ካኢብራዊ እባዶ ቶስ ካፋራመሮ ሀንዳ
ታባኖ
ሂክ ሀንዳ ካኮንጻፋመራ እባዶ እሶ ጎዲደ አማኖክሶ እስን ካጋባላመሮ አማኒሉዉንየ፤ ጻፊት እብራዊጆሉን ካአዴስሰራ የሱሳ ክርስቶሳ ካሩሚና ካጋቾ ሙታኖ ካዋ ላኖ ቱስንያ። ሂክ አማኒል አማኖክሶይ ጎጎኣራራዉን አታይሳራ፤ ሂካ ካኮፈለ ጎራታ ሩም ሴድ አዴስሰ ቱሳራ፥
1. ታአታተሮ ራኮ ኮት ጋራነ ካሩም ኦዶን ካአጃጃማሮ ካሌራ የሱሳ ጅሩ ጅሮማክ ኤረ ካዋያ፤ ኤረ ካዋ ላኖይ አማቶ ኦሆርኮክ ካሄገሮልኮ፥ ሙሴኮና ኤርግቻልኮ ኣሎ ካሮረያ።
2. የሱሳ አማቶ ኦሆርኮ ኮክ ቱቃሞልኮ ኣሎ ካሮረ ጅሩ ጅሮማክ ቱቃሞ ላኖ ዋ እሲ አዬሰራ።
3. ጋራ ካየሱሳነ አማኒል ጩቦኮ፥ አብስኮና ጎይኮ ፋይናራ፤ የሱሳ ቱቃሞልኮክ ዎይቻ ላኖይ ካኢብራዊ እባዶኮክ አማኖ ሴራና ካግድ ጃርሶ ሆስ ኣን ሙታ ካግረ ፋይና ሩም ጎጎሌሮን የለራ።
ጻፍት ታእስራኤል ጅርት ካአዴሳመ እባዶኮክ አማኖ ማሱሳ የላተረያ፥ (ፎልሲ። 11) ኦናባባራን አማኖክሶይ ጎጎአታራዉን አዴስሳራ፤ ኡሱማለና (ፎልሲ። 12) አማና እልኦ ኦትሶ የሱሳ ጉት ካኖይ አማኖክሶይ ጎጎአታራዉና ማምስት ራኮና አቦሳ ጎጌና ጎጎኦብስራዉን ጎርሳራ፥ ጉድሳና ካጎርሳ ሃፉራ ስሳ ጉድሳራ።
ራቶ ሂክ ማጻፋ ካአበራ
ታባኖ፥ ዋ ክርስቶሳይ ሙታኖ 1፡1-3
ክርስቶሳ ኤርግቻኮ ካሮራን ላኖ 1፡4—2፡18
ክርስቶሳ ሙሴኮና ኢያሱኮ ካሮረ ላኖ 3፡1—4፡13
ቱቃሞ ላኖ ካክርስቶሳ ዱባንኮ ካሮራሮ ላኖ 4፡14—7፡28
ካክርስቶሳ ሃፉራ አማቶኮ ካሮራሮ ላኖ 8፡1—9፡22
ካክርስቶሳ ጃርሳማኖኮክ ጂናን 9፡23—10፡39
አማኖኮክ ጂናን 11፡1—12፡29
ዋ ገጌላይሳኖ 13፡1-19
ካጩፋኖ ኤብ 13፡20-21
ጉድሳኖ 13፡22-25
1
ዋ ኤረኬሳኮክ ጋራነ አዬሳኖ
1 ሆርኮስኮ ካየረ ዋ ራ ካሞጋንና ጎራታ ካሞጋኒ ጋራ ካሄገሮልነ ኦዶጆልካኑን አዬሰረ፤ 2 ግዳ ጎአመን ካጋቾ ጌሲ ካመን ዱባ ጎጎኤሎን ካየለሮ ኤረኬሳኮክ ጋራነ ኖን አዬሰራ፤ አላም ዱባ ካኮመጠራ ኡሱያ። 3 ኡሱ ካባጃ ታዋ ሀንቃይሰ ካቱሳሮያ፤ ያዳሊቴሳና ዋኔ ዎታ ታኤካቶታ፥ ሃፉራኮክ ሁናይ አላም ዱባ እስክሰ አበራ፥ እባዶ ጩቦኮ ቁሎይሰ አባባተረ ዳሩሪ ካአቲ ዋኮት መርጌ ሀማጼ።
ኤረ ካዋ ኤርግቻልኮ ካሮራሮ ላኖ
4 ኡሱን ካቤራ መገ ካኤርግቻ መገኮ ካሮራሮ ማንኮሌ ማራን፥ ኤረ ካዋ ኤርግቻኮ ኣሎ ካሮራሮያ።
5 ዋ ዱዶ ኤርግቻል ኦሮ፥
“አት ኤረኬታ፥ አን ኩ ህታር ኡሙለራ”
ጎርቱን
“አን ኦዶ ሌሮዋ፥ ኡሱና ኤረኬ ልናራ”
ካኮንአመረ ማዮና ላግረ። ማዛ. 2፡7፤ 2 ሳሜ. 7፡14፤ 1 ኦዱ 17፡13።
6 ዋ ባርክ ኤረኬሳ አላም ቶስ ካኮፋራረ ጎራታ፥
“ኤርግቻ ካዋ ዱባ ኡሱን ሀሳጋደ” አመራ። አዳ. 32፡43።
7 ኤርግቻኮክ ጋራ፥
“ኤርግቻልና አምባል ኣን፥
ኦሀንዳራና ላጫ ካኤሌኔ ኣን የልናራ” አማራ። ማዛ. 104፡4።
8 ኤረኬሳኮክ ጋራ አደ፤
“ሄዶ! ኮርፍንጀካ ጅሩ ጅሮማኮ ታ ጅሩጅሮማ ጌሮን ግርናራ፤
ዎኖናትካና ሩሚ ባሪሳታ፤
9 አት ቁሉማ ጌላታ፤ ሜላነና ዲዳታ፤
ሂካኮት ኣላንቲ ዋ ሄዶካ ኩ አሳባተ፤
ሳትላልታኮ ሮርሰ ገጌሎ ታስሳቶ ዛይት ኩን ሽግደ” አማራ። ማዛ. 45፡6-7።
10 ኡሱማለና፥
ጎታኬ! “አት ሆራርጀ ኡል መጢተ፤
ዳሩርጆልና ገነታይ መጢተ፤
11 እሶ ዱባ ባይናራን፤
አት አደ ግርናታ፤
እሶ ዱባ ሳርስ ኣን ዶአይናራን።
12 ጋሸ አንና አት ዱብናታ፤
እሶና ሳርስ ካዶአን ሳርስ ካኡሱቢ ጎጎኢግልሳማሮ ማለ ኢግልሳምናራን።
አት አርጌቶ አትታ፥
ጌስካዉን ጋቾ ላግቶ” አማራ። ማዛ. 102፡25-27።
13 ዋ ኤርግቻል ኦሮ፤
“ዲናካ ኦዶናትካ ሄገሊ ታ የሎይ
መርገቴይ ሀማጺ” ካኮንአመራ ማዮና ላግሮ። ማዛ. 110፡1።
14 ኤርግቻል ዱባ ዋ አማን ካፋይናሮ እባዶን ሀንዳይን ኦፋራማራን ዋዉን ኦሀንዳራን አያናልያን።