Kafaramero P'awuloosakkoki Handdaa
Filmoona Tos
Tabano
Filmoona kaɂaddeesame amaniiye, kak'ollasiyaasi min kawaakokki maganaalkko kooyya amame hedamara. Filmoona Anasmoosa kaɂamamaro diyyiti abanaaye, hikki diyyitina goottakeessakko iise baye takkobeere minkashaano kagire P'awuloosane wota eseleen, gara kap'awuloosane Anasmoosa kakiristtinnaa ammano atate, P'awuloosa Filmoona tos kas'aafere handdaa Filmoona abbaabate usu tos emeeto gutii kagiro diyyiti Anasmoosa wota goggowogarroo kashaadisaroye, adanoyinna gidda Anasmoosa amanii mankkollee maraan hittakko horenbbaan kaɂammano abbi aani usu goggok'op'aroon kuwaarre diyyii aani usu goggotootinonkko segaara.
Raattoo Hikki Mas'aafa Kaɂabera
Tabano 1-3
Kap'awuloosa galata Filmoonaan 4-7
P'awuloosa gara kaɂanasmoosa kaɂebaatero kaɂatii ebi 8-22
Gudisano 23-25
1
1 Yesuusa Kiristoosa maraan kashaamero P'awuloosakkona abbikkaani T'imotoosakko, aaloo no kageelaatannona noonne wota kafelaro Filmoonaan. 2 Abbattaani Afibiyaan, noonne wota wotaadara kalleeron Arikkip'aan minkkaayi kakukkumaro amaniluun,*«Minkkaayi kakukkumaro amaniiluun»: heɂi tagiriikkii «Minkkaayi kagiro min kawaawun» amara.K'ol. 4:17.
3 Waa Aabbokkaanikkona, Goottaa Yesuusa Kiristoosakko sinonna nogodda isinuun halleeto.
Tafilmmona geelanjjeenna ammano
4 Ku ebikkeeyi shaada arggetto Hedokkee galataara. 5 Aalanttina Goottaa Yesuusaan kaɂabtto ammanona k'ulloolee dubbaan taɂabtto geelanjje maalera. 6 Kiristoosaa mankkoginno maraan ayees kaɂidan dubba aaloo goggoɂaddeesson, ammanokkaa kakkaleetun geegisaa goggoɂataattoon ebaatara. 7 Abbikkee! K'ulloolekotti wodana mankkofolssisseewun geelanjjettaakko geggeloo oɂatiinna goggoɂinna helayera.
P'awuloosa Anasmoosa maraan wogarssi ebaate
8 Haanssun felin kadootisaro ati goggofelttoon ku ajajin Kiristoosaayi jabuu iin gogirtena, 9 Goortta jaarsana gidda ade Kiristoosa Yesuusaan kashaamera ani P'awuloosa geelanjjee ku ebaatara. 10 Minkashaano giraan kaɂumulero erekkee Anasmoosa maraan ebaatara.K'ol. 4:9. 11 T'aye kuun laɂo kallayikkiye; gidda ade kuunna leere iyyeen laɂo kaɂabo leera.
12 Wodanattee malee kalleero usu abbaabe ku tos farera. 13 Wongala maraan ani takkoshaameree banɂettaayi liire iin goggohanddayiroon haasayiin dootere. 14 Ayesuun goɂameen ati kafelatto kaɂidankki ayees dubba geelanjjee kuwaarre hunnaa goggolleenoonkko kunne hamakkarooni koonna felin lakkodootaro.
15 Woddaasan Anasmoosa goorata kic'c'aruun kukko kakkoonkalebeera, usu k'op'ayidde eerinnawun ku dollee goggoɂadallaayissonya. 16 Hittakko horenbbaan ade diyyii aani halleennoni giraan diyyikko karooraro awɂallokki abbiya; iin kageelaameya, halleewo kuwaarre sooyi usu handdaanokkeessa ku mankkomaaddinaro maraan ayyaanaa ade Kiristoosaa abbi kuun mankkollee maraan kuyeen ade aaloo kageelaameya.
17 Goortta in saatii aani gotootite in goggok'op'aattoo malee yela usu ata. 18 Usu ku kakkomiirɂera ayees gogire goorttun amɂaatatta usu gutii goggitte in gutii tootii. 19 Ani P'awuloosa hikka genetteeyi s'aafera, usu taɂabo anza ani murnnara. Ati metekkawun kakkee mankkoleetewun koonna lakkoɂayeesinnaro. 20 Abbikki Goottaayi in goggomaaditon dootara, Kiristoosaa wodanattee foolssisi.
21 Iin kaɂajajaamatto laano abddataa, ani kahoosatarokkona roorisi kafelnnatto addeesere s'aafara. 22 Hikkakkona kakkalee, ebikkisin abbaab helayire ani isin tos emeeyin abddi mankkoyelataro maraan takkofoolssaro banɂe iin ekkaasa.
Tagachchoo nogodda
23 In wota Kiristoosa Yesuusaa kashaamera Ep'afira nogodda farramara.K'ol. 1:7; 4:12. 24 Usumaleenna inne wota ofelaraankko Mark'oosa, Arsit'irokoosa, Deemasana Luk'aasana nogodda farramaraan.Ofa. Fe. 12:12; 25; 13:13; 15:37-39; 19:29; 27:2; K'ol. 4:10,14; 2 T'im. 4:10,11. 25 Tagootta Yesuusa Kiristoosa sino isin wota halleeto.