አማቶ ኦኡሱብ ማቶሳ 5

የሱሳ ዎዳሚ ጉት ላላባኖ

1 የሱሳ ጎሳ ካኮድያረ ጎራታ ዎዳም ቶስ ቤጉረ ሀማጼ፤ ኡሱኮ ኦአጋልሳታረን ኡሱ ቶስ ኤመተን። 2 ሃ አማ አጋልስሳኖ ሀጋአበ።

ካሶማሳመ እባዶ

(ሉቃ. 6፡20-23)

3 “አያናክሶይ ዋ ኦዶታታራን ኦሶማሳመንያን፤

ዎኖናት ካዳሩረ ካክሶያ።

4 ኦጋዳራን ኦሶማሳመንያን፤

ዋኮ ጎጎኢና ሄላይናራን።

5 ፋያንካኒዕ ኦሶማሳመንያን፤ ኡልና ኤልናራን።

6 ቁሉማ ኦኡኣራና ኦሱጉባታራን

ኦሶማሳመንያን ባራራንዋ።

7 ሻጋ ኦየላራን ኦሶማሳመንያን፤ ዋኮ ሻጋ ሄላይናራን።

8 ዎዳና ቁሉ ኦኮንሌተታ ኦሶማሳመንያን፤ ዋ ድናራን።

9 ኦዎጋርሳራን ኦሶማሳመንያን ይስ ካዋ አማም ኡማምናራን።

10 ቁሉማ ማራን አመረነ ኦሆሮራማራን ኦሶማሳመንያን፤

ዎኖናት ካዳሩረ ካክሶያ።

11 “እባዶ ኣላንቲቴይ እስን ጎሀባረ ጎሆሮረና፤ ሜላነ ዱባ እስን ጉት ጎአዬሰ ኦሶማሳንቴታን። 12 ዳሩሪ እስን ታአታይናታን ሙራ ታአቲ ማንኮሌተ ማራን ገጌላየን፤ ገጌሎ ቱሳ። እስንኮ ሆረነ ኦግረን ኦሄገሮል ሂካማሌ ሆሮረራን።”

ኢፋና ኤሰቦ

(ማር. 9፡50፤ ሉቃ. 14፡34-35)

13 “እስን ታኡሌ ኤሰቦታን። ኤሰቦ ታኤሰቦ ኦኖሞንጀ ጎዋተ አባባይ ኦኖሞንጀ የላዪን ዳንዳታ? ሳር ሻፋምደ ሉክ ታእባዶይ ዳዳራምን ኳሬ ላኦ ላኮአብቶ።

14 “እስን ካአላም ኢፋታን። ዎዳም ጉት ታግታ ካታማ ስያምን ላኮዳንዴቶ። 15 ዳብ ሀንቃይሳተረ ዳቾ ሄገሊ ጎልሳተ ካካታራ እባዶ ላኮግሮ። ምን ኦሮ ካግሮ ዱባን ጎጎሀንቃይሮ ቦላንሶ ጉት ካይን ኳሬ። 16 ሂካማሌና እባዶ ኦኢዳን ፈሎኦትስን ዲጉረ ዳሩሪ ካግሮ ኣቦክስን ጎጎካባጅሮን ኢፋክስን እባዶ ሆረ ሀሃንቃዎ።”

ሴራ ካኦርት ፈሎ ሃኖ

17 “አን ሴራ ካሙሴና ካሄገሮ ኢግልስን ካኤመየሮ አን እስኑን አሮሌኖ፤ ፈሎ ሀይስን ኳሬ ኢግልስን ላኮኤሜየሮ። 18 አን ሩምና እስኑን አማራ፥ ኡልና ዳሩርና ታ ሮራኒ ሴራ ዱባ ፈሎ ሀይናራ ኳሬ ሴራኮ ፍዳለ ቶ ጎርቱን ኤጋኖ ኮ ዱዶ ላኮኢግልሳምሮ። 19 ሃንሱን ማዮና ሂካ አጃጃ ዱባኮ ክጫርክ ጎባሰ ካካለና ጎጎባስሮ ጎአጋልስሰ ዎኖናት ካዳሩረይ ዱባንኮ ክጫርክ አማም ኡማምናራ። አየሱን ጎአመን ሂካ አጃጃል ፈሎ ሀይሳ ኦካለና ፈሎይ ጎጎሀይስናዉን ካአጋልስሳራ ሀሱ ዎኖናት ካዳሩሬት ካንጂንክ አማምናራ። 20 ቁሉማትስን ታፋራሳውልኮና ሴራ ካሙሴ ኦአጋልስሳራንኮት ቁሉማኮ ሮር ጎሙቶን ዎኖናት ካዳሩረ ቶስ ኢጂ ታብን ላኮዳንዳታን አን አማራ።”

የሱሳኮ ኤንገ ማራን ካስሳመሮ አጋልስስ

(ሉቃ. 12፡58-59)

