1 Ntɛ mes mamɔkɔ meŋcepər mɔ, k'aŋkɔ paloku Isifu a Papa kɔn ɛntamnɛ fɛ. Kɔ Isifu ɛlɛkɛnɛ awut ɔn mɛrəŋ Manase kɔ Ɛfrayim. 2 K'asɔŋɛ ti Yakuba kəcərɛ, k'aloku kɔ: «Wan kam Isifu eyi kəder nnɔ məyi mɔ.» Kɔ Yakuba oloŋka fənɔntər fɔn k'ɛyɛfɛ, k'ɛndɛ kəfəŋc kɔn kəroŋ. 3 Kɔ Yakuba oloku Isifu: «Kanu Kəpɔŋ nkɛ kəntam mes fəp ma doru mɔ kənawurər im dare da Lus nde atɔf ŋa Kanahan kɔ kəsɔŋ im temer kədepoc' em pətɔt.28:13 4 Kɔ kəlok' im: ‹Indesɔŋ əm dokombəra, indesɔŋ' am kəla, indesɔŋ' am kəyɔnɛ wətem ka afum alarəm. Indesɔŋ atɔf ŋaŋɛ afum am kɔ məŋcepər-ɛ, atɔf ŋaŋɛ ŋendeyɔnɛ ŋaŋan doru o doru.›» 5 «Ndɛkəl oŋ, awut mɛrəŋ aŋɛ məŋkom atɔf ŋa Misira a k'indeder nnɔ məyi mɔ, ŋandeyɔnɛ akemi. Ɛfrayim kɔ Manase ŋayɔnɛ akemi, pəmɔ tɔkɔ iyɔ Ruben kɔ Simɔŋ mɔ. 6 Mba awut aŋɛ məndekom oŋ aŋɛ mɛrəŋ tadarəŋ mɔ, akam ŋandeyi akakɔ, awɛŋc aŋa ŋɔ ŋandesɔtər kɛ. 7 Kəder kem Padaŋ, kɔ Rasɛl efir im dɔpɔ da Kanahan, ta pəmbɔlɛ su kəbɛrɛ Efrata-ɛ. Difɔ inawup kɔ katina dəndo dɔpɔ da Efrata, nde pəyɔnɛ Betlɛhɛm mɔ.» 8 Kɔ Yakuba ɔmɔmən awut a Isifu k'eyif: «Are ŋɔ akaŋɛ-ɛ?» 9 Kɔ Isifu oloku papa kɔn: «Awut em ŋɔ, aŋɛ Kanu kəsɔŋ im nnɔ mɔ.» Kɔ Yakuba oloku: «Ilɛtsɛn' am məyɔ ŋa ŋacɔŋnɛ nnɔ itolanɛ ŋa.» 10 Detem dɛnalɔləs Yakuba fɔr. Ɛŋc-tam fɛ sɔ kənəŋk. Kɔ Isifu ɔŋcɔŋ awut ɔn nde Yakuba eyi mɔ, kɔ Yakuba oŋcup ŋa, k'ɛmakərnɛ ŋa. 11 Kɔ Yakuba oloku Isifu: «Inacɛm-cɛmənɛ fɛ sɔ kədenəŋk əm. Mba Kanu kəsɔŋ' em k'inəŋk əm haŋ awut am!» 12 Kɔ Isifu eliŋ awut kas dələŋk, k'ɛŋcəp kəro dəntɔf. 13 Kɔ Isifu osumpər mɛrəŋ maŋan fəp waca, pəsumpərɛ Ɛfrayim kəca kətɔt mba pəyi kəca kəmeriya ka Yakuba, k'osumpərɛ Manase kəca kəmeriya mba pəyi Yakuba kəca kətɔt, k'ɔŋcɔŋɛnɛ ŋa sɔ nde wətem kəŋan eyi mɔ. 14 Kɔ Yakuba ɛntɛŋc kəca kɔn kətɔt, k'endeŋ ki Ɛfrayim dəromp nwɛ ɛnafɛtɛ mɔ, k'endeŋər Manase kəca kɔn kəmeriya dəromp. Ɛnacərɛ bel-bel tɔkɔ ɔŋcyɔ waca wɔn mɔ, ali ntɛ Manase ɛnayɔnɛ wan wəcɔkɔ-cɔkɔ mɔ. 15 Motolanɛ mmɛ mɔ Yakuba ɛnatolanɛ Isifu:

17 Ntɛ Isifu ɛnəŋk kas pəc-deŋər Ɛfrayim kəca kɔn kətɔt mɔ, kɔ tɔntɔbɔt kɔ. Kɔ Isifu osumpər kəca ka kas, k'ɔŋcɔŋ ntende domp da Manase ta pədeŋər ki Ɛfrayim. 18 Kɔ Isifu oloku papa kɔn: «Ta məyɔ tantɛ, fɔtɔ Manase ɛbɛk. Nkɔn ɔ pəmar mədeŋər kəca kam kətɔt.» 19 Kɔ papa kɔn ɛfati, k'oloku: «Iŋcərɛ ti, wan kem. Iŋcərɛ ti! Nkɔn sɔ endeyɔnɛ wətem ka afum alarəm, endebɛk. Mba wɛŋc Tɔŋɔ endebɛk kɔ, awut ɔn ŋandelas tɔf fəp.» 20 Kɔ Yakuba ontolanɛ ŋa dɔsɔk dadɔkɔ, k'oloku: «Mən' endesɔŋɛ Yakuba pəc-tolanɛ a pəc-kulɛ fɔ: ‹Kanu kəsɔŋ' am kəyi pəmɔ Ɛfrayim, pəmɔ Manase!›» Tatɔkɔ tɔ Yakuba ɛnacəmbər Efrayim Manase kiriŋ. 21 Kɔ Yakuba oloku Isifu: «Kəfi k'inder! Mba Kanu kəndesolɛ nu. Kəndeluksɛ nu atɔf ŋa atem anu. 22 Imbɛrɛn' am pɔkɔ awɛŋc əm aŋa ŋantɔdesɔtɔ mɔ* Paka papɔkɔ pɔyɔnɛ dare da Səkɛm., ip' ɔyɔnɛ mpɛ inabaŋərɛ aka Amɔr dakma dem kɔ ambəŋcəran ŋem mɔ.»