kəŋan nde Səkɛm. 13 Kɔ Yakuba oloku Isifu: «Awɛŋc əm aŋa ŋayi Səkɛm ŋawurɛnɛ yɔcɔl kəkɔsɔ-mət. Məder, ifaŋ kəsom əm nde ŋayi mɔ.» Kɔ Isifu owosɛ: «In' ɛwɛ!» 14 Kɔ Yakuba oloku kɔ: «Məkɔ məmɔmən em kɔ pəyi fɔ daka o daka deyi fɛ awɛŋc əm aŋa kɔ yɔcɔl yɛfɛt-yɛfɛt-ɛ. Məder məlok' im ti.» K'osom kɔ kəyɛfɛ ka aranta ŋa Hɛbərɔŋ, kɔ Isifu ɔŋkɔ Səkɛm. 15 Kɔ wərkun wəlɔma ɔŋkɔ pəbəp kɔ pəc-kafəlɛ-kafəlɛ dəkulum. Kɔ wərkun nwɛ eyif kɔ: «Ake məntɛn-ɛ?» 16 Kɔ Isifu oloku kɔ: «Awɛŋc im aŋa ŋ' intɛn, ilɛtsɛn' am məmentər im nde ŋayi kəkɛkəs yɔcɔl mɔ.» 17 Kɔ wərkun nwɛ oloku kɔ: «Ŋayɛfɛ dɛ, inenɛna ŋa ŋac-loku: ‹Paŋkɔn kəca ka Dotaŋ.›» Kɔ Isifu ɛŋcəmɛ ni yaŋan darəŋ, kɔ yɔcɔl haŋ k'ɔŋkɔ pəbəp ŋa Dotaŋ.

18 K'awɛŋc aŋa ŋanəŋk kɔ pəbɔlɛ, ta ɛntabəp ŋa-ɛ, kɔ ŋasekɛ kɔ kədif. 19 Kɔ ŋalokɛnɛ: «Wəbɛ ka kəwɛrəp ender wəkɔ. 20 Nəder oŋ padif kɔ, pagbal kɔ nde dəkələmp. Pakɔ paloku fɔ wɛsɛm wɔsɔm kɔ. Pamɔmən oŋ daka ndɛ kəwɛrəp kɔn kəndeyɔnɛ mɔ.» 21 Kɔ Ruben ene ti, k'ɛmbaŋ kɔ akakɔ dəwaca. K'oloku: «Ta pasɔŋɛ kɔ kəfi.» 22 Kɔ Ruben oloku sɔ: «Ta nəwurɛ mecir! Nəgbal kɔ kələmp kaŋkɛ kəyi nnɔ dətɛgbɛrɛ mɔ. Ta nədeŋər kɔ kəca!» Ɛnaloku ŋa moloku mamɛ, ntɛ tɔŋsɔŋɛ pətam kəyac Isifu defi, pəkenɛ kɔ kas mɔ. 23 Ntɛ Isifu ɛmbəp awɛŋc aŋa mɔ, kɔ akakɔ ŋawurɛ kɔ bərumus bɔnɔŋkəsəl lom bɔkɔ ɛnabɛrnɛ mɔ. 24 Kɔ ŋasumpər kɔ, kɔ ŋantorɛ kɔ dəkələmp. Kələmp kaŋkɔ kənawosər, ali domun kənayɔ fɛ. 25 Kɔ ŋandɛ ŋacdi yeri, ŋandeyekti fɔr, kɔ ŋanəŋk afum a Səmayila ŋayɛfɛ atɔf ŋa Kalahadu. Yɔkɔmɛ yaŋan yɛsarɛ gboŋgbo, simi, kɔ cigbili nyɛ ŋaŋckekərɛ Misira mɔ. 26 Kɔ Yuda oloku awɛŋc aŋa: «Ta ake tɔ andedifɛ wɛŋc kosu pamɛŋk mecir mɔn-ɛ? 27 Nəder pacamsər kɔ afum a Səmayila. Ta padeŋər kɔ kəca. Bawo wɛŋc kosu ɔfɔ, mecir min mayi mɔ ampaŋnɛ.» K'awɛŋc aŋa ŋanenɛ kɔ moloku mamɔkɔ. 28 Kɔ acaməs aMadiyaŋ aŋɛ ŋaŋc-cepər mɔ, ŋampɛnɛ Isifu dəkələmp. Kɔ awɛŋc a Isifu ŋaŋcamsər kɔ aMadiyaŋ gbeti ŋcəmbəl wəco mɛrəŋ, k'aMadiyaŋ ŋaŋkekərɛ Isifu Misira. 29 Ntɛ Ruben oluksərnɛ kədemɔmən kələmp disrɛ mɔ, ɛmbəp fɛ sɔ Isifu kələmp disrɛ. K'ɛwal-wali yɛbɛrnɛ yɔn. 30 K'ɛŋkafəlɛ nnɔ awɛŋc aŋa ŋayi mɔ, k'oloku: «Wan nwɛ eyi fɛ sɔ nnɔ dəkələmp! Cəke indeyɔ oŋ-ɛ?» 31 Kɔ ŋalɛk bərumus ba Isifu, kɔ ŋafay ambiyofo amera, kɔ ŋasopət bərumus babɔkɔ mecir. 32 Kɔ ŋaŋkenɛ kas kəŋan bərumus bɔnɔŋkəsəl lom ba Isifu babɔkɔ, kɔ ŋaŋkɔ ŋac-loku kas kəŋan: «Yamos yayɛ yɔ səŋkɔ sənəŋk. Məna sɔ məmɔmən ma kɔ pəyi fɔ bərumus ba wan kam bɔ-ɛ.» 33 Kɔ Yakuba ɛnɛpəl bi, k'oloku: «Bərumus ba wan kem bɔ! Wɛsɛm wɔlɔma wɛlɛc wɔsɔm kɔ! Wɛsɛm wɛwatəri-watəri kɔ!» 34 Kɔ Yakuba ɛwal-wali yamos yɔn, k'esekənɛ abɛk defi. K'ombok wan kɔn Isifu mataka mɛlarəm. 35 Kɔ awut ɔn arkun kɔ aran fəp ŋayɛfɛ kətorɛ-torɛ kɔ abəkəc. Mba k'ombupərɛ kəlɛtsɛnɛ fəp. K'oloku: «Indebok wan kem haŋ dɔsɔk ndɛ indekɔ-bəp kɔ dabiya mɔ!» K'ɛŋcəmɛ kəbok ka wan kɔn darəŋ.

36 Kɔ aMadiyaŋ ŋaŋcaməs Isifu Misira. Kɔ Potifar wətupɛ ka Firawona yeri nwɛ ɛnayɔnɛ wəbɛ ka abum a dəsaŋka sa Firawona mɔ, ɛway kɔ.