Tawureta Musa, Buk 3:
Sariyɛ sa ALewy kɔ sa Kəloŋnɛ
Moloku ma kəsɔkəs buk ba Musa ba maas: Sariyɛ sa aLewy kɔ sa kəloŋnɛ
Buk bambɛ bɔyɔnɛ buk ba maas ba Aŋnabi Musa, mbɛ aŋwe «Sariyɛ sa aLewy» mɔ. MARIKI, encemp, ɔyɔ fɛ wətubcɛnɛ. Mpɛ o mpɛ aŋkɛrɛ kɔ mɔ, pəmar pɔyɔnɛ poloŋnɛ pɔtɔt, pəmar sɔ pacəmɛ sariyɛ sa kəloŋnɛ darəŋ tin tin tin, ntɛ tɔŋsɔŋɛ pəbaŋ ki mɔ. Sariyɛ saŋsɛ səloku tɔkɔ pəmar packɛrɛ MARIKI yoloŋnɛ, kɔ sariyɛ sa yɛbəc ya aloŋnɛ nde aŋgbancan ŋɛbəpɛnɛ kɔ Kanu.
MARIKI ɛnayɛk-yɛk kusuŋka k'aLewy aka Yisrayel dacɔ kəyɔnɛ aloŋnɛnɛ aŋan, k'ɛndəs ŋa kəyɔnɛ asumpər-sumpər a yɛbəc yɔn ya aŋgbip ŋɔn ŋosoku. Kəyɛfɛ tɛm tobol-bolu atəksɛ ŋancɛm-cɛmnɛ, a Aŋnabi Musa ɛnacicəs buk bambɛ. Ŋancɛm-cɛmnɛ sɔ a Musa ɛnacicəs səbuk kəcamət səcɔkɔ-cɔkɔ sa Toloku ta Kanu, nsɛ səyɔnɛ Dəkəcop, Kəwur, ALewy, Kəlɔm, kɔ Sariyɛ* Dəkəcop da doru (Genèse), Kəwur ka dacar Misira (Exode), Kəlɔm ka aka Yisrayel (Nombres) kɔ Sariyɛ səgbɔkərɛ (Deutéronome). Itɔ aŋnəŋk nde sora səcɔkɔ-cɔkɔ sa buk bambɛ: «Kɔ MARIKI ewe Musa ..., k'osom kɔ ...» Atəksɛ alɔma ŋancɛm-cɛmnɛ a kɔ tɔyɔnɛ a analompəs moloku ma buk bambɛ kəyɛfɛ yecicəs yokur nyɛ anabəp nde dare da Babilɔŋ meren masar kəcamət (500) ta antakom Yesu mɔ.
Buk bambɛ disrɛ alɔm yoloŋnɛ nyɛ o nyɛ Kanu kənasom aloŋnɛ kəkɛrɛ mɔ. Yoloŋnɛ yɔlɔma nyɛ aŋkɛrɛ teta kiciya ka afum mɔ. Yɔkɔ aŋkɛrɛ MARIKI teta tɛfaŋ ta fum: Wəkayi pəkɛrɛ yi abəkəc ŋosoku pɛs bawo ɔmbɔtər MARIKI. Mba mpɛ o mpɛ pɔyɔnɛ pɔtɔt, mpɛ fum ɛŋkɛrɛ MARIKI mɔ, pəmar pɔyɔnɛ pɔtɔt pɛtas ca yɔn yɔlɔma, ta pɔyɔ dolokəp. Ti tementər a Kanu, kəcempi kɔ. Tɛlpəs nde buk bambɛ, Kanu kəlɔm cəke cɔ aka Yisrayel kɔ aloŋnɛ ŋantam kəyɔnɛ afum apus fɔr ya Kanu kiriŋ, kɔ tɔyɔnɛ ŋayik-yikəsnɛ-ɛ, ntɛ ŋaŋyɔ a ŋasɔkəsnɛ sɔ nnɔ Kanu kəyi mɔ. Buk bambɛ disrɛ sənəŋk belbel a Kanu kəyɔ fɛ wətubcɛnɛ. K'andecəmɛ sariyɛ sa buk bambɛ darəŋ-ɛ, aka Yisrayel ŋandetam kəyi doru kəbum ka Kanu dəntɔf.
Teyer ta buk bambɛ
1-7, Sariyɛ sa kəloŋnɛ.
8-10, Aruna kɔ awut ɔn kədəs kəŋan yɛbəc ya kəloŋnɛ.
11-16, Sariyɛ sa yeri, kɔ sa docu.
17-27, Sariyɛ sa mes mɔlɔma: Dəkədi yeri, cəsata, mɔyɔ mɔtɔt kɔ kəleləs ka teren ta kəŋesəm ka antɔf.
Sariyɛ sa ALewy kɔ sa Kəloŋnɛ
1
Sariyɛ sa yoloŋnɛ
1-7
Kəloŋnɛ ka yɔcɔl yoloŋnɛ yɔcɔfɛ MARIKI
1 Kɔ MARIKI ewe Musa kəyɛfɛ ka nde aŋgbancan ŋɛbəpɛnɛ kɔ Kanu, k'osom kɔ: 2 «Məloku aka Yisrayel ntɛ: Kɔ fum wəkin nəna dacɔ ɛfaŋ kəpocɛ MARIKI pɔcɔl teta kəloŋnɛ-ɛ, ɛntam kəlɛk pi nde cir, ŋkesiya kɔ pəyɔnɛ fɛ ti-ɛ cəna cɔn dacɔ.
