Kaɂibirawwii Ibaaddo Tos Kafaramero Handdaa
Tabano
Hikki handdaa kakkons'aafamera ibaaddo iso godiide ammanokkisoo iisin kagabbalamero amaniiluwunye; s'aafiiti Ibirawijjoluun kaɂaddeesisera Yesuusa Kiristoosa karrummiinna kagachchoo mutano kawaa laano tusinya. Hikki amaniil ammanokkisooyi goggoɂarɂarawun ataayisara; hikka kakkofele goorata rummi seed addeesise tusara,
1. Taɂatatero rakkookotti garane karrummii odoon kaɂajajaamaro kalleera Yesuusa jiruu jiroommakki ere kawaayya; Ere kawaa laanoyi ammato ohorkkokki kahegeroolkko, Musekkona erggichchalkko aaloo karooreya.
2. Yesuusa ammato ohorkkookokki tuuk'aamolkko aaloo karoore jiruu jiroommakki tuuk'aamo laano Waa issii ayeesera.
3. Gara kayesuusane amaniil c'ubbokko, abssikkona goyikko fayyinnara; Yesuusa tuuk'aamolkokki woyichcha laanoyi kaɂibirawwii ibaaddokokki ammano seerana kagiddi jaarsso hoos aani mutaa kagire fayyinna rummi goggolleeroon yelera.
S'aafiti taɂisiraɂeeli jirtti kaɂaddeesame ibaaddokokki ammano masuussa yelatereyya, (Foolssi. 11) onabbabaraan ammanokkisooyi goggoɂataarawun addeesisara; usumaleenna (Foolssi. 12) ammana Iilɂoɂoottisoo Yesuusaa gutii kaanoyi ammanokkisooyi goggoɂataarawunna maamisitti rakkoonna abboosa goggeenna goggoɂobssiraawun gorssaara, gudisaanna kagorssa haafura sisaa gudisara.
Raattoo Hikki Mas'aafa Kaɂabera
Tabano, Waa Kiristoosaayi mutano 1:1-3
Kiristoosa erggichchakko karooran laano 1:4—2:18
Kiristoosa Musekkona Iyyaasukko karoore laano 3:1—4:13
Tuuk'aamo laano kakiristoosa dubbaankko karooraro laano 4:14—7:28
Kakiristoosa haafura ammatokko karooraro laano 8:1—9:22
Kakiristoosa jaarssamanokokki jiinaan 9:23—10:39
Ammanokokki jiinaan 11:1—12:29
Waa geggelaayisano 13:1-19
Kac'ufano ebi 13:20-21
Gudisano 13:22-25
1
Waa Erekkeessakokki garane ayeesano
1 Horkkooskko kayere Waa raa kamoogganinna goorata kamoogganii gara kahegeroolnne odojoolkkaanuun ayeesere; 2 gidda goɂameen kagachchoo geesii kameen dubba goggoɂeelloon kayelero erekkeessakokki garane noon ayeesera; alami dubba kakkomet't'eera usuuya. 3 Usu kabaja tawaa hank'k'ayise katusaroya; yadaliitteessana Waanne wota taɂekkaattotta, haafurakokki hunnaayi alami dubba isikkise abera, ibaaddo c'ubbokko k'ullooyise abbaabatere daruurii kaɂatii Waakotti merggee hamas's'ee.
Ere kawaa erggichchalkko karooraro laano
4 Usuun kabeera mege kaɂerggichcha megekko karooraro mankkollee maraan, ere kawaa erggichchakko aaloo karooraroya.
5 Waa duuddo erggichchaal orroo,
«Ati erekkeetta, ani ku hittaari umulera»
goorttun
«Ani odo leerowa, usuna erekkee linnara»
kakkoonɂamere maayyona laagire.Mez. 2:7; 2 Sam. 7:14; 1 Od. 17:13.
6 Waa barkki erekkeessa alami tos kakkofarare goorata,
«Erggichcha kawaa dubba usuun hasagade» amera.Ada. 32:43.
7 Erggichchakokki gara,
«Erggichchaalnna ambbal aani,
ohandaaranna lac'a kaɂeleenee aani yelinnara» amara.Mez. 104:4.
8 Erekkeessakokki gara ade;
«Hedo! Korffinjekka jiruu jiroommakko taa jiruujiroomma geeroon girnnara;
wononatikkaanna rummii bariisatta;
9 Ati k'ullumma geelatta; meellaneenna diidatta;
Hikkakkotti aalanttii Waa Hedokka ku assaabate;
Saatilaalttaakko roorise geggeloo tasisatto zayitii kuun shigide» amara.Mez. 45:6-7.
10 Usumaleenna,
Goottakkee! «Ati horaarjje ul met't'iite;
Daruurjjolnna genettaayi met't'iite;
11 Iso dubba bayinnaraan;
Ati adde girnnatta;
Iso dubba sarssi aani doɂayinnaran.
12 Gashe aaninna ati duubinnatta;
Isona sarssi kaddoɂan sarssi kaɂusubii goggoɂiggilssamaro malee iggilissaminaran.
Ati arggetto atitta,
Geeskkaawun gachcho laagitto» amara.Mez. 102:25-27.
13 Waa erggichchaal orroo;
«Diinakkaa odonnatikkaa hegelii taa yellooyi
Merggetteeyi hamas's'ii» kakkoonɂamera maayyona laagiro.Mez. 110:1.
14 Erggichchaal dubba Waa ammani kafayyinnaro ibaaddon handdayin ofaramaraan Waawun ohandaaran ayyaanalyyaan.