4
ጫፋማኖ ካየሱሳ
(ማር. 1፡12-13፤ ሉቃ. 4፡1-13)
1 ሂካኮ አባባተረ አያና ቁሉክ የሱሳ ዱርሳይ ጎጎጫፋምሮ ቃሉላቶክ ኡል ቶስ ኣተ ቤ። እብ. 2፡18፤ 4፡15። 2 ሄመን አፋርታምና አሪ አፋርታም አጋቡኮ አባባተረ ኡኤ። ብያ. 34፡28፤ 1 ዎኖ. 19፡8። 3 ካጫፋረክና የሱሳ ቶስ ጋባላመረ “አት ኤረ ካዋ ጎሌተ ሂካ ኤኤሞል ባቦ ጎጎሌሮ አጃጂ” አመ።
4 የሱሳና፥ “እባዶ ህኢ ታዋኮ ካብያሮ ሃፉራ ዱባ ኳሬ ባቦ ካላሊ ላኮግራሮ አማመ ማጻፋ ቁሉክ ጻፋመራ” አመ አባበ። አዳ. 8፡3።
5 አደና ዱርሳ የሱሳ ቁሉት ካታማ ኢየሩሳለም ቶስ ኣተ ሴተጉረ ቁሉክ ምን ካዋይ ብርጠ ኣተ ቤጉረ፥ ነህ. 11፡1፤ ዳኔ. 9፡24።
6 “አት ኤረ ካዋ ጎሌተ” “ሄገልዴ እሲ ፍርም፥
ሉቃኦታ ኤኤሞይ ጎጎሀንዱዱፋኖንኮ እሶ ገነትሶይ ጎጎኬስናዉን ኤርግቻል ኩ ማራን አጃጅናራ አማመ ማጻፋ ቁሉክ ጻፋመራ አመ።”ማዛ. 91፡11-12።
7 የሱሳና፥ አባበረ፥ “ጎታ ሄዶካ አሮጫፍተ አማመ አደ ማጻፋ ቁሉክ ጻፋመራ” አመ አባበ። አዳ. 6፡16።
8 አደና፥ ዱርሳ የሱሳ ኣሎ ጦቂ ታአንተ ዎዳሚ ኮርሰጉረ አላምኮክ ዎኖላል ካባጃትሶነ ዎታ ኡሱን ቱሰጉረ፥ 9 “አት እን ሆረ ኢጉደ ግልቢስ ጎሳጋደ ሂካ ዱባ አን ኩን ስስናራ አመ።”
10 የሱሳና፥ “አት ጻላየ እን ሆረኮ ፋክአም! ‘ዋ ሄዶካዉን ሳጋድ፤ ኡሱ ካላልና ሄዶይሳ’ አማመ ማጻፋ ቁሉክ ጻፋመራ” አመ። አዳ. 6፡13።
11 ኤሰኮና ዱርሳ ኢሰ ሴተ፤ ኤርግቻልና ኤመተጉረ ኡሱን ሀንዳየ።
የሱሳ ሀንዳኖ ጋሊላ ሀጋአበ
12 የሱሳ ሻማኖ ካያንሳ ማለረ ኡል ካጋሊላ ቶስ አባባተ ሴተ። ማቶ. 14፡3፤ ማር. 6፡17፤ ሉቃ. 3፡19-20። 13 ታናዝረት ካታማ ኢሰጉረ፤ ዛብሎንና ንፍታሌምኮት አዉራጃይ ታጋሊላ ላቡ ግርዲ ታግቶ ታቅፍረናሆም ካታማይ ግራኖ ሀጋአበ። ያን. 2፡12።
14 ሂካኒና ካሄገሮ እስያሳይ ሃ አማሜን ኦሰጋመራን ሄገሮ ፈሎ ሀዬን።
15 “ኡል ካዛብሎንና ኡል ካንፍታሌም፥ ዮርዳኖስኮ ጋማ
ላቡ ግሪ ካግሮ ራ ዶሌ ካጋሊላ አይዛብ፥
16 ሙጉዲ ካግረ ጎሳ
ካአቲ ኢፋ ዴ፤
ሆስ ታጎይ ካግረ እባዶና
ኢፋ ቤ።”ኢሳ. 9፡1-2።
17 ሀሱ ጎራታኮ ሀጋአበረ የሱሳ፥ “ዎኖናት ካዳሩረ ጋባላመራ ጩቦኮ ጉላ ጋላ” አመ ላላባኖ ሀጋአበ። ማቶ. 3፡2።
የሱሳ ኩኑኡብ ካአባታረ እባዶ አፋር ኡማኖ
(ማር. 1፡16-20፤ ሉቃ. 5፡1-11)
18 የሱሳ ታጋሊላ ላቡ ግርንደ ሮራ ግራን አቢላል ላማ ጴጢሮሳ ካአማማሮ ስሞናነ አቢኬሳ እንድራሳነ ዴ። ኩኑኡብ ኦአባታሬን ማንኮሌን ማራን ማራብትሶ በከሮ ሉጉዳታ ግረን። 19 የሱሳና “ኮዬን እን ዴበ ሰሴዬን” እባዶ ዎኖናት ካዋ ቶስ ጎጎኬንታኑን አን እስን የልናራ አመ። 20 ጎርሰዋ ማራብትሶ ኢሴንጉሬን ኡሱ ዴበ ሰሴተን።
21 ኤሰኮ ጎጎሮረይ ታካለ አቢላል ላማ ኤረ ካዛብዶሳ ያይቆባና አቢኬሳ ያንሳነ ዴ። ኣቦክሶ ዛብዶሳነ ዎታ ዎላቦ ኦሮ ማራብትሶ ኤካሳታ ግረን፤ የሱሳና እሶ ኡመ፤ 22 ጎርሰዋ እሶ ዎላቦትሶና ኣቦክሶ ኢሰን የሱሳ ዴበ ሰሴተን።
የሱሳ እባዶ ካሞጋን አጋልስሳኖና ፋይሳኖ
(ሉቃ. 6፡17-19)
23 የሱሳና አይሁድኮክ ምን ካኤብ ዎኖናት ካዋኮክ ካገጌሎ ሃፉራ አጋልስሳና ላላባ፤ ጎሳ ኦሮ ካግሮ ማምስክ ሀዉኣምኮና ማሪ ጉት ታግቶ ራኮ ታሞጋንኮ ፋይሳ ካጋሊላ ኡል ዱባ ማራሙራ ግረ። ማቶ. 9፡35፤ ማር. 1፡39።*ምኩራቦች፦ አማኖ እባዶ ታኮኩኩማሮ ባንኤ ጎሌቶ፥ አይሁድኮክ ምን ካኤብ ምኩራብ አማማራ። 24 ሂካኮ ካከይ አታንኬሳ ካሶርያ ኡል ዱባ ማልሳመ፤ ጎሳና ካለካለክ ሀዉኣም ሀዉኣማ ካግረና፤ ማር ኦሮክ ሀዉኣም ካሜላኒ አቦሳማረን፤ ዱርሳ ጉት ካኮግረና ካጋጋዱ ሀዉኣም ኦአባናየን፤ ናፋለሳል ዱባ ኡሱ ቶስ ከነን፤ ኡሱና እሶ ፋይሰ። 25 ሂካኮ ካከይ፤ ጋሊላኮና፥ ካታማ ቶሞንኮ ኢየሩሳለምኮ፥ ይሁዳኮና፥ ላጋ ካዮርዳኖስ ጋማኮ ካኤመተራ ካሞጋን እባዶ የሱሳ ዴበ ሰሴተ። †ካታማል ቶሞን፦ ሄኢ ታግርኪ ኦአዬሳራና አይሁድ ካሌኖን ጎሳ ራቶ ታኮግሮ ባንኤ ካታማል ቶሞን አማማታ። ሂክ ካታማል ጋማካሆር ካኮግራን ኦጋሊላ በከኮ ምና ታብያነና ታኢያን ብያነያ።
4:1 እብ. 2፡18፤ 4፡15።
4:2 ብያ. 34፡28፤ 1 ዎኖ. 19፡8።
4:4 አዳ. 8፡3።
4:5 ነህ. 11፡1፤ ዳኔ. 9፡24።
4:6 ማዛ. 91፡11-12።
4:7 አዳ. 6፡16።
4:10 አዳ. 6፡13።
4:12 ማቶ. 14፡3፤ ማር. 6፡17፤ ሉቃ. 3፡19-20።
4:13 ያን. 2፡12።
4:16 ኢሳ. 9፡1-2።
4:17 ማቶ. 3፡2።
4:23 ማቶ. 9፡35፤ ማር. 1፡39።
*4:23 ምኩራቦች፦ አማኖ እባዶ ታኮኩኩማሮ ባንኤ ጎሌቶ፥ አይሁድኮክ ምን ካኤብ ምኩራብ አማማራ።
†4:25 ካታማል ቶሞን፦ ሄኢ ታግርኪ ኦአዬሳራና አይሁድ ካሌኖን ጎሳ ራቶ ታኮግሮ ባንኤ ካታማል ቶሞን አማማታ። ሂክ ካታማል ጋማካሆር ካኮግራን ኦጋሊላ በከኮ ምና ታብያነና ታኢያን ብያነያ።