3 Kɔ fum endekenɛ MARIKI wana teta poloŋnɛ pɔcɔf pɔn-ɛ, pɔyɔnɛ tura pɔtɔyɔ dolokəp. Wəkayi pəkekərɛ pi nde dəkəbɛrɛ da aŋgbancan ŋɛbəpɛnɛ kɔ Kanu, ntɛ tɔŋsɔŋɛ MARIKI pəbaŋ kəpocɛ kaŋkɔ mɔ. 4 Wəkayi pədeŋ kəca kɔn pɔcɔl poloŋnɛ pɔcɔf papɔkɔ dəromp, MARIKI ɛmbaŋ kəpocɛ kaŋkɔ teta kəsɔkəs ka kiciya kɔn. 5 Wəkɛrɛ ka tura papɔkɔ pəfay pi MARIKI fɔr kiriŋ. Awut arkun yuruya ya Aruna aloŋnɛ ŋasu tɔbɔl, mecir mamɔkɔ mɛmbɛrɛ pi disrɛ. Ŋamentər mi MARIKI, ŋawɛsəsər mi cəsək ca tetek toloŋnɛ mpɛ peyi dəkəbɛrɛ da aŋgbancan ŋɛbəpɛnɛ kɔ Kanu mɔ haŋ ŋanɔŋkər. 6 Fum wəkayi pənat poloŋnɛ pɔcɔf papɔkɔ, pəcɛnəs pi fəkəl fəkəl. 7 Awut arkun a Aruna wəloŋnɛ ŋade ŋacmot nɛnc nde tetek toloŋnɛ ta Kanu kəroŋ, ŋade ŋaccɔl tɔk dənɛnc. 8 Awut arkun a Aruna aloŋnɛ ŋade ŋacboc fəkəl ya sɛm yayɔkɔ, domp kɔ moro ma yi ŋade ŋacdeŋ yi dətɔk ya nɛnc nde tetek toloŋnɛ Kanu kəroŋ. 9 Wəkɛrɛ tura papɔkɔ pəyakɛ yedisrɛ kɔ wɛcək wa pi domun, k'elip-ɛ, wəloŋnɛ wəkin pəlɛk yi pəcɔfɛ MARIKI fəp nde tetek toloŋnɛ kəroŋ. Pɔcɔl pɔcɔf pɔ, kəloŋnɛ nkɛ ancɔfɛ MARIKI mɔ, ambɔnc ŋa ki ŋontorɛ-torɛ MARIKI abəkəc.
10 Kɔ fum endekenɛ pɔcɔl poloŋnɛ pɔcɔf mpɛ ɛlɛk dəŋkesiya kɔ pəyɔnɛ fɛ ti dəcir cɔn mɔ-ɛ, pɔyɔnɛ porkun mpɛ pɔntɔyɔ dolokəp mɔ. 11 Pəfay pi tetek toloŋnɛ Kanu kəca kəmeriya nkɛ dec dɛmpɛ mɔ MARIKI fɔr kiriŋ, pabɛr mecir mamɔkɔ fəp tɔbɔl disrɛ. Awut arkun a Aruna aloŋnɛ ŋalɛk mecir mamɔkɔ ŋawɛsəsər mi tetek toloŋnɛ Kanu cəsək fəp. 12 Wəsɔŋ pɔcɔl papɔkɔ pəcɛnəs pi fəkəl fəkəl, domp kɔ moro, wəloŋnɛ pədeŋ fəkəl ya sɛm yayɔkɔ nɛnc da tetek toloŋnɛ Kanu kəroŋ. 13 Pəyakɛ yedisrɛ kɔ wɛcək wawɔkɔ domun. Wəloŋnɛ pəlɛk pəkenɛ yi fəp MARIKI, pəcɔfɛ kɔ yi nde tetek toloŋnɛ kəroŋ. Pɔcɔl pɔcɔf pɔ, kəloŋnɛ nkɛ ancɔfɛ MARIKI mɔ, ambɔnc ŋa ki ŋontorɛ-torɛ MARIKI abəkəc.
14 Kɔ fum endekenɛ MARIKI abɛmp teta poloŋnɛ pɔcɔf-ɛ, wəkayi pəlɛk mɔpay kɔ pəyɔnɛ fɛ ti-ɛ, ntantoriya. 15 Wəloŋnɛ pəkekərɛ abɛmp nŋɛ nde dətetek toloŋnɛ ta Kanu kəroŋ, pəkɔncəl ŋi kilim, pəcɔfɛ ŋi MARIKI domp nde tetek toloŋnɛ kəroŋ, pəloŋər mecir ma abɛmp ŋaŋɔkɔ tetek toloŋnɛ Kanu cəsək. 16 Wəloŋnɛ pəwurɛ tɔlɔba pɛmɛŋkɛ yeri kɔ rɔt ya abɛmp ŋaŋɔkɔ, pəgbal yi tetek toloŋnɛ Kanu kəsək ntende dec dɛmpɛ mɔ, nde ambɛr kəbof kəboŋu mɔ. 17 Wəloŋnɛ pəgberi abɛmp ŋaŋɔkɔ banca dacɔ kɛp mɛrəŋ, mba ta pəgbɛy ŋi. Pəcɔfɛ ŋi MARIKI nde tɔk ya tetek toloŋnɛ kəroŋ. Pɔcɔl pɔcɔf pɔ, kəloŋnɛ nkɛ ancɔfɛ MARIKI mɔ, ambɔnc ŋa ki ŋontorɛ-torɛ MARIKI abəkəc.»
*^ Dəkəcop da doru (Genèse), Kəwur ka dacar Misira (Exode), Kəlɔm ka aka Yisrayel (Nombres) kɔ Sariyɛ səgbɔkərɛ (Deutéronome)