ካፋራመሮ ጳዉሎሳኮክ ሀንዳ
ፍልሞና ቶስ
ታባኖ
ፍልሞና ካአዴሳመ አማንየ፥ ካቆላስያስ ምን ካዋኮክ ማጋናልኮ ኮያ አማመ ሄዳማራ። ፍልሞና አናስሞሳ ካአማማሮ ድይት አባናየ፥ ሂክ ድይትና ጎታኬሳኮ ኢሰ ባየ ታኮቤረ ምን ካሻኖ ካግረ ጳዉሎሳነ ዎታ ኤሰሌን፥ ጋራ ካጳዉሎሳነ አናስሞሳ ካክርስትና አማኖ አታተ፥ ጳዉሎሳ ፍልሞና ቶስ ካጻፈረ ሀንዳ ፍልሞና አባባተ ኡሱ ቶስ ኤመቶ ጉት ካግሮ ድይት አናስሞሳ ዎታ ጎጎዎጋሮ ካሻድሳሮየ፥ አዳኖይና ግዳ አናስሞሳ ክርስታና ማንኮሌ ማራን ሂታኮ ሆረንባን ካአማኖ አቢ ኣን ኡሱ ጎጎቆጳሮን ኳሬ ድይ ኣን ኡሱ ጎጎቶትኖንኮ ሰጋራ።
ራቶ ሂክ ማጻፋ ካአበራ
ታባኖ 1-3
ካጳዉሎሳ ጋላታ ፍልሞናን 4-7
ጳዉሎሳ ጋራ ካአናስሞሳ ካኤባተሮ ካአቲ ኤብ 8-22
ጉድሳኖ 23-25
1
1 የሱሳ ክርስቶሳ ማራን ካሽያመሮ ጳዉሎሳኮና አብካን ጢሞቶሳኮ፥ ኣሎ ኖ ካጌላታኖና ኖኔ ዎታ ካፈላሮ ፍልሞናን። 2 አባታን አፍብያን፥ ኖኔ ዎታ ዎታዳራ ካሌሮን አርክጳን ምንካይ ካኩኩማሮ አማኒሉን፥ *ምንካይ ካኩኩማሮ አማኒሉን፦ ሄእ ታግሪኪ ምንካይ ካግሮ ምንካዋዉን አማራ። ቆላ. 4፡17።
3 ዋ ኣቦካንኮና፥ ጎታ የሱሳ ክርስቶሳኮ ስኖና ኖጎዳ እስኑን ሀሌቶ።
ታፍልሞና ጌላንጄና አማኖ
4 ኩ ኤብኬይ ሻዳ አርጌቶ ሄዶኬ ጋላታራ። 5 ኣላንቲና ጎታ የሱሳን ካአብቶ አማኖና ቁሎለ ዱባን ታአብቶ ጌላንጀ ማለራ። 6 ክርስቶሳ ማንኮግኖ ማራን አየስ ካእዳን ዱባ ኣሎ ጎጎአዴሶን፥ አማኖካ ካካለቱን ገጊሳ ጎጎአታቶን ኤባታራ። 7 አቢኬ! ቁሎለኮት ዎዳና ማንኮፎልሲሴዉን ጌላንጀታኮ ገጌሎ ኦአቲና ጎጎኢና ሄላየራ።
ጳዉሎሳ አናስሞሳ ማራን ዎጋርስ ኤባተ
8 ሃንሱን ፈልን ካዶትሳሮ አት ጎጎፈልቶን ኩ አጃጅን ክርስቶሳይ ጃቡ ኢን ጎግርተና፥ 9 ጎርታ ጃርሳና ግዳ አደ ክርስቶሳ የሱሳን ካሽያመራ አን ጳዉሎሳ ጌላንጄ ኩ ኤባታራ። 10 ምን ካሻኖ ግራን ካኡሙለሮ ኤረኬ አናስሞሳ ማራን ኤባታራ። ቆላ. 4፡9። 11 ጣየ ኩን ላኦ ካላይክየ፤ ግዳ አደ ኩና ሌረ እዬን ላኦ ካአቦ ሌራ።
12 ዎዳናቴ ማለ ካሌሮ ኡሱ አባበ ኩ ቶስ ፋረራ። 13 ዎንጋላ ማራን አን ታኮሻመሬ ባንኤታይ ሌረ ኢን ጎጎሀንዳይሮን ሃሳይን ዶተረ። 14 አየሱን ጎአመን አት ካፈላቶ ካእዳንክ አየስ ዱባ ጌላንጄ ኳሬ ሁና ጎጎሌኖንኮ ኩኔ ሀማካሮን ኮና ፈልን ላኮዶታሮ።
15 ዎዳሳን አናስሞሳ ጎራታ ክጫሩን ኩኮ ካኮንካለቤራ፥ ኡሱ ቆጳይደ ኤርናዉን ኩ ዶሌ ጎጎአዳላይሶንያ። 16 ሂታኮ ሆረንባን አደ ድይ ኣን ሀሌኖን ግራን ድይኮ ካሮራሮ አዉኣሎክ አብያ፤ ኢን ካጌላመያ፥ ሀሌዎ ኳሬ ሶይ ኡሱ ሀንዳኖኬሳ ኩ ማንኮማድናሮ ማራን አያና አደ ክርስቶሳ አቢ ኩን ማንኮሌ ማራን ኩዬን አደ ኣሎ ካጌላመያ።
17 ጎርታ እን ሳቲ ኣን ጎቶትተ እን ጎጎቆጳቶ ማለ የላ ኡሱ አታ። 18 ኡሱ ኩ ካኮሚረራ አየስ ጎግረ ጎርቱን አምአታታ ኡሱ ጉት ጎግቴ እን ጉት ቶቲ። 19 አን ጳዉሎሳ ሂካ ገነቴይ ጻፈራ፥ ኡሱ ታአቦ አንዛ አን ሙርናራ። አት መተካዉን ካኬ ማንኮሌተዉን ኮና ላኮአዬስናሮ። 20 አቢክ ጎታይ እን ጎጎማድቶን ዶታራ፥ ክርስቶሳ ዎዳናቴ ፎልሲስ።
21 ኢን ካአጃጃማቶ ላኖ አብዳታ፥ አን ካሆሳታሮኮና ሮርስ ካፈልናቶ አዴሰረ ጻፋራ። 22 ሂካኮና ካካለ፥ ኤብክስን አባብ ሄላይረ አን እስን ቶስ ኤመይን አብድ ማንኮየላታሮ ማራን ታኮፎልሳሮ ባንኤ ኢን ኤካሳ።
ታጋቾ ኖጎዳ
23 እን ዎታ ክርስቶሳ የሱሳ ካሽያመራ ኤጳፍራ ኖጎዳ ፋራማራ። ቆላ. 1፡7፤ 4፡12። 24 ኡሱማለና ኢነ ዎታ ኦፈላራንኮ ማርቆሳ፥ አርስጢሮኮሳ፥ ዴማሳና ሉቃሳና ኖጎዳ ፋራማራን። ኦፋ. ፈ. 12፡12፤ 25፤ 13፡13፤ 15፡37-39፤ 19፡29፤ 27፡2፤ ቆላ. 4፡10፥14፤ 2 ጢሞ. 4፡10፥11። 25 ታጎታ የሱሳ ክርስቶሳ ስኖ እስን ዎታ ሀሌቶ።