21 “ካሆሬ እባዶነ ‘እባዶ አሮላጋዴን ካአማመሮ እስን ማልቴታን፤ እባዶ ካላጋዳራ ፍርዳምናራ ካአማመሮ ማልቴታን።’ 22 አን ጎአመን ሃ አማራ፤ አቢኬሳ ራካሊ ካኢንጋማራ ዱባ ፍርዳምናራ፤ ጎርቱን አቢኬሳ ‘ካማድኖን’ ካአማራ ታአይሁድ ሾንጎይ ሆሳምናራ፤ ‘ታቶዋ’ ካአማራ አደ ታጋነም ኤሌንኮክ ፍርዳ ኡሱ ኦራታራ። *

23 “ሃንሱን ጃርሶካ ባንኤ ታፋላ ጉት ካይተደ ዋዉን ካኮስሳቶ ጎራታ አቢካ ኩ ካኮቁቃመራ አየስ ኩን ቃል ጎአመ፥ 24 ጃርሶካ ኤሰ ባንኤ ታፋላ ሆረ ኢሳግጉደ ሆራርጀ ሴጉዴ አቢካነ ዎታ ዎጋር፤ ኤሰኮ አባባደ ጃርሶካ ዋዉን ስስ።

25 “ኩ ካሞታራ ባራጋራካ ኩ ጎጎፍርድሶንኮ፥ ዳናና ካሻሮን ሮርስ ኩ ጎጎስሶንኮና ምን ካሻኖ ጎጎታብሶንኮ ራድ ግራን ሳም ባራጋራካነ ዎታ ዎጋር። 26 አን ኩን ሩምና አማራ፥ ኡሱ ኩ ጎፍርድሰ አድ ማራጋደ ዱባ አት ሙር ታጉድሶ ኤሰኮና ላኮብናቶ።”

ሻርሙጡማኮክ ጋራ ካስሳመሮ አጋልስስ

27 “አሮሻርሙጢቴን ካአማመሮ ማልቴታን። 28 አን ጎአመን እስኔ ሃ አማራ፤ ሄለል ታሀልቻ እሊ ካድያራ ዱባ ዎዳናቴሳይ ኤሰነ ዎታ ሻርሙጠራ አማኖያ። 29 ታመርገ እልታታ ጩቦን ኣላንቲ ጎሌተ ጎርሰዋ ቤስ ሻፍ፥ ማርካ ዱባ ታጋነም ኤለን ቶስ ሻፋማናኮ ማርካኮ ባንኤ ቶ ዋታኖያ ሆረክ። 30 ገነ ታመርገታታ ጩቦን ኣላንቲ ጎሌተ ጎስጉደ ሻፍ! ማርካ ዱባ ጋነም ቶስ ሻፋማናኮ፤ ማርካኮ ባንኤ ቶ ዋታኖ ሆረክ።”

ከልክ አማማኖኮክ ጋራ

(ማቶ. 19፡9፤ ማር. 10፡11-12፤ ሉቃ. 16፡18)

31 “ ‘ኦርቴሳ ከልክ አመ ካቤሳራ ዱባ ከልክ ካኮአመሮ ዎራቃታ ኤሰን ስሳኖ ዶትሳራ አማመራ።’ 32 አን ጎአመን እስኔ ሃ አማራ፤ ኤሰ ካካለኔ ዎታ ሻርሙጣ ግራን ጉት ጎአበ ኳሬ፤ ኦርቴሳ ከልክ አመ ካቤሳራ ዱባ ኤሰ ካካለኔ ዎታ ጎጎሻርሙጢቶ ካየላሮያ። ሂካ ጋራይ ከልክ አማንተ ታቤተቶ ሄለልትቲ ካአታታራና ካሻርሙጣሮ ኣን ቶታማራ።”

ጋራ ካአማቶ

(ማቶ. 5፡32-38፤ ዎዩ. 19፡12፤ ያይ. 5፡12)

33 ካሆሬ እባዶን፥ “ጣራ አሮአማቴን፤ አየሱን ጎአመን ዋይ ሆረ ካአማተቶ ኦራ” ካአማመሮ ማልቴታን። 34 አን ጎአመን እስኔ፤ “ሱረ አሮአማቴን” አማራ። ዳሩሪ ጎሌና አሮአማቴን፥ ኮርፍንጀ ካዋታ። 35 ኡሊ ጎሌና አሮአማቴን፤ ሉክ ታዋ ታኮፎልሳቶያ፤ ኢየሩሳለምና አሮአማቴን ታንጂንት ታዎኖ ካታማታ። 36 እስኦታይ ጎሌና አሮአማተ፤ መተካክ ፊጣ ኮ ጉማራ ጎርቱን ጋምባላ የልን ላኮዳንዳቶ። 37 ሃንሱን አዬሳ ግራን አዬስክስን ጎኢማና “እ” አደ ጎላአማና “ላ” ሀሌዎ። ሂካኮ ካካለ ዱባ ካሜላንኮ ካኤሜታሮያ።

ሀሎ ብን ላኮዶትሳሮ

(ማቶ. 5፡38-42፤ ሉቃ. 6፡29-30፤ ዎዩ. 19፡13-18)

38 “እል ማራን ኢል፥ ኢልኮ ማራን ኢልኮ፥” ካአማመሮ እስን ማልቴታን። 39 አን ጎአመን እስኔ ሃ አማራ፤ ታሜላን ካፈላሮ እባዶት አሮኔባቴን፤ አየሱን ጎአመን ሀንጎሮጫካ ካመርጌ ካባሳሮን ካካለ ሀንጎሮጫ ካበተ አድ ቱሳ። 40 እባዶት ኮ ቆሎካ አታይን ኩ ጎሞቴ ሳርስ ካባነ አድጉደ ኡሱን ስስ። 41 እባዶት ኮ ኩኔ ባንኤ ቶ ሴና አም ኩ ጉት ጎሁኖመ ኡሱ ራኮክ አምባ ኡሱነ ዎታ ሴ። 42 ኩኮ ካኤባታሮን ስስ፤ አምአይን ካዶታታሮኮና አሮትራተ።

ዲና ጌላታኖ

(ሉቃ. 6፡27-36)

43 “ኦላታ ጌላ ዲናካ ዲድ ካአማመሮ ማልቴታን።” 44 አን ጎአመን ዲናጆልክስና ጌላየን፥ እስን ኦሆሮራራዉና ኤባየን አማራ። 45 ሂካ ማለ ማንኮ የላታን ማራንትኑን ዳሩሪ ካግሮ ኣቦክስኑን ይሳስ ልናታን። ኡሱ ካኢዳኑና ካሜላኑን ዱባን አርት ቤሳራ፤ ኢዳሞና ጩባለሳሉና ቁሎሌዉን ኡብስሳራ። 46 ካጌላታሮ ካላል ኦጌላታታን ጎሌተን መ ሙራ ሄላይናታን? ቃራጣ ኦኩኩይሳራና ላ ኡሱማሌ የላ ግራና? 47 አቢላልትስን ታላልነ ኖጎዳ ኦአታታን ጎሌተን ኦካለኮ መይ ኢዳታን? አይዛብልና ላ ሂካ የላ ግራና? 48 ሃንሱን ካዳሩረ ኣቦክስን ቁሉክ ጎጎሌሮይ እስና ቁሉኒዕ ላ።

5:4 ማዛ. 24፡3-4።

5:5 ማዛ. 37፡11።

5:6 ኢሳ. 55፡1-2።

5:8 ማዛ. 24፡3-4።

5:10 1 ጴጢ. 3፡14።

5:11 1 ጴጢ. 4፡14።

5:12 2 ኦዱ 36፡16፤ ኦፋ. ፈ. 7፡52።

5:13 ሉቃ. 14፡34-35።

5:14 ያን. 8፡12፤ 9፡5።

5:15 ማር. 4፡21፤ ሉቃ. 8፡16፤ 11፡33።

5:16 1 ጴጢ. 2፡12።

5:18 ሉቃ. 16፡17።

5:21 ብያ. 20፡13፤ አዳ. 5፡17፤ 16፡18።

*5:22 አቢኬሳ ካሀባራራ ኮኮ ካሆርኮ ማጻፋል፥ “አዳ” ካአማሮ ሃፉራ አዳራ።

5:27 ብያ. 20፡14፤ አዳ. 5፡18።

5:29 ማቶ. 18፡9፤ ማር. 9፡47።

5:30 ማቶ. 18፡8፤ ማር. 9፡43።

5:31 አዳ. 24፡1-4፤ ማቶ. 19፡7፤ ማር. 10፡4።

5:32 ማቶ. 19፡9፤ ማር. 10፡11-12፤ ሉቃ. 16፡18፤ 1 ቆሮ. 7፡10-11።

5:33 ዎዩ. 19፡12፤ ቶቶ 30፡2፤ አዳ. 23፡21።

5:34 ያይ. 5፡12፤ ኢሳ. 66፡1፤ ማቶ. 23፡22።

5:35 ኢሳ. 66፡1፤ ማዛ. 48፡2።

5:37 ዎዩ. 19፡12፤ ቶቶ 30፡2፤ አዳ. 23፡21።

5:38 ብያ. 21፡24፤ ዎዩ. 24፡20፤ አዳ. 19፡21።

5:42 አዳ. 15፡8፤ ማሱ. 24፡29።

5:43 ዎዩ. 19፡18።

5:44 ማሱ. 25፡21-22።

5:48 ዎዩ. 19፡2-18፤ አዳ. 18፡